¹ TÖ̧Ä̧NÄ̧HUA̧MÄ̧ ttörö pa̧'a̧nö̧ ucuocuinö: ² Ttö̧ja̧sa̧ i̧tti̧, yajutetä ki̧tti̧mö̧ nä̧tö̧ ta̧ju̧ ka̧cui̧nä̧tö̧. ³ Jahuäjumä Egipto ötahuiyättö kidepä iyä'chäcuähuäju jȩja̧'a̧ jä̧'i̧ja̧'a̧nö̧ jȩpi̧nä̧ju̧ möäyaju ku̧ji̧nö̧ pä̧nä̧mä̧. Jahuäjumä ju̧huȩnȩtä̧ ttö̧ja̧ isaju kidepä iyä'chäcuähuäju 'cua̧rö̧nä̧ jȩpi̧nä̧ju̧. kamöcanä 'chuttädä'chinäcua̧ ja̧'hua̧ta̧'a̧nö̧ ttatatiyä tti̧ti̧huä̧ri̧nä̧u̧ juorömä. ⁴ kuböa kimimä Aholá pä'ö micuinä̧ju̧ ja̧'hua̧ta̧'a̧nö̧ kijähuaju möäyajumä Alohibá pä'ö micuinä̧ju̧. Ja̧'hua̧nö̧ ja̧'a̧ jahuätömä chirecuamö jö̧nä̧ pä'i'inätö̧, juhua'atäcu jahuätömä ttittimörö̧ uhuäbecuinätö̧ u̧mä̧tö̧rö̧'inä, nä̧tö̧rö̧'i̧nä̧. Ttimimä pi̧yȩnä̧ huȩnȩcuä̧cha̧'a̧: Aholámä huȩnȩcuä̧cha̧'a̧ Samaria rȩjȩ ttö̧ja̧rö̧ ja̧'hua̧ta̧'a̧nö̧ Alohibámä huȩnȩcuä̧cha̧'a̧ Jerusalén ötahuiyä ttö̧ja̧rö̧. ⁵ Ja̧'hua̧nö̧ ja̧'a̧nä̧ Aholámä chirecua jö̧nä̧ kö̧ja̧'a̧nä̧ ttidepä iyächäcuähuätö jȩttä̧'i̧ja̧'a̧nä̧ jȩpi̧nä̧ju̧; jahuäjumä kuju'cäcurö rö̧ä̧nä̧ ku'quecunä topinäju̧, Asirias rȩjȩnä̧ hue'ätörö, ⁶ ruhuo hue'ö tuhuoppunä jä̧ta̧ 'ca̧tä̧u̧rö̧ ja̧'hua̧ta̧'a̧nö̧ umöhuäyotö su̧ro̧da̧u̧ tturuhuotörö'inä juiyo juruhuätö tta'anä a̧'cua̧cuä̧tö̧, o'catoi'önä i̧sa̧nä̧ huȩjä̧tö̧rö̧. ⁷ Ja̧'hua̧nö̧ ja̧'a̧ttö̧ kahuäjumä ka̧mö̧nä̧ pa̧ja̧tö̧ jahuätörö kidepä iyähuinä̧ju̧, Asiria rȩjȩnä̧ ka̧cuä̧tö̧ o'catoi'önä adihuätörö, jahuäju kuju'cä̧u̧rö̧mä̧ jahuäjutä surojuojepinä̧u̧ ja̧'hua̧ta̧'a̧nö̧ o'cajuiyönä ku̧ä̧nä̧hua̧ o'canä'inä. ⁸ Ja̧'hua̧nö̧ ja̧'a̧ ttidepä iyä'chäcuäö jȩttä̧i̧jö̧mä cättädi'a pä'ömä juiyina'a ttäbocutä päi'önä Egiptottömä, jahuattömä jinä mu̧äyaju käi jahuäjucu ttä'ecuomenä, ja̧'hua̧nötä̧ kä̧mä̧dö̧ juajurumä kätatiyanä ti̧huä̧rö̧mä̧, ä̧cuo̧mȩnä̧tä̧ kä̧mä̧du̧ suronä jȩpö̧ ttö̧jö̧ jahuäjurumä isoya dattepomenämä. ⁹ Ja̧hua̧nö ja̧'a̧ ucutu cumötucunätä chiyinäu̧juä̧ ucututä cuju'cätucua'acu, Asirios tö̧mu̧nä̧tä̧ yajurutä adihuomenätä. ¹⁰ Jahuätömä ja̧'hua̧nötä̧ pocuinätö̧ ku̧i̧'ca̧tä̧huä̧ta̧ juija'amä. jahuätömä jahuäju ki̧ttimö umäto̧ru̧'i̧nä̧ nä̧tö̧ru̧'i̧nä̧, curä'chu ȩmopo̧'ö̧ cuä'äu tticuini̧yä̧cua̧ ja̧'hua̧nö jȩtto̧mȩnä̧ Dä'äru̧ ju̧nätä pärohuächinä̧ju̧ korotö nätörö̧mä̧, Ja̧'hua̧nö jȩpu̧ cuä'opinätö̧ ro̧ȩcuä̧ra̧'a̧ ja̧huätömä. ¹¹ Kijäcuäju Aholibámä̧ pi̧yȩ topinäju, ja̧'hua̧nö̧ toja'anä kidepä kö'quecumä yabonänä pä̧huä̧rö̧ji̧nä̧cua̧ ja̧'hua̧nö̧ ja̧'a̧ttö̧ köböattö'inä abonänö kidepä iyä'chäcuähuäju 'cua̧rö̧nä̧ jȩpi̧nä̧ju̧. ¹² Jahuäjumä Asiria ttö̧ja̧rö̧ kö'quecunä topinä̧ju̧, ruhuo hue'ätörö'inä, adihuäjuei pö̧jä̧ti̧yö̧ 'ca̧tä̧huä̧tö̧ su̧ro̧da̧u̧ tturuhuotörö'inä, Cabayutö̧nä̧ huȩjä̧tö̧rö̧'inä. Jahuätö o'catoi'önämä juruhuätö ji̧na̧'a̧ ja̧'hua̧ta̧'a̧nö̧ a̧'cua̧cuä̧tö̧. ¹³ Ttö topinösä jahuäjumä ka̧mö̧nä̧ pa̧ja̧tö̧tä̧ surojuojecua'a. Jahuätö nä̧tö̧mä̧ ta̧ju̧ cuäyotö yo̧mȩtȩnä̧ surojuo'ecuinä̧tö̧. ¹⁴ Ja̧'hua̧nö̧ ja̧'a̧ttö̧ jahuäjumä jabocutä kidepä iyähuä'chö ki̧nä̧ju̧. Topinäju̧ räbänä ttö̧ja̧ ttä̧'u̧cuä̧ adicua'a, caldeo ttö̧ja̧ tta̧'u̧cuä̧ tunä tuhuecua'a, ¹⁵ ttäcä oya'inä ro̧ji̧na̧ä̧, ttunä 'ca̧tȩhua̧ o̧ta̧'i̧nä̧ juȩjö̧nä̧. O'catoi'önä su̧ro̧do̧u̧ caruquiyänä aditätö 'cua̧ri̧nä̧tö̧ caldeo rȩjȩttö̧ ttuhuäpächina'attö. ¹⁶ Jahuätörö tottomenä, surojönä jȩtta̧ pä'ö pä̧huä̧rö̧jö̧nä̧tä̧ a̧mu̧cuädinätö̧, Ja̧'hua̧nö̧ ji̧yä̧cu̧ huȩnȩ jittähua pä'ö hue'inö Caldeo rȩjȩ ra̧'a̧. ¹⁷ Ja̧'hua̧nö̧ ja̧'a̧ttö̧ Babilonia ttö̧ja̧mä̧ jahuätucu ttidepä pä̧huä̧rö̧jö̧'a̧nö̧ jȩpö̧ ja̧cui̧nä̧tö̧. Ja̧'hua̧nö̧ jȩtti̧na̧'a̧ttö̧mä̧ jahuäjumä suropaju pä'ähuajutä ki̧nä̧ju̧, ja̧'hua̧nö̧ pättäcua ttöjö'cococuasä pä'ö cue'ächöta ki̧nä̧ju̧. ¹⁸ Ja̧'hua̧nö̧ ja̧'a̧ huȩyu̧tu̧ rutähuina'a ucu cuirecua pocojucu 'cuäcuopä'chumä, ja̧'hua̧ta̧'a̧nö̧ ttö̧'o̧cui̧'i̧nä̧cu̧jä̧ cuä̧ta̧'i̧nä̧ jui̧'a̧rö̧, ja̧'hua̧nö̧ ja̧'a̧ttö̧ ttä'inä chu̧su̧rö̧tö̧nä̧ jö̧nä̧cu̧sä̧ jahuäjuru pä'äjitä'inä kijähuajumä ja̧'hua̧nö̧tä̧ ji̧nä̧cua̧. ¹⁹ Ja̧'hua̧nö̧ ja̧'a̧nä̧ jahuäjumä yabocutä rö̧ä̧chi̧nä̧cua̧ jidepä iyä'chäcuähuämä, ucutä möäya̧ känö cuamöcuädinomettö̧ rȩbȩhui̧nö̧, ja̧u̧ juäimä ttö̧jo̧ca̧'a̧ra̧'a̧ ttidepä iyä'chäcuähuämä ki̧na̧'a̧ Egiptonämä. ²⁰ Ja'huanö 'cuäopina'a Egipcios ttö̧ja̧ isajuru öjö'ca'attö, ja̧u̧mä̧ rö̧ä̧nä̧ pä̧huä̧rö̧ji̧nä̧cu̧ jȩa̧ pä'ö buro jä̧'i̧nö̧'a̧nö̧ ja̧'hua̧ta̧'a̧nö̧ ca̧hua̧yu̧tu̧ jä̧'i̧nö̧'a̧nö̧. ²¹ pä'äjita'anö rötadipäjijä cuamöcuädö surojinö ucutä mu̧ö̧ya̧ cu̧ja̧i̧, ji̧yȩnö̧ mu̧ä̧ya̧ cu̧ji̧nö̧ pä̧nä̧ EgIpto ttö̧ja̧mä̧ ttumönä cuamucanä cuättinäcu̧jä̧. ²² ja̧'hua̧nö̧ ja̧'a̧ttö̧ TURU̧HUA̧ TTÖÄNÄHUA̧ pi̧yȩ päö: topi TTÖTÄ pa̧da̧da̧cuo̧ttö̧ ucu cuesehuinä̧u̧ pinä̧tö̧ ucuru ttöjö'cö juiyönä. Jitö ucu yaocu ttihuichinä̧u̧ pinä̧tö̧'i̧nä ,TTÖTÄ jahuätö o'catoi'önä̧ ttö̧jo̧cu̧ o̧du̧nä̧ttö̧ chi'cächäcua̧sä̧: ²³ babilonios ttö̧ja̧ttö'inä ja̧'hua̧ta̧'a̧nö̧ caldeos ttö̧ja̧ttö o'catoinä, Pecod, soa, coa, asirios ttö̧jä̧tttö̧ u̧mä̧ttö̧ adihuättö juiyó juruhuätöinä ja̧'hua̧nö̧ ja̧'a̧näinä̧ su̧ru̧da̧u̧ tturuhuotö ²⁵ Juiyo recuätö ttöja̧ ttichäcua̧jä̧ ttucupäcu rocuähuö carukiyä doähuänä'inä ichö. Jahuätömä ttö̧jo̧cuä̧mäcuo̧tö̧ ttoecuä obäcu bäreu'inä ppo̧ö̧'inä obi 'chu̧huä̧ra̧nö jahuata'anö ttunä'inä 'quiyö otta huȩja̧'a̧ ucu cu̧jo̧me o'cajuiyönä sobucuächönä. TTÖTÄ chiyä̧cua̧sä̧ jahuätö jȩpu̧ ro̧ttȩpa̧cu̧ päö. Jahua̧'ja̧'a̧ttö̧ ²⁴ TTÖTÄ ä'cuoyähuönö chami surunä̧ jä̧cu̧sä̧ ucurumä. Jahua̧ja̧'a̧ttö̧ jahuätötä päi̧cu̧nä jȩpu̧ ro̧ttȩpä̧cuo̧tö̧.Jahuätömä cui̧ji̧yu̧'inä cua̧ja̧'inä 'cui'opu tticua̧cua̧jä̧ cumuhuäyotö ko̧cui̧pä̧tö̧rö̧mä curächunä 'cui'cuipu tticuäcuotö. Jahuätömä ttȩmi̧pä̧cuo̧tö̧ cui̧tti̧mu u̧mätö̧rö̧'inä nätö̧rö̧'inä, jahuata'anö cumuhuäyotö ko̧cui̧pä̧tö̧rö̧'inä ocuränä ku tticuatö päö. ²⁶ Jähuätömä cu̧'ca̧tä̧huä̧ti̧yu̧'inä ko'ä̧dö̧ tticuäcuajujä̧ juiyönätä̧ cu̧ji̧pö̧nä̧ ja̧'hua̧ta̧'a̧nö̧ 'chottipäcuajujä cuiäre rö̧ä̧na̧ mi̧cuäumä. ²⁷ ja̧'hua̧nö̧ ja̧'a̧ttö̧ Ttömä to̧chä̧cua̧sä̧ surojönä jȩpo̧cö̧jä̧ dä̧'ä̧rö̧jö̧nä̧ ucu ja̧'hua̧ta̧'a̧nö̧ cuidepä cuiyä'chäcuäu Egipto rȩjȩttö̧ ja̧'hua̧nö̧ ja̧'a̧ttö̧ pä'äjita'anömä topocojujä Egipciorömä ja̧'hua̧ta̧'a̧nö̧ a̧mu̧cuädocojujä jahuätörömä. ²⁸ Ja̧'hua̧nö̧ ja̧'a̧ tu̧ru̧hua̧ Diosmä pä'ö pa̧'a̧nö̧: ¡Topi! Ttömä iyö chu̧ju̧nä̧cua̧sä̧ ucu cuamisurunä to̧'cuä̧u̧ ttu̧mö̧nä̧ jahuätö ucu cu̧su̧ru̧tä̧u̧rö̧. ²⁹ Jahuätömä ttamisurunä totäcuotö ucurumä; jahuätömä rö̧ä̧nä̧ micuäu cu̧ju̧nä̧rö̧mä̧ 'chottipäcuotö cuaditähuä micuä jä̧ji̧mä̧ jitötä ttiäre päi'önä ja̧'hua̧ta̧'a̧nö̧ korojuei'inä jui'ajujä cu̧ji̧pä̧cua̧ju̧jä̧. Dä'ö ttu'u cuidepä iyä'chäcuäu korojuei'inä jui'ajutä cu̧ju̧nä̧ cu̧dä̧pä̧rö̧tä̧ huäkä'co jö̧nä̧ ki̧'ä̧cua̧'a̧huäkä'co jönä̧ cuidepämä