¹ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ pa̧'a̧nö̧ ucuocu päinä̧cu̧sä̧: ² Ttö̧ja̧sa̧ i̧tti̧, ¿Tocu ja̧'a̧nö̧ttö̧ Uva daumä adiu ka̧'a̧nö̧ti̧ koro dau ä̧na̧jui̧yä̧ ka̧cu̧ oi de'a ka̧cu̧ oittömä? ³ ¿Ttö̧ja̧mä̧ korojuei jȩtta̧ pä'ömä uva dau odiyä ttȩmö̧'a̧nö̧ti̧? ¿Jahuätömä korojuei jottepa pä'ö ja̧u̧ juei i̧so̧'quȩ ttaditö'anö̧ti̧? ⁴ Ja̧'hua̧ta̧'a̧nö̧ ocurä tticuttömä rȩdȩcuä̧cha̧ pä'ö ja̧'a̧, juhua'atäcu pätecu beipome cuo'ö icuttömä ja̧'hua̧ta̧'a̧nö̧ kä'co'inä cuo'ö icua pä'ö ja̧'a̧, ¿Ja̧u̧nä̧mä̧ ji̧yȩtȩ ttaditö'anö ja̧'a̧? ⁵ !Topittö! Jo̧mȩnö̧ ko̧mȩnä̧mä̧, korojueimä yöroiso jȩpo̧cö̧ pinöjä̧; Ja̧'hua̧nö̧ ja̧'a̧ttö̧ isopäi'önä, ocurä cuo'ö icu o'comä, korojuei jȩtta̧ pä'ö ttadita pä'ömä juiyäcua'a. ⁶ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧MÄ̧ pa̧'a̧nö̧ pä'ö: Uva dau de'a ka̧cu̧ dauhuiyä jä̧'i̧nö̧'a̧nö̧, ocuränä cuo'ö icua pä'ö iyäjisä; ja̧'hua̧nö̧ jȩtta̧'a̧ jä̧'i̧nö̧'a̧nö̧tä̧ jȩchä̧cua̧sä̧ Jerusalénnä ka̧cuä̧tö̧rö̧mä̧. ⁷ Jahuätörömä to'ija̧'a̧cu̧tä̧ tochäcua̧sä̧. Ocurättö rättopa pä'ö'inä, ocurämä kuhuö icuäcuotö, ja̧'hua̧nö̧ jo̧mȩnä̧ Ttörömä TÖ̧Ä̧NÄ̧HUA̧ ja̧'a̧ pä'ö ttu̧huo̧juä̧cuo̧tö̧, ja'huätörö Ttö to'ija'acu tochomenämä. ⁸ Ja̧'hua̧nö̧ jo̧mȩ ja̧huä̧jä̧ rȩjȩmä̧ cuähuämä iyö juiyönätä̧ jȩchä̧cua̧sä̧, juhua'amä jahuätö surojö jȩtti̧no̧mȩnä̧. Pi̧yȩ ja̧'a̧ TÖ̧Ä̧NÄ̧HUA̧ huäjuetö ji'äu icumä.