¹ Dios ö̧jo̧de cuaditajá tto̧ȩcuä̧ta̧ adihuäjuäi linottö adicuä̧ta̧mä̧ dieznö o̧ta̧ jo̧mȩnä̧, ja̧'tu̧huä̧ta̧'i̧nä̧, tädönä tu̧huä̧ta̧'i̧nä̧, ja̧'hua̧ta̧'a̧nö̧ tu̧huä̧ta̧'i̧nä̧ querubin pä̧ttä̧u̧ tta̧'cua̧juä̧ ku̧nö̧. Pi̧yȩ adicuämä huo̧juȩcu̧nä̧ hua̧ aditäcuä̧ ja̧'a̧. ² Pi̧yȩ o̧ta̧ öotomä 28nö ttu̧yu̧'ca̧ri̧ pa̧ja̧cuo̧mȩ jo̧mȩnä̧, o'cajuiyönä tto̧ȩcuä̧ o̧ta̧mä̧ koro o̧ta̧ jö̧ta̧'a̧nö̧ yorätehuina'a. ³ Jimötenö o̧ta̧ koro o̧ta̧cu̧ todeunä kö̧nä̧, ja̧'hua̧ta̧'a̧nö̧ koro o̧ta̧'i̧nä̧ koro o̧ta̧cu̧ todehuina'a. ⁴ Ä̧cuo̧mȩnä̧ i̧sä̧ta̧ jäyä beipome huä̧mȩnä̧mä̧ ojuhui̧yänä̧ rö̧nä̧'chi̧ ja̧'tu̧huä̧ta̧ttö̧. Ja̧'hua̧ta̧nö̧tä̧ rö̧nä̧'chö̧ jȩpi̧ ko̧ro̧ta̧ röji isä̧ta̧nä̧'inä̧. ⁵ Ä̧cuo̧mȩnä̧ i̧sä̧ta̧nä̧mä̧ cincuentanö jo̧mȩnä̧ o̧ta̧ttö̧ nö̧'cä̧rö̧ cuaditajá ja̧'hua̧ta̧'a̧nö̧ röjinä rä̧ta̧'i̧nä̧ cincuentanö jo̧mȩnä̧ o̧ta̧nä̧ nö̧'cä̧rö̧ cuaditajá, pi̧yȩmä̧ jȩ'cua̧jä̧ pä̧tȩcuä̧nö̧ rö̧jä̧mö̧nä̧. ⁶ Cincuentanö o̧bö̧ orottö ȩttö̧ icu cuaditajá koro o̧ta̧cu̧ todeunä, Dios ö̧jo̧memä yoräteunä̧tä̧ ki̧'ä̧cua̧'a̧nö̧. ⁷ Cabra uhuo'chettö isode huäme tto̧ȩcuä̧ta̧ 'cua̧rö̧nä̧ jä̧ta̧ cuaditajá Dios ö̧jo̧de huä̧mȩnä̧mä̧. Tto̧ȩcuä̧ o̧ta̧mä̧ oncenö o̧ta̧ jo̧mȩnä̧ cuaditajá. ⁸ Ji̧ta̧cu̧nä̧ tto̧ȩcuä̧ o̧ta̧ öotomä̧ 30nö ttu̧yu̧'ca̧ri̧ jo̧mȩnä̧ ji̧na̧'a̧ ja̧'hua̧ta̧'a̧nö̧ kä̧cuo̧rä̧ta̧cu̧mä̧ pa̧ja̧cuä̧nö̧ ttu̧yu̧'ca̧ri̧ jo̧mȩnä̧ jä̧cua̧'a̧. Ja̧u̧ oncenö o̧ta̧ ji̧ta̧cu̧ pö̧nä̧mä̧ yorätehuä̧cuä̧. ⁹ Ji̧mö̧tȩnö̧ o̧ta̧mä̧ ko̧ro̧ta̧cu̧ todeunä jȩ'cua̧jä̧ ja̧'hua̧ta̧'a̧nö̧ koro o̧ta̧ seisnö o̧ta̧nä̧'i̧nä̧. Seisnö̧ i̧sä̧ta̧mä isode ä'ca jo̧mȩ to̧rä̧dö̧ cu̧na̧jä̧. ¹⁰ Ä̧cuo̧mȩnä̧ rö̧jö̧ o̧ta̧nä̧mä̧ cincuentanö nö'cähuä appiyä cu̧na̧jä̧, ja̧'hua̧ta̧'a̧nö̧ ttoecuä o̧ta̧ korota̧cu̧ boecuächome beipomemä cincuentanö appiyä cu̧na̧jä̧. ¹¹ Broncettö̧ cincuentanö o̧bö̧ cuaditajä ja̧'hua̧ta̧'a̧nö̧ ko̧ro̧ta̧cu̧ jäbechächönä ittähuä appiyämä. O'cajuiyönä o̧ta̧mä̧ ji̧nä̧ ji̧ta̧tȩtä̧ päi'önä todehuächi'önä. ¹² Ttoecuä o̧ta̧ttö̧ ka̧cui̧pä̧ji̧mä̧, pa̧'a̧nö̧ pä'ö pähuä, isode beipome 'cuäo'önä ka̧cui̧pö̧mä̧ Dios ö̧jo̧de aboja'acu ti̧ttä̧da̧ pä'ö ja̧'a̧. ¹³ Ya'ute ttu̧yu̧'ca̧ri̧ jo̧mȩnä̧ ka̧ pä'ö ja̧'a̧ ya'utenämä ja̧'hua̧ta̧'a̧nö̧ kara'anä'inä ya'ute ttu̧yu̧'ca̧ri̧ jo̧mȩnä̧ ki̧na̧'a̧-- isode ttoecuä o̧ta̧ttö̧ otoö ka̧cui̧pä̧ji̧ o̧ta̧mä̧ ö̧jo̧de pätecu a̧ttä̧chi̧'ö̧nä̧ tti̧cuä̧da̧ pä'ö ja̧'a̧. ¹⁴ Dios ö̧jo̧de huä̧mȩnä̧ tto̧ȩcuä̧ta̧mä̧ oveja ubo i̧jȩta̧ tuhuönä 'cucuetö cuaditajá ja̧'hua̧ta̧'a̧nö̧ tä̧ö̧nä̧ jä̧ta̧mä̧ ko̧ro̧ta̧ dȩa̧'a̧nä̧ cu̧huȩna̧ja̧. ¹⁵ Dios ö̧jo̧demä äpate ä'ca jueönä ku̧nä̧huodämä acacia dauttö cuaditajá. ¹⁶ 'Chu̧huä̧rä̧cuȩ o̧'quȩ öotomä 10nö ttu̧yu̧'ca̧ri̧ jo̧mȩnä̧ jä̧cua̧'a̧ ja̧'hua̧ta̧'a̧nö̧ öcähuemä ya'ute ttu̧yu̧ca̧ri̧ kä'co jo̧mȩ ji̧na̧'a̧. ¹⁷ Dau isode korodä korodäcu rarecuomȩmä̧ ta̧ri̧rȩnä̧ pȩcuo̧pa̧ja̧. O'cajuiyönä isodemä pa̧'a̧nö̧tä̧ cuaditaja. ¹⁸ Dios ö̧jo̧de cuaditätucuomenämä, cu'ohuetucunä ja̧'a̧cu̧mä̧ veintenö odiyä jo̧mȩnä̧ ku̧ju̧na̧jä̧. ¹⁹ Veintenö 'chu̧huä̧rö̧ o'ca dȩa̧'a̧nä̧ kada'ca 'chu̧huä̧ro̧mȩmä̧ platattö cuarentanö jo̧mȩnä̧ cuaditajá. Ä̧cuo̧mȩnä̧ 'chu̧huä̧rä̧'ca̧ dȩa̧'a̧mä̧ todäre kada'ca 'chu̧huä̧ro̧mȩ ka̧ pä'ö ja'a ja̧u̧ ppä̧ȩpä̧rö̧nä̧ 'chu̧huä̧rä̧cuo̧mȩmä̧. ²⁰ Ja̧'hua̧ta̧'a̧nö̧ TÖ̧Ä̧NÄ̧HUA̧ ö̧jo̧de pätecua'anä̧, kä̧hua̧ räopa'akuttömä̧ ttieruhua'acunä̧ dau odiyämä̧ veintenä̧ jo̧mȩnä̧ jȩ'cua̧jä̧; ²¹ Kada'ca 'chu̧ä̧rö̧mä̧ cuarentanö̧ jo̧mȩnä̧ plata pättö jähuänä̧ jȩ'cua̧jä̧, ji̧yȩte dau isodänä̧mä̧, 'chu̧ä̧rö̧mä̧ todäre jo̧mȩnä̧ ka̧cu̧nä̧, ja̧'hua̧a̧nö̧ yabocu'inä. ²² Dios ö̧jo̧de kä̧hua̧ räopa'acunämä 'chu̧huä̧rä̧cuȩmä̧ seisnö o'ca cuaditö'anö ja̧'a̧. ²³ Dios ö̧jo̧de ä'cacuttu u̧yu̧'ca̧ri̧nä̧cu̧mä̧ to'care cu̧ju̧na̧ pä'ö ja̧'a̧, ²⁴ ja̧u̧ ttoecuä odiyämä dea'anä̧ttö̧ rä̧cä̧yä̧nö̧ kö̧'a̧nö̧ ja̧'a̧, ja̧'hua̧nö̧ ka̧'a̧nä̧ huämenä jähuäcu todeunä ji̧yȩtä̧ o̧bö̧nä̧ 'chu̧huä̧rö̧nä̧. Ja̧'hua̧nö̧tä̧ jȩ'cua̧jä̧ ä'cacunä ka̧cu̧ u̧yu̧'ca̧ri̧nä̧'i̧nä̧. ²⁵ 'Chu̧huä̧rö̧ odiyämä ochonö jo̧mȩnä̧ aditi, rȩjȩnä̧ 'chu̧huä̧rä̧cuȩ platattö adicuäcu todeunä. O'cajuiyönä rȩjȩnä̧ 'chu̧huä̧rö̧mä 16nö jo̧mȩnä̧ jä̧cua̧'a̧, ä̧cuo̧mȩnä̧ 'chu̧huä̧ro̧mȩ dȩa̧'a̧nä̧'i̧nä̧, juhua'a yabonä 'chu̧huä̧rö̧ dȩa̧'a̧nä̧'i̧nä̧ ja̧'hua̧nö̧tä̧ koro 'chu̧huä̧rö̧'i̧nä̧. ²⁶ Acacia dauttö käcuorä odiyä cuaditätucuