¹ Bezalelmä acacia dauttö ku icu ttiäre iyähuä ihuähuome aditinö. Öotomä ji̧mö̧tȩ jähuä ttu̧yu̧'ca̧ri̧ öoto jo̧mȩnä̧ ji̧na̧'a̧ ja̧'hua̧ta̧'a̧nö̧ käcuoräcumä̧ ji̧mö̧tȩ jähuä ttu̧yu̧'ca̧ri̧ öoto jo̧mȩnä̧ ji̧na̧'a̧-- yoräteunä̧tä̧ -- ju'tojucumä huäbodäcuä ttu̧yu̧'ca̧ri̧ öoto jo̧mȩnä̧ ji̧na̧'a̧. ² Ja̧u̧mä̧ aditinö̧ ä̧ja̧hui̧yä̧ o̧na̧mä̧ päcäyä ä̧ja̧ ona jä̧'i̧nö̧'a̧nö̧ jönä. Ä̧ja̧hui̧yä̧ o̧na̧mä̧ ku icu i̧yä̧huä̧huo̧ca̧cu̧ todeu̧nä̧ aditicuina'a, ja̧u̧mä̧ broncettö tu'epinö. ³ Ja̧u̧mä̧ ku icu ttiyomenä ttiyomenä tta̧di̧tä̧cuȩ o'cajuiyönä aditinömä ä̧ya̧ri̧ ttȩnä̧cuä̧ba̧'i̧nä̧, cacuocuäya'inä, o̧'ta̧hui̧yä̧'i̧nä̧ idepä juaocuä ocä'inä ja̧'hua̧ta̧'a̧nö̧ soähuä ocä'inä ji̧na̧'a̧. Pi̧yȩ o'cajuiyönämä broncettö̧ aditinö. ⁴ Ja̧u̧mä̧ ku icu iyähuo̧ca̧ i'esobänä kunähuä̧ ocä, broncettö i̧sä̧sa̧ i̧so̧ca̧ dȩa̧'a̧nä̧ ppättepa pä'ö, kä'co jubö päi'önä. ⁵ Ja̧u̧mä̧ broncettö aditäjäcä pa̧ja̧cuä̧nö̧ u̧yu̧'ca̧ri̧nä̧ i̧so̧'quȩ rä'ädö u̧nä̧cuȩ o̧bö̧mä̧ ȩtti̧nö̧. ⁶ Bezalelmä acacia dauttö o̧'qui̧yä̧ aditinö aditäji'ca̧mä̧ broncettö tu'epinö̧. ⁷ Jaumä ku icu i̧yä̧huo̧ca̧ jäyänä u̧nä̧ji̧ o̧bö̧nä̧ o̧'qui̧yä̧mä̧ rä'ädö ru̧ni̧nö̧ juo̧ca̧ ȩcuä̧ jö̧nä̧. Ja̧u̧mä̧ ku icu i̧yä̧huo̧ca̧ isodänä isäju 'tä̧'ȩpi̧nö̧. ⁸ Bezalelmä o̧'ta̧hui̧yä̧ bäreu brncettö 'quiyönä 'chu̧huä̧rö̧nä̧ aditinö. Ja̧u̧mä̧ aditinö i̧so̧'ta̧ tti'ä toäcuähuä odiyä nä̧tö̧ ttottäcuähua pä'ö doächi'äcuähuome aditätö ttiyäjittö. ⁹ Ja̧'hua̧ta̧'a̧nö̧ umi isarä'inä aditinö̧. Isarä ttu'ohue ja̧'a̧cu̧ tto'epö rö̧nä̧huä̧ta̧ lino pö̧jä̧ta̧ öotomä ciennö ttu̧yu̧'ca̧ri̧ öoto jo̧mȩnä̧ ji̧na̧'a̧. ¹⁰ Tto'epö rö̧nä̧huä̧ta̧ 'chu̧huä̧rö̧ o'camä veintenö o'ca jo̧mȩnä̧ ji̧na̧'a̧, ja̧u̧ o'ca 'chu̧huä̧ro̧mȩ broncettö adicuomemä veintenö jo̧mȩnä̧ ji̧na̧'a̧. O̧bö̧mä̧ icui'quiyunä todehuina̧'a̧ ja̧'hua̧ta̧'a̧nö̧ platattö adicuä o̧'qui̧yä̧'i̧nä̧. ¹¹ Ja̧'hua̧ta̧'a̧nö̧ ttu̧huo̧jua̧'a̧cu̧ tto'epö rö̧nä̧huä̧ o̧ta̧ öotomä ciennö ttu̧yu̧'ca̧ri̧ öoto jomȩnä̧ ji̧na̧'a̧, ja̧u̧ 'chu̧huä̧rö̧ o'camä veintenö̧ jo̧mȩnä̧, ja̧u̧ kada'camä broncettö adicua'a, ja̧u̧ o'canämä o̧bö̧ todeunä rö̧nä̧hui̧na̧'a̧ ja̧hua̧ta̧'a̧nö̧ o̧'qui̧yä̧mä̧ plata pättujueittö adicuina'a. ¹² kä̧hua̧ ma̧ä̧cha̧'a̧cu̧ tto'epö rö̧nä̧huä̧ o̧ta̧ öotomä cincuentanö ttu̧yu̧'ca̧ri̧ öoto jo̧mȩnä̧ ji̧na̧'a̧, 'chu̧huä̧rö̧ o'camä dieznö̧tä̧ ja̧'hua̧ta̧'a̧nö̧. O̧bö̧'i̧nä̧ icui'quiyunä 'chuä̧rä̧cuȩ o̧'qui̧yä̧'i̧nä̧ plata pättöjueittö adicuina'a. ¹³ Ja̧'hua̧ta̧'a̧nö̧ Isarä öotomä cincuentanö ttu̧yu̧'ca̧ri̧ öoto jo̧mȩnä̧ ji̧na̧'a̧ kä̧hua̧ räopa'accumä. ¹⁴ Doächäcuähua'acu tto'epö rö̧nä̧huä̧ o̧ta̧ öotomä cincuentanö ttu̧yu̧'ca̧ri̧ öoto jo̧mȩnä̧ ji̧na̧'a̧. Icui'quiyömä huäbo'cacuätä, ja̧u̧ o'ca 'chu̧huä̧ro̧mȩmä̧ huäbo'acuätä. ¹⁵ Kara'anä isarära̧'a̧cu̧ doächi'äcuähuomemä, ri̧na̧'a̧ tto'epö rö̧nä̧huä̧ta̧mä̧ quincenö ttu̧yu̧'ca̧ri̧ jo̧mȩnä̧ o̧tä̧ta̧, icui'quiyömä huäbo'cacuätä ja̧'hua̧ta̧'a̧nö̧ 'chu̧huä̧ro̧mȩmä̧ huäbo'acuätä. ¹⁶ O'ca juiyönä isarä soböcuächönä tto'epö rö̧nä̧huä̧ o̧ta̧mä̧ adihuäjuei linottö adicua'a ji̧na̧'a̧. ¹⁷ Icui'quiyu 'chu̧huä̧ro̧mȩmä̧ broncettö adicuina'a. O̧bö̧hui̧yä̧'i̧nä̧, o̧'qui̧yä̧'i̧nä̧ icui'quiyunä ttö̧nä̧cuȩmä̧ platattö adicuina̧'a̧. Icui'quiyumä plata pättöjueittö tuhuecuina̧'a̧ ja̧'hua̧ta̧'a̧nö̧ ja̧u̧tä̧ jäittö adicuina̧'a̧. O'cajuiyönä isaränä ttu̧ju̧nä̧cuȩmä̧ plata pättöjueittö tuhuecuina'a. ¹⁸ Isarära̧'a̧cu̧ doächi'äcuähuome rö̧nä̧huä̧ta̧ äotomä veintenö ttu̧yu̧'ca̧ri̧ öoto jo̧mȩnä̧ ji̧na̧'a̧, rö̧nä̧huä̧ta̧mä̧ ja̧'tu̧huä̧ta̧ttö̧'i̧nä̧, tädönä tu̧huä̧ta̧ttö̧'i̧nä̧, lino i̧sä̧ta̧ tu̧huä̧ta̧ttö̧'i̧nä̧, lino i̧sä̧ta̧ mȩtä̧huä̧ta̧ttö̧'i̧nä̧ ja̧u̧ o̧ta̧ öotomä veintenö̧ ttu̧yu̧'ca̧ri̧ öoto jo̧mȩnä̧ ji̧na̧'a̧. Öotomä veintenö ttu̧yu̧'ca̧ri̧ öoto jo̧mȩnä̧ otoinö, ja̧'hua̧ta̧'a̧nö̧ ju'tojucunä cinconö ttö̧yu̧'ca̧ri̧ öoto jo̧mȩnä̧ otoinö̧, isaränä ru̧nä̧huä̧ o̧ta̧ ju̧ta̧'a̧nö̧tä̧. ¹⁹ 'Chu̧huä̧ro̧mȩ broncettö adicuomemä pa̧ja̧cuä̧nö̧ jo̧mȩnä̧ ki̧na̧'a̧ ja̧'hua̧ta̧'a̧nö̧ o̧bö̧mä̧ platattö adicuinö. Huä̧mȩnä̧ huȩnä̧huä̧ o̧'qui̧yä̧mä̧, plata pättöjueittö adicuina'a. ²⁰ O'ca juiyönä icui'quiyu beö o'ca sa̧huȩcuä̧ Dios ö̧jo̧de tta̧di̧tä̧cuȩmä̧ ja̧'hua̧ta̧'a̧nö̧ isarämä broncettö adicuina'a. ²¹ Pi̧yȩ ja̧'a̧ Dios ö̧jo̧denä ka̧cuä̧cuȩ ji̧nö̧mä̧, Dios ö̧jo̧dettö jȩtta̧ pä'ö hueähui'inö̧mä̧, Moisésrö hueähui'inö̧ttö̧ ȩmö̧ jȩpi̧nä̧tö̧. Sacerdote Aarón i̧tti̧ Itamar huea'anä aditinä̧tö̧ Levis ahuaruhuä 'cotömä. ²² Juda ahuaruhuä 'cotöttö Hur i̧tti̧ Urim i̧tti̧ Besalelmä, o'cajuiyönä TÖ̧Ä̧NÄ̧HUA̧ Moisésrö hueinö jinö̧mä̧ jȩpi̧nö̧. ²³ Dan ahuaruhuä 'cotöttö ttö̧ja̧sa̧ Ahisamac i̧tti̧ Aholiabmä Besalelcu aditinö, 'co̧'ö̧'i̧nä̧, huo̧juȩcu̧nä̧'i̧nä̧ ja̧'hua̧ta̧'a̧nö̧ ja̧'tu̧huä̧ta̧nö̧ ja̧'tu̧huä̧ta̧'i̧nä̧ tädönä tu̧huä̧ta̧nä̧'i̧nä̧, tu̧huä̧ta̧nä̧'i̧nä̧ ja̧'hua̧ta̧'a̧nö̧ lino i̧sä̧ta̧ tä̧ta̧nä̧'i̧nä̧ a̧'cua̧tö̧ aditinö. ²⁴ Ttadita pä'ö ttamöcuädäjimä orottötä aditinä̧tö̧, ro̧ca̧'a̧ra̧'cu̧ todehuome'inä ja̧u̧ jueittötä adicuina'a-- ttiäre iyähuä ttiyäjittötä ja̧u̧ ö̧ä̧mȩcämä 29nö talento jo̧mȩnä̧ ja̧'hua̧ta̧'a̧nö̧ 730 siclo jo̧mȩnä̧ Dios ö̧jo̧dettö pa̧'a̧nö̧ tö̧'a̧ta̧jä̧ pä'ö ttu̧ju̧ni̧nö̧nä̧mä̧. ²⁵ Plata ttö̧ja̧ ttiyinö ö̧a̧mȩcämä ciennö talento jo̧mȩnä̧ ja̧'hua̧ta̧'a̧nö̧ 1,775 ciclo jo̧mȩnä̧ a̧mä̧qui̧na̧'a̧ Dios ö̧jo̧dettö pa̧'a̧nö̧ tö̧'a̧ta̧jä̧ pä'ö ttu̧ju̧ni̧nö̧nä̧mä̧, ja̧'hua̧nö̧ jo̧ca̧'a̧ jö̧ttö̧mä̧ ²⁶ ya'ute becá pättome jo̧mȩnä̧ ya̧cu̧nä̧mä̧, ja̧u̧mä̧ ya'ute ciclottö kä'co jo̧mȩ ji̧na̧'a̧, Dios ö̧jo̧dettö pa̧'a̧nö̧ tö̧'a̧ta̧jä̧ ciclomä pä'ö ttu̧ju̧ni̧nö̧nä̧mä̧. Pi̧yȩmä̧ u̧mä̧tö̧ 20nö̧ a̧'ȩ yabocu ku̧nä̧rä̧tö̧ 603,550 jo̧mȩnä̧ huotö o'catoi'önä ttö̧'a̧ti̧nä̧u̧ yotucunä ttiyinömä pa̧ja̧cuä̧chi̧na̧'a̧. ²⁷ Ciennö talento jo̧mȩnä̧ ȩtti̧nä̧tö̧ ro̧o̧ca̧ kada'ca 'chu̧huä̧rä̧cuȩmä̧ ja̧'hua̧ta̧'a̧nö̧ o̧ta̧ 'chu̧huä̧rä̧cuȩ o'camä, ciennö o'canämä ya'ute talento jo̧mȩnä̧ ȩttö̧ aditinätö̧. ²⁸ Plata 1,775co̧ttö̧ ka̧cui̧pä̧ji̧ siclottö, Besalelmä icui'quiyunä rä̧huä̧huȩ o̧bö̧'i̧nä̧ aditinö, huä̧mȩnä̧'i̧nä̧ ja̧u̧tä̧ jähuättö tu'epinö, ja̧u̧nä̧tä̧mä̧ o̧'qui̧yä̧ ppo̧ö̧'i̧nä̧ aditinö. ²⁹ Ttiäre iyähuä broncettö ttiyinö ö̧a̧mȩcämä setentanö talento jo̧mȩnä̧ a̧mä̧qui̧na̧'a̧ ja̧'hua̧ta̧'a̧nö̧ 2,400nö̧ siclos jo̧mȩnä̧ a̧mä̧qui̧na̧'a̧. ³⁰ Pi̧yȩttö̧mä̧ tottäcuähua pä'ö doächi'äcuähuome'inä, broncettö ku icu iyähuome'inä, broncettö adicuä ocä'inä, ku icu ihuähuomettö̧ tta̧di̧tä̧cuȩ'i̧nä̧ ja̧u̧ jahuättötä aditinö, ³¹ isaränä 'chu̧huä̧rä̧cuȩ'i̧nä̧, doächi'äcuähuome 'chu̧huä̧rä̧cuä̧huo̧mȩ'i̧nä̧, o'cajuiyönä Dios ö̧jo̧de 'chu̧huä̧rä̧cuȩ o'ca sa̧huȩcuä̧'i̧nä̧ ja̧'hua̧ta̧'a̧nö̧ o'cajuiyönä isarä soböcuächönä̧ ku̧nä̧huä̧cuȩ o'ca'inä, ja̧u̧ttö̧tä̧ aditinö.