ja̧u̧ cuidepä iyä'chäu cu̧ji̧nö̧mä̧ , ucu cuju'comenä cu̧ji̧nö̧mä̧ cuidepä iyä'chäcuäu. ³⁰ Pi̧yȩnä̧tä̧ jȩttä̧cua̧ju̧jä̧ ttidepä iyä'chäcuähuaju 'cua̧rö̧nä̧ jȩ'cua̧'a̧mä̧, cuidepä kö'quecunä ttö̧ja̧ jȩttö̧'a̧cuä̧ jȩpö̧, ttö̧ä̧nä̧hua̧ o'canä suro juocuecuina'amä. ³¹ Ucumä cuböa ki̧'chu̧'a̧cuä̧tä̧ 'chä̧'i̧jä̧ju̧jä̧, ja̧'hua̧nö̧ ja̧'a̧ttö̧ ro̧ȩcuä̧ i̧so̧'ta̧tä̧ cumönä chi̧yä̧cua̧jä̧. ³² TÖ̧Ä̧NÄ̧HUA̧MÄ̧ pi̧yȩ pä'ö: Ucumä cuböa ka̧huo̧'ta̧tä̧ täcunä rö̧o̧'ta̧tä̧ cuahuäcuajujä. Ucumä ttö ya̧dä̧hua̧cu̧ jö̧nä̧tä̧ cu'ärohuächäcua̧jä̧ ja̧'hua̧ta̧'a̧nö̧ ya̧tȩ ya̧ttä̧huȩ'ä̧cu̧ jö̧nä̧tä̧, po̧'ta̧ i̧so̧'ta̧mä̧ rö̧ä̧nä̧ a̧cuo̧'ta̧ ja̧'a̧. ³³ Ucunämä tä̧mä̧cuä̧huä̧tä̧ ja̧'hua̧ta̧'a̧nö̧ barautä su̧'pȩnö̧ kä̧cua̧'a̧, i̧so̧'ta̧mä̧ usurä ȩmä̧huä̧cuä̧huä̧tä̧ juhua'atäcu si'epö icuähuätä; cuböa Samaria ka̧huo̧'ta̧mä̧. ³⁴ Ucumä cuahua'anä joäcua'a: ja̧'hua̧nö̧ ji̧yä̧cua̧ di'ö cuicuäcuajujä ja̧hua̧nö̧ jȩpö̧ cuatatiyämä ppo̧u̧cu̧ päi'önä serocu cuicuäcuajujä. Isopäi'önä Ttö huäjunä ji'ähuinösä, pa̧'a̧nö̧tä̧ huäjuetö ji'äu TÖ̧Ä̧NÄ̧HUA̧MÄ̧. ³⁵ Ja̧'hua̧nö̧ ji̧yä̧cu̧ TÖ̧Ä̧NÄ̧HUA̧MÄ̧ pi̧yȩ pä'ö: Isopäi'önä Ttörömä unichi'inöjä̧ ja̧'hua̧ta̧'a̧nö̧ cuabo ja'acu rä'epö icu do'opö cuicuinä̧cu̧sä̧, ja̧'hua̧nö̧ jö̧ta̧'a̧nö̧ suronä kä̧nö̧ dä'ärö̧jö̧ jȩ'cui̧nö̧'i̧nä̧ ja̧'hua̧'a̧nö̧ cuidepä cuiyä'chöcuähuinö'inä micuämä cuȩcuä̧dä̧cua̧jä̧ ³⁶ Chu̧ru̧hua̧ painäcu̧sä̧: Pi̧jä̧ ttö̧ja̧sa̧ i̧tti̧, ¿Uucu ja̧'a̧ ro̧cuȩpä̧cua̧mä̧ Aholarö ja̧'hua̧ta̧'a̧nö̧ Aholibarö'inä? Ja̧'hua̧nö̧ jö̧ttö̧mä̧ tottönä i̧jȩpi̧ ucu suronä jȩcu̧'a̧ pä'ö cuamucuädäjimä, ³⁷ Ja'huätömä isopäi'önä ttirecuo po'cöcu 'cuä'opä'chö ka̧cuä̧tö̧, ttu̧mu̧nä̧mä̧ ttucuoja cuocua'a. Ja'huätömä isopäi'önä ttirecuo po'cöcu jȩtta̧'a̧ jä̧'i̧nö̧'a̧nö̧ yapare ttöänahua'cacutä jȩpö̧ ka̧cuä̧tö̧, ja̧'hua̧ta̧'a̧nö̧ jä'huätömä tti̧tti̧mö̧rö̧ ocuränä 'cu'icu, iyättö yapare ttö̧ä̧nä̧hua̧'ca u̧cuä̧ pä'ö. ³⁸ Ja'huätömä ji̧nä̧ ja̧'hua̧ta̧'a̧nö̧ jȩpö̧ to̧jo̧cua̧'a̧ TTÖRÖ: Ja'huätömä TTÖTTÖ surojö juiyome surojuo'epätö, ja'huata'anä ji̧yȩnö̧ mo̧ro̧tä̧ surojuo'epätö TTÖ cuädächö mo̧ro̧. ³⁹ Ja'huättö tti̧tti̧mö̧rö̧ cuä'ö icu iyähuä jȩtti̧nö̧mä̧, ja'huätömä ichinätö ja̧u̧nu̧ mo̧ro̧tä̧ TTÖ chöadihuä surojuo'epö. Pa̧'a̧nö̧tä̧ jȩpä̧'chö̧ ka̧cuä̧tö̧ TTO sojusodettömä. ⁴⁰ Ucutumä hueinätö̧jä huȩnȩ ȩpu̧ jiäcuäcuä ttöja̧rö oto ttö̧ja̧ ttichönä. Ja̧hua̧ja̧'a̧ttö̧ jahuätö ichinä̧tö̧, ucutu ta̧ju̧mä ajeinätö̧jä̧, cuiäretucuinä tuähuinä̧tö̧jä̧, jahua'anö ja̧'a̧nä'inä röäi̧nä micuäu juäitö a̧cua̧cuä̧hui̧nä̧tö̧. ⁴¹ Ucutumä ä̧'ä̧cuä̧ppä̧ adicuäppä̧nä̧ pinätto̧jä̧ jahuajöta'anö jo̧mȩnö jȩpu̧ rutäcuodänä̧ta̧ TTÖ chöäre adiu a̧meu̧nä 'chopuinä ja̧'hua̧ta̧'a̧nö̧ TTÖ chiäre a̧dȩi̧nä juȩnȩta̧ rutinä̧ti̧jä̧. ⁴² Jahuäju köjo̧me sobucuächönä recuätö huotta'a rä̧mi̧pi̧na'a̧; korotötö u̧mätö̧mä o'catoinä, sabeottö u̧mätö̧mä dea juiyä̧tö̧ 'kächäcuäcuotö ji̧na'a̧, jahuätömä nä̧tö̧ ttumuca̧ca̧nä adiu o̧bu̧ ru̧nä̧'chi̧nätö jahuajöta'anö ttupiyänä'inä adiu o̧bu̧ ttucuäninä̧u̧. ⁴³ Ja̧'hua̧nö̧ ja̧'a̧ Ttö pä'inösä jahuäjuru si'ähuächinä̧ju̧ kidepä iyä'chäcuäu: Jitämä jahuätömä kidepä iyä'chäcuähuäjucu 'cuä'opä'chätö ucuotäcuähuä juiyönä jahuäjuru ja̧'hua̧ta̧'a̧nö̧ jahuäjumä jahuätucu. ⁴⁴ Ja̧'hua̧ta̧'a̧nö̧ dodepinätö̧ jahuäjuru juhua'atäcu ä'ecuinä̧tö̧ jahuäjucu umä̧tö̧ dodepäjätömä jahuäju mänänä suripäjucu ttö̧ja̧ pä'ö. Ja̧'hua̧nö̧ ja̧'a̧ttö̧ ä'ecuinätö̧ ya̧pa̧rȩ ttö̧ä̧nä̧huo̧tö̧ Aholá pä̧ttä̧u̧cu̧ ja̧'hua̧ta̧'a̧nö̧ yapare ttö̧ä̧nä̧hua̧ Aholibá jahuätö nätömä ucuotäcuähuä juiyö jȩpä̧tö̧. ⁴⁵ Ja̧'hua̧nö̧ ja̧'a̧nä̧ u̧mä̧tö̧ pätetö pättäjita'anä 'cuäopäcuotö ro̧ȩcuä̧mä̧ ja̧'hua̧ta̧'a̧nö̧ ro̧ȩcuä̧cua̧'a̧ isaju kidepä iyä'chäcuähuäju a̧'cua̧rö̧nä̧tä̧ ja̧'hua̧ta̧'a̧nö̧ jahuätörömä ro̧ȩcuä̧cua̧'a̧ röji pä'ö icu pä̧cua̧ ttucuoja erönä jȩtti̧nö̧mä̧, jahuätömä ttidepä iyä'chäcuähuätö ja̧'hua̧ta̧'a̧nö̧ tta̧mö̧nä̧ ttucuojatä 'cucuächi'inä̧u̧. ⁴⁶ Pa̧'a̧nö̧ pä'ö TÖ̧Ä̧NÄ̧HUA̧ Diosmä: Ttömä ä̧rä̧mi̧'ö̧ ji̧yȩtȩ huȩnȩ chucuocuäcua̧sä̧ jahuätö ttaboiyotö jö̧nä̧ ja̧'hua̧ta̧'a̧nö̧ chi̧yä̧cua̧sä̧ yettecuä'chö ja̧tö̧ pä'ö juhua'atäcu ttoju isodenä do'ächächö ttumö jähuä 'chottipatö pä'ö. ⁴⁷ Ja̧'hua̧nö̧ ja̧'a̧ttö̧ ja̧u̧ idaumä icuäcuäu ido'quinä ja̧'hua̧ta̧'a̧nö̧ curä'chu so̧ä̧'chu̧nä̧ cuä'ö tticuäcuotö. Jahuätömä cuä'äö tticuäcuotö jitötä tta̧mö̧nä̧ tti̧tti̧mö̧ u̧mä̧tö̧rö̧'i̧nä̧ nä̧tö̧rö̧'i̧nä̧ juhua'atäcu ttoju odehuiyä'inä ku tticuäcuotö. ⁴⁸ Ttömä jȩchä̧cua̧sä̧ pi̧jä̧ttö̧ toepäch'nä surojö jȩpä̧'chö̧ kä̧cuä̧huä̧. Ja̧'hua̧nö̧ ja̧'a̧ttö̧ nä̧tö̧ o'catoi'önä ttu̧huo̧jua̧ pä'ö ja̧'hua̧ta̧'a̧nö̧ pä'äjita'anö jȩttö̧ juiyäcua'anö ja̧u̧ ttidepä iyä'chäcuähuä. ⁴⁹ Ja̧'hua̧nö̧ ja̧'a̧ jahuäjumä kö̧'o̧cui̧'aä̧cuo̧jö̧ ro̧ȩcuä̧ surojönä jȩpö̧ kö̧ja̧'a̧ttö̧ ucuru. Ucutumä cuami 'qui'ächi'ö ttö̧ja̧ suronä jȩ'cuä̧tu̧cu̧ esetö yapare ttö̧ä̧nä̧huo̧tö̧ tta̧mö̧nä̧ tätähuä'ca, ja̧'hua̧nö̧ ja̧'a̧ttö̧ ucutu'inä cu̧huo̧juä̧cuo̧tö̧jä̧ Ttö Cu̧ru̧hua̧tu̧cu̧ Dios ja̧'a̧mä̧.