¹ Ja̧u̧nu̧ o'ca'a Moisésrö TÖ̧Ä̧NÄ̧HUA̧MÄ̧ ucuocuinö "Egipto rȩjȩ ru̧hua̧rö̧ 'chä̧nö̧ ji'äbhuäji, TÖ̧Ä̧NÄ̧HUA̧MÄ̧ pä'ö; ² chumöhuäyotö tti̧'cha̧'a̧nä̧ ja̧'a̧tä̧ topi ucuo tettähuattö pä'ö. Tti̧'cha̧'a̧nä̧ ja̧'a̧tä̧ to'cuoca'a jö̧ttö̧mä̧, ttömä juautö̧nä̧ ro̧dȩpä̧cua̧sä̧ cui̧rȩjä̧ jä̧ttä̧yä̧jä̧. ³ Jua̧u̧tö̧ttö̧ suhuädächäcua'a ajemä. Töttöcuotö ja̧'hua̧ta̧'a̧nö̧ tti̧'chä̧cuo̧tö̧ odehuiyä jacuojura̧'a̧, ä'ähuä̧ppä̧nä̧'i̧nä̧, ä'ähuä o̧'ca̧nä̧'i̧nä̧, cumöhuäyotö ttoju odehuiyänä'inä dottächäcuotö. Cuidepiyu ttö̧ja̧rö̧'i̧nä̧ tti̧'chä̧cuo̧tö̧, cu̧cuä̧ ȩttä̧huä̧nä̧'i̧nä̧, cu̧cuȩ adicuä obänä'inä. ⁴ Ucuturu'inä suronä jȩttä̧cuo̧tö̧ jua̧u̧tä̧mä̧ cumöhuäyotörö'inä ja̧'hua̧ta̧'a̧nö̧ cui̧rȩjä̧ ttö̧ja̧rö̧'i̧nä̧. ⁵ TÖ̧Ä̧NÄ̧HUA̧MÄ̧ Moisésrö pä'inö: Aarónrö ji'ähui: cumö cä'epi ja̧'hua̧ta̧'a̧nö̧ ajehuiyänä cutta'ca ki̧'ä̧di̧, isoranä'inä, aje ppo̧ö̧ oranä'inä ja̧'hua̧ta̧'a̧nö̧ Egipto rȩjȩnä̧ jua̧u̧tö̧ rättönä jȩpi̧. ⁶ Egipto rȩjȩ ajehuiyänä cumö cä'epinö Aarónmä ja̧'hua̧ta̧'a̧nö̧ rä'ähuinätö̧ jua̧u̧tö̧mä̧, Egipto rȩjȩ jä̧ttä̧jä̧ a̧ttä̧di̧'i̧nä̧tö̧. ⁷ Ja̧'hua̧nö̧ ja̧'a̧nä̧ ma̧ri̧mö̧mä̧ juhua'a jö̧ta'anö jepinätö ttumäri'änä, jahuätömä Egipto rȩjȩnä̧ rä'epinä̧tö̧ jua̧u̧tö̧rö̧. ⁸ Ja̧u̧nu̧ o'ca'a Moisés'inä, Aar'on'inä tti̧'cha̧ pä'ö huopinö Egipto ru̧hua̧mä̧ ja̧'hua̧ta̧'a̧nö̧ pä'inö: Chi̧rȩjä̧ ttö̧ja̧ttö̧'i̧nä̧ ja̧'hua̧ta̧'a̧nö̧ ttöttö'inä jua̧u̧tö̧rö̧ rä'epö icua jä'epätucui CU̧Ä̧NÄ̧HUA̧TU̧CU̧RÖ̧ ja̧u̧nu̧ o'ca'anä cuidepiyu ttö̧ja̧rö̧ tti̧cha̧'a̧nä̧ ja̧'a̧tä̧ to̧chä̧cua̧sä̧ ku icu iyähuä jȩtta̧ pä'ö ja̧u̧ru̧. ⁹ Egipto rȩjȩ ru̧hua̧rö̧ Moisésmä pä'inö: Ucumä ti̧yȩnö̧ jädepa päcu'anö hua̧mä̧ ucutä ja̧'a̧, cuahuaruhuärö'inä ja̧'hua̧ta̧'a̧nö̧ cu̧mö̧huäyotörö'inä jua̧u̧tö̧ ucu cuä'ca jo̧mȩttö̧ rä'epö icuähuotö pätti'a pä'ö cuoju odehuiyättö'inä ja̧'hua̧ta̧'a̧nö̧ ajenätä ttö̧jha̧cua̧ pä'ö. ¹⁰ Egipto ru̧hua̧mä̧ pä'inö: "Yo̧i̧ mo̧ro̧tä̧" Moisésmä pä'inö ucu päcuta'anö jä̧cua̧'a̧, ucu cu̧huo̧juä̧cua̧'a̧nö̧, TÖ̧Ä̧NÄ̧HUA̧ jö̧ta'anö hua̧ ka̧ra̧mä̧ toa'a päcujuiyäcua'anö, ujutu tu̧ru̧hua̧ Diosmä. ¹¹ Ucuttömä tti̧huä̧cuo̧tö̧ jua̧u̧tö̧mä̧ cuahuaruhuättö'inä, cumöhuäyotöttö'inä ja̧'hua̧ta̧'a̧nö̧ cuoju odehuiyättö'inä jahuätömä ajenätä̧ ttö̧ja̧cuä̧cuo̧tö̧. ¹² Egipto rȩjȩ ru̧hua̧ ä'ca jo̧mȩttö̧ rä'ochinätö̧ Moisés, Aaróncumä, ja̧u̧nu̧ o'ca'a Moisés TÖ̧Ä̧NÄ̧HUA̧RÖ̧ jä'epinö jua̧u̧tö̧ Egipto ru̧hua̧rö̧ i'cächäjä̧u̧rö̧. ¹³ Moisés jäepäjita'anö jȩpi̧nö̧ TÖ̧Ä̧NÄ̧HUA̧MÄ̧ odehuiyättö'inä hua'ahuinätö̧ jua̧u̧tö̧mä̧, pättiyuttö'inä, ¹⁴ ja̧'hua̧ta̧'a̧nö̧ ro̧ȩcuä̧ o̧ca̧ttö̧'i̧nä̧ rö̧ä̧nä̧ ca̧ca̧tö̧ rö̧ti̧nä̧tö̧ ttö̧ja̧mä̧ ja̧'hua̧ta̧'a̧nö̧ huahuina'a rȩjȩmä̧. ¹⁵ Ja̧'hua̧nö̧ ja̧'a̧nä̧ tto̧ȩcuä̧nä̧ päia'a Egipto ru̧hua̧ toomenämä ami iso'qui jacuänä jarodi'inö ja̧'hua̧ta̧'a̧nö̧ Moisésrö'inä, Aarónrö'inä ä̧ju̧cuo̧cö̧ pinö, ja̧'hua̧nö̧tä̧ jȩä̧cua̧ pä'ö TÖ̧Ä̧NÄ̧HUA̧ jiähuäjita'anö. ¹⁶ Ja̧u̧nu̧ o'ca'a Tu̧ru̧hua̧ Dios Moisésrö pä'inödo: Aarónrö pä'i: Cuitta'ca cujo te'ädö rȩjȩ cuä'i, isa̧ppȩttö̧ ra̧jö̧ pätti'a pä'ö Egipto rȩjȩ jä̧ttä̧yä̧jä̧ suhuädi'önä. ¹⁷ Tu̧ru̧hua̧ Dios hueäji ta'anö jȩpinä̧tö̧do. Aarón itta'ca 'chu'huädö öjo te'ädinödo. Rȩjȩ isa̧ppȩnä̧ cuä'inödo. Ja̧'hua̧nö̧ jȩo̧mȩnä̧, ra̧jö̧ a̧ttä̧di'inä̧tö̧do ttö̧ja̧rö̧'inä̧, ttä̧jimö̧rö̧'inä̧. Rȩjȩ isa̧ppȩ o'ca juiyönä ra̧jö̧ päi'ina'ado Egipto rȩjȩ jä̧ttä̧yä̧jä̧ suhuädi'önä. ¹⁸ Mä̧ri̧mö̧'i̧nä̧ ttumäri'anä ra̧ju̧ rättopönä jȩpi̧nä̧tö̧, ja̧'hua̧nö̧ jȩtta̧'a̧nä̧ rättepö juiyönä ji̧nä̧u̧, ttö̧ja̧nä̧'i̧nä̧, isotönä'inä, ka̧cui̧nä̧tö̧ ra̧jö̧mä̧. ¹⁹ Ma̧ri̧mö̧mä̧ Egipto ru̧hua̧rö̧ pä'inätö: "Pomä Dios ödo'che ja̧'a̧" ja̧'hua̧nö̧ pätta'anä Egipto ru̧hua̧ amiso'quimä 'quiyiona'a, ja̧'hua̧nö̧ jä̧cu̧ a̧ju̧cua̧tö̧mä̧ pä'ocö pinö TÖ̧Ä̧NÄ̧HUA̧ Dios päinäta'anö ji̧na̧'a̧ Egipto ru̧hua̧ jȩä̧cuȩmä̧. ²⁰ TÖ̧Ä̧NÄ̧HUA̧MÄ̧ Moisésrö pä'inö" Pä'ö mo̧ro̧ päia'a porächi'ö ja̧'hua̧ta̧'a̧nö̧ Egipto ru̧hua̧ ä'ca jo̧mȩ cu̧jä̧mä̧da̧jä̧ ja̧u̧ ajera̧'a̧cu̧ i̧'cho̧mȩnä̧ pä'irö TÖ̧Ä̧NÄ̧HUA̧MÄ̧ pä'ö "Chumöhuäyotö tti̧'cha̧'a̧nä̧ ja̧'a̧tä̧ topi ucuo tetähuattö." ²¹ Chumöhuäyotö tti̧'cha̧ pä'ö huecu juiyöttömä ucuru huȩdä̧cua̧sä̧ tä̧mö̧ na̧nö̧rö̧ 'teyu jö̧nä̧ cu̧mö̧huäyotörö'inä ja̧'hua̧ta̧'a̧nö̧ cuahuaruhuärö'inä juhua'atäcu cuoju odehuiyä jacuä'inä. Egipto ttö̧ja̧ ttoju odehuiyämä nanöttö̧ su'adi'ö 'teyu jä̧cua̧'a̧ ja̧'hua̧ta̧'a̧nö̧ jahuätö ttö̧ja̧cuo̧mȩ rȩjȩmä̧ o'cajuiyönätä̧ na̧nö̧ttö̧ 'teyö jä̧cua̧'a̧. ^{22 23} Ucu cumöhuäyotöttö Ttö chumöhuäyotörömä imicu̧nä̧nö̧ jö̧nä̧ ttö̧jö̧nä̧ jȩchä̧cua̧sä̧. Pi̧yȩ iso päi'önä ja̧'a̧ pä'ö ijȩcuä̧mä̧ yo̧ȩi ̧mo̧ro̧tä̧ topö cu̧huo̧juä̧cua̧jä̧ ²⁴ Ja̧'hua̧nö̧ ja̧'a̧ Tu̧ru̧hua̧ Diosmä jȩchä̧cua̧sä̧ päji ta'anö jȩpinö̧do, na̧nö̧ recuätörö 'teyu jö̧nä̧tä̧ jȩttö̧nä̧. Egipto rȩjȩ ru̧hua̧ ojusode jacuä'inä, umöhuäyotö ttoju odehuiyä jacuä'inä dodepinätödo. Egipto rȩjȩmä̧ surojuoächina'ado na̧nö̧ ttirecua'attö. ²⁵ Moisés'inä, Aarónrö'inä huopäji'ca Egipto ru̧hua̧mä̧ pä'inö: "Tätucui Cu̧ru̧huu̧ Diosrö i̧sa̧rö̧ ku icu iyähuä jȩpä̧tu̧cui̧ ujutu ti̧rȩjä̧ttö̧tä̧." ²⁶ Moisésmä pä'inö: Ujutu jȩta̧ pä'ömä ujuturumä adihuoca'a TÖ̧Ä̧NÄ̧HUA̧RÖ̧ i̧sa̧rö̧ ku icu iyähuä jȩtö̧mä̧ Egipto ttö̧ja̧rö̧mä̧ huahuö jä̧'i̧nö̧'a̧nö̧ jö̧ ja̧'a̧, ttä'ca jomettö i̧sa̧rö̧ ku iyähuä jȩtö̧ttö̧mä̧, Egipto ttö̧ja̧rö̧ huahuö jä̧'i̧nö̧'a̧nö̧ ja̧'a̧mä̧ ¿I̧nä̧dönä icuäumä tti̧cuo̧co̧u̧ täcuotöjä̧? ²⁷ Ja̧'hua̧nö̧mä̧cö̧ jȩta̧ pä'ömä huäbodäcuä mo̧ro̧ jo̧mȩnä̧ meje'canä ti̧'cha̧ pä'ö ja̧'a̧ ja̧u̧nu̧tä̧ TÖ̧Ä̧NÄ̧HUA̧RÖ̧ i̧sa̧rö̧ ku icu iyähuä tiya pä'ö, chutä ujuturu hueäjita'anötä̧. ²⁸ Egipto ru̧hua̧mä̧ pä'inö cui'chä̧tu̧cua̧ pä'ömä huedäcua̧sä̧ Cu̧ä̧nä̧hua̧ Diosrö meje'cattö ku icu iyähuä jȩ'cuȩtu̧cua̧ pä'ö ja̧'hua̧nö̧ ja̧'a̧nä̧ oto abomä 'cho̧co̧tö̧jä̧ ja̧'hua̧ta̧'a̧nö̧ ttö chutö'cä'inä jäcuepätucuaja. ²⁹ Moisés pä'inö cuä'ca jo̧mȩttö̧ rädochöttömä yabocutä jädepäcua̧sä̧ TÖ̧Ä̧NÄ̧HUA̧RÖ̧ na̧nö̧ 'teyunö ichätö ucuru tticuipa pä'ö, Egipto ru̧hua̧, cuuhuaruhuärö'inä, cumöhuäyotörö'inä yo̧i̧mo̧ro̧tä̧ ja̧'hua̧nö̧ ja̧'a̧nä̧ yapare jȩpö̧mä̧ jȩ'cua̧tö̧ pä'ömä juiya'a ucumä TÖ̧Ä̧NÄ̧HUA̧RÖ̧ i̧sa̧rö̧ ku icu iyähuä tiya pä'ö ujutu tahuaruhuärömä ttocuepa pä'ömä juiya'a. ³⁰ Egipto ru̧hua̧ ä'ca jomettö ru̧hua̧mä̧ rä'opächinö Moisésmä ja̧'hua̧ta̧'a̧nö̧ jä'epinö TÖ̧Ä̧NÄ̧HUA̧RÖ̧: ³¹ Moisés jäepäjita'anö jȩpi̧nö̧ TÖ̧Ä̧NÄ̧HUA̧MÄ̧ Egipto ru̧hua̧ttö̧ pporädö icuinö nanö 'teyunö jȩpä̧tö̧rö̧mä̧, ahuaruhuättö'inä umöhuäyotöttö'inä ya̧tȩ'i̧nä̧ ki̧'o̧cö̧ pi̧nö̧. ³² Ja̧'hua̧nö̧ ja̧'a̧nä̧ Egipto ru̧hua̧mä̧ ami iso'qui jarodö 'quiyönä jȩpi̧nö̧ ja̧'hua̧ta̧'a̧nö̧ ja̧u̧nö̧'i̧nä̧ ttö̧ja̧ tti̧'cha̧ pä'ömä hue'ocö pinö.