¹ Ja̧'hua̧nö̧ ja̧'a̧ ttö̧ja̧mä̧ Moisés mö'ä'cara̧'a̧ttö̧ i̧mȩyȩhuo̧ca̧'a̧ recuó to̧'i̧yä̧u̧, jahuätömä 'chi̧nä̧tö̧ Aaroncu̧ ja̧'hua̧nö̧ 'chä̧nö̧ pättinäcu̧: "Ichi, a̧mo̧nä̧ tto̧ä̧nä̧hua̧'ca aditiyitö ujuturu ppä'ädö tä'canä o'ipatö. Moisés ji̧na̧'a̧ ujuturu rä'epinömä, ja̧u̧tä̧ ji̧na̧'a̧ ujuturu rä'epinämä Egipto rȩjȩra̧'a̧ttö̧, jerupätöjä tta̧'a̧nö̧ ki̧jä̧ päi'äjä'a ja̧ru̧mä̧. ² Ja̧'hua̧nö̧ pätiyäcu Aarón pä̧'i̧nä̧u̧: "Cuirecuatucuttu'inä cui̧tti̧mö̧ u̧mä̧tö̧ttö̧'i̧nä̧ cui̧tti̧mö̧ nä̧tö̧ttö̧'i̧nä̧ ttö̧nä̧rö̧ oro'o̧bu̧ 'cho'ipätucui ja̧'hua̧nö̧tä̧ iyätucuittö." ³ O'catoi'önä ttö̧ja̧ ttä̧ja̧nä̧ ttö̧nä̧rö̧ oro'o̧bö̧ jȩpä̧cuä̧u̧ i̧cui̧nä̧tö̧ ja̧'hua̧nä̧ jȩpö̧ iyinätö Aaronrö̧ iyinätö̧. ⁴ Ja̧u̧mä̧ ȩmi̧nö̧ jahuätö ttiäre oro, ku'icu isoya päi'omenä päcäyä i̧tti̧ a̧'u̧cuä̧ jo̧mȩ tómenä 'quiyächipina̧'a̧. Ja̧'hua̧nö̧ ja̧'a̧ topö ttö̧ja̧mä̧ pä'inättö̧, "Israél, pidetätó cuä̧nä̧hua̧tu̧cu̧ Egipto rȩjȩtö̧ rä'epö icuinömä ucuturu." ⁵ Aarón ja̧'hua̧nö̧ jȩtta̧'a̧ topö, aditinö i̧sa̧rö̧ ku ttiäre iyähuä'ca päcayä i̧tti̧ a̧'u̧cuä̧ ja̧'hui̧a̧nö̧ jȩpö̧ ttöjarö ji'ähuinö; Ja̧u̧ pä'inö: "Yo̧'ä̧i̧ mo̧ro̧ jä̧cua̧'a̧ pä'cari jȩtä̧cua̧'a̧mä̧ TU̧RU̧HUA̧RÖ̧ ucuotö." ⁶ Ttö̧'ja̧mä̧ koro mo̧ro̧ yo̧ä̧sa̧ ja̧i̧ poröchö ttiäre ku iyähuä iyö jȩpi̧nä̧tö̧ pi̧yȩ ja̧'a̧ esecu kä̧cuä̧hua̧mä̧ pä'ö. Ja'huanä jȩpö̧ ttu̧cuä̧cuä̧nö̧ aú esehuinätö̧, ja̧u̧nu̧ o'ca'a ko̧cuä̧mi̧nä̧tö̧ pä'cäri jitörötä pä̧huä̧ro̧jo̧mȩnä̧ jȩpö̧. ⁷ Ja̧'hua̧nö̧ ja̧'a̧ TTÖ̧Ä̧NÄ̧HUA̧ u̧cuo̧cui̧nö̧ Moiserö: "O'capäi'önä täí, cumuhuäyotö, Egipto rȩjȩra̧'a̧ttö̧ räcuepä̧u̧mä̧, surojötä jȩpö̧ ko̧cuä̧tö̧. ⁸ O'capäi'önä jaropi'ätö ja̧'a̧ pädinomettö̧'i̧nä̧ i̧mi̧cu̧nä̧tä̧ jȩpö̧ ko̧cuä̧tö̧. Päcayä i̧tti̧ a̧'u̧cuä̧ adittö ja̧u̧ru̧ ttiäre iyähuä i̧sa̧rö̧ ku iyó jȩpä̧tö̧. Pä'äjätö: "Israél, pidetätó cuä̧nä̧hua̧tu̧cu̧ Egipto rȩjȩtö̧ rä'epö icuinömä ucuturu." ⁹ Ja̧'hua̧nö̧ ja̧'a̧ TTÖ̧Ä̧NÄ̧HUA̧ pä'i̧nö̧ Moiserö: "Pitö ttö̧ja̧rö̧ topäjisä. Topitö, ttö̧ja̧mä̧ juiyó jarodätö ja̧'a̧. ¹⁰ Jitämä, jȩcu̧'ä̧ päcua pä'ö'inä juiya'a ucumä. Juiyó rö̧'ä̧nä̧ cha̧mi̧ suräcusä jahuätörö, Ja̧'hua̧nö̧ ja̧'a̧ttö̧ si'epötä chicuäcuotö. ¹¹ Ja̧'hua̧nö̧ ja̧'a̧nä̧ ucunä jȩchä̧cua̧sä̧ pi̧jä̧ ttö̧ja̧ ttu̧ru̧hua̧ jö̧nä̧," Ja̧'hua̧ ja̧'a̧ Moisemä TTÖ̧Ä̧NÄ̧HUA̧ Dios ö̧ro̧huä̧rö̧ juiyönä jȩ'a̧ pä'ö amucuädinö. Päinäcu̧: "CHÖ̧Ä̧NÄ̧HUA̧, ¿Tta̧'a̧nö̧ pä'ö cu̧mu̧huäyotörö cua̧mi̧surunä tocu'a'a jä̧ttö̧, ucutä jä̧'a̧ Egipto rȩjȩra̧'a̧ttö̧ cujurunä rä'epö icuäjimä. ¹² Egipto ttö̧ja̧mä̧ pättö'anö ja̧'a̧: Ja̧u̧mä̧ rä'epö i̧cui̧nä̧u̧ ä'cuoyäu, möä'quiyura̧'a̧ttö̧ cuä'ö icuatö pä'ö jja̧hua̧nö̧ jȩpö̧ pi̧jä̧ttö̧ si'epö icuatö pä'ö? Juijomä cu̧rä̧huä̧rä̧ ucutä cu̧mu̧huäyotö ja̧'a̧ ro̧'ȩpö̧mä̧ ro̧cuȩpä̧tö̧. ¹³ Amucuädi Abrahamrö̧, Isaac'rö ja̧'hua̧ta̧'a̧nö̧ Israel ttö̧ja̧, cu̧mu̧huäyotö, ucutä jȩchä̧cua̧sä̧ ucuturu päcua'ttö pä'inö̧jä̧ ja'huätörö: 'Ucu cuahuaruhuärö o'cotöttö jȩchä̧cua̧sä̧ mo̧ro̧jä̧ si̧ri̧'cö̧ jö̧ta̧'a̧nä̧ ttirecuächönä, ja̧'hua̧nö̧tä̧ chi̧yä̧cua̧jä̧ cuahuaruhuä o'cotöttö pi̧jä̧ o'cajuiyönä padäjita'anö. Jahuätö tti̧rȩjä̧ jä̧cua̧'a̧ 'cuäopönätä̧."' ¹⁴ Ja̧'hua̧nö̧ jo̧mȩnö̧ TÖ̧Ä̧NÄ̧HUA̧MÄ̧ ro̧'ȩpo̧'cö̧ pi̧nö̧ u̧mu̧huäyotörö ro̧'ȩpa̧ päjimä. ¹⁵ Ja̧'hua̧nö̧ ja̧'a̧ Moisés pä'aji ta'anö möä'cara̧'a̧ttö̧ mȩyȩhui̧nö̧, U̧mu̧nä̧ i̧nä̧ obi tobire jȩ'tä̧cuä̧ pä'inö huȩyu̧cua̧'a̧ 'chu̧'ä̧rä̧nö̧. Ja̧u̧ odä todäremä huȩyu̧cui̧na̧'a̧ pätecua'acu, ä'canä'inä aboja̧'a̧nä̧'i̧nä̧. ¹⁶ Jua̧u̧ dau odämä chutä Dios aditähuä odä ji̧na̧'a̧, huȩyu̧cuä̧'i̧nä̧ chutä Dios i̧huȩyu̧tu̧ ji̧na̧'a̧, juodänä 'chu'ädö ku̧nä̧hua̧'a̧. ¹⁷ Ja̧'hua̧nö̧ ja̧'a̧ Josué ttö̧ja̧ huottä'a ä̧ju̧cu̧, Moisérö pä'inö: "Ä'ö ttöjometömä rohuäu pä̧'i̧cu̧nä̧ huopätö." ¹⁸ Ja̧'hua̧nö̧ päiyäcu Moisés päinäcu̧: Iso juo'epömä juottöca'a jua'amä ja̧'hua̧ta̧'a̧nö̧ rohuäu tti̧cuä̧u̧'i̧nä̧ huottoca'a, ja̧hua̧nö̧ jo̧ca̧'a̧ ra̧'ö̧ eseu huotta'atä ä̧ju̧cu̧sä̧." ¹⁹ Ja̧'hua̧nö̧ ja̧'a̧ Moisésmä ä'ö ttö̧ja̧cuo̧mȩ tö'cö 'chä̧hui̧'ö̧mä̧ päcäyä i̧tti̧ a̧'cua̧juä̧ adicua'atä ja̧'hua̧ta̧'a̧nö̧ ttö̧ja̧'i̧nä̧ tötta'atä topinö. Ja̧u̧mä̧ juiyo ra̧huä̧ri̧pi̧nö̧. ²⁰ U̧mö̧nä̧ 'chu̧huä̧rö̧ obi icuomenä möä'ca kada'camä dörächipö pperecuächötä maina'a. Päcäyä i̧tti̧ ttö̧ja̧ ttäditäjäcurö ȩmo̧po̧'ö̧ i̧sa̧ppȩ päi'önä ku icuäji'ca̧ ajiyanä 'cuȩ'ȩpi̧nö̧. Ja̧'hua̧nö̧ jȩä̧ja̧'a̧ Israel ttö̧ja̧mä̧ ttahuönä jȩi̧nä̧u̧. ²¹ Ja̧'hua̧nö̧ jä̧ji̧ o'ca'a Moisésmä Aarónrö jä'epö ä̧ju̧cui̧nö̧: ¿Däje jȩttä̧cu̧ttö̧ jitöja ttö̧ja̧mä̧, rö̧ä̧nä̧ jahuätö surojö jȩttö̧nä̧ cui'cächönä̧mä̧? ²² Aarónmä ädätinö: Chö̧ä̧nä̧hua̧ juiyo rö̧ä̧nä̧mä̧ cu̧ra̧huä̧rä̧tö̧. Ucumä huo̧jua̧jä̧ pitö ttö̧ja̧rö̧mä̧ ja̧'hua̧ta̧'a̧nö̧ surojö jȩtta̧ pä'ömä jo̧mȩnö̧tä̧ amöcuädö ku̧nä̧jä̧tö̧. ²³ Jahuätömä pättäjäcusä: Tö̧ä̧nä̧hua̧ ujutu tä'canä 'chä̧nö̧ oipä̧cua̧rö̧ aditiyitö, pide Moisés pinömä̧, Egipto rȩjȩttö̧ rä'epö icuinö pinömä̧, däje 'cuäopäjäcucö̧. ²⁴ Ja̧'hua̧nö̧ pättiyäcu pä̧dä̧jä̧u̧: ya̧tȩ oro ku̧nö̧rö̧mä̧ 'cho'ipätucuirö, jahuätömä oromä ttiyäjäcusä, ttiyäjäcu ocuränä chicuomenä, pide päcäyä i̧tti̧mä̧ rä'o'äji. ²⁵ Moisésmä topinö ttö̧ja̧mä̧ ka̧mä̧dä̧cuä̧cuä̧ jui̧yonä jo'tä'a, Aarón päi'nö jarodähuäcuärä̧'a̧ juotächiyäcu ja̧'a̧tä̧ topinö ja'huatö 'taboiyorö yä̧tä̧hua̧'chä̧'a̧nä̧mä̧. ²⁶ Ja̧'hua̧nö̧ ja̧'a̧ Moisés cä̧mä̧di̧nö̧ tä̧'äbäriyä do'ächäcuähuomä ä'ca'a, Ja̧'hua̧'a̧nö̧ päi'nö: O'catoi'önä TÖ̧Ä̧NÄ̧HUA̧ ippeyänä 'cä̧huä̧tö̧mä̧ ttöcu ichätucui, Levita ttö̧ja̧ O'catoi'önätä ippeyänä ka̧tö̧mä̧'ca̧'ca̧hui̧pi̧nä̧tö̧. ²⁷ Ja̧'hua̧'a̧nö̧ ja̧'a̧ pä'äji: Israel ttö̧ja̧ TÖ̧Ä̧NÄ̧HUA̧MÄ Dios-mä, pä̧'ä̧nö̧ pä'äji: yä̧'ö̧cu̧punä cucurä'chuö 'cho'äjui'ö tätucui do'ächäcuähuome tä'äbäriyä̧nä̧pu̧nä̧ Ja̧'hua̧'a̧nö̧ ja̧'a̧tö̧ cuäi'icui hui̧ja̧ cuä̧rö̧i̧'nä̧ ja̧u̧cu̧ ko̧rö̧i̧'nä̧ ja̧'hua̧ta̧'a̧nö̧ ippeyänä ka̧cuä̧tö̧rö̧'i̧nä̧." ²⁸ Moisés pä'ö u̧ju̧nä̧ji̧ ja̧i̧ jȩpi̧nä̧tö̧ Levita ttö̧ja̧mä̧. ja̧u̧ mo̧ro̧mä̧ tres mil ttö'cohuächi'önä huotö 'koröhuo'ächinätö. ²⁹ Ja̧'hua̧'a̧nö̧ ja̧'a̧ Moisesmä päi'nö levitarö: "Ucutumä jitä mo̧ro̧mä̧ TÖ̧Ä̧NÄ̧HUA̧ aditähuänä cuäditätucuä pä'ö, i̧yi̧nä̧ u̧juä̧ ȩminätöjä cuäditätucuä pä'ö toija'a̧cu̧ cui̧ti̧mu̧rö̧'i̧nä̧ ja̧'hua̧ta̧'a̧nö̧ cuähuäruhuäröi'nä, juo̧'u̧mä̧ TÖ̧Ä̧NÄ̧HUA̧TÄ̧ iyäcuäucuä 'a ppädä̧'a̧cua̧u̧ju̧ jitä mo̧ro̧mä̧. ³⁰ Ja̧u̧nu̧ o'ca mo̧ro̧ Moisés päinö ttö̧ja̧rö̧: "Ucutumä juiyó suronä jȩpä̧ttö̧jä̧. Jitämä 'cha̧dä̧chä̧cua̧sä̧ TÖ̧Ä̧NÄ̧HUA̧ ö̧jo̧mȩcu̧. Tochipäcua̧sä̧ ucutu suronä jȩcu'ä̧jä̧tu̧cu̧ esecu'icuaja pä'ötä" ³¹ TÖ̧A̧NÄ̧HUA̧ ö̧jo̧mȩcu̧ pa̧ja̧chö̧ Moisés pä'inö: "Isó, pitö ttö̧ja̧hué isopä'iönä̧tä̧ juiyó suronä̧tä̧ jȩpä̧jä̧tö̧ a̧mo̧nä̧ ttö̧ä̧nä̧hua̧rö̧ orottö aditö ucuo teäu. ³² Jitämä adihua'a, rȩrö̧jö̧nä̧ topitö suronä jȩttä̧ji̧mä; ja̧'hua̧'a̧nö̧ jȩcu'o̧ca̧'a̧jö̧ttö̧mä̧, cuiäre cuyäru'tänä cui̧huȩyu̧tti̧nomettö räepu icuittö. ³³ TÖ̧Ä̧NÄ̧HUA̧ ädätinö Moisérö: "Ya̧tȩ ttö chä'ca jo̧mȩttö̧ suronä jȩpö̧mä̧, ja̧u̧ ttö̧ja̧sa̧mä̧ chiäre cuyäru'tättö si'epö i̧cuä̧huä̧cua̧. ³⁴ Ja̧'hua̧nö̧ ja̧'a̧ttö̧ jittätä kä̧hui̧, chu̧mu̧huäyotötö o'ipi ucuru jidähui̧no̧mȩ jubu. Topi, ttö chu̧mu̧huä̧ya̧ isoppa hua̧ ucu cuä'canä i̧'chä̧cua̧. Ja̧'hua̧nö̧ ja̧'a̧nä̧ ro̧dȩpö̧ mo̧ro̧ pätecuächomenämä, suronä jȩttö̧ micuätä ro̧dȩpä̧cua̧sä̧." ³⁵ Ja̧'hua̧nä̧ ja̧'a̧ttö̧ TÖ̧Ä̧NÄ̧HUA̧ hue'inö märichei ja'huätö ttö̧ja̧rö̧ päcayä i̧tti̧ a̧'u̧cua̧ tätähuä'ca esetinätö̧rö̧, Aarón aditö iyinä'ca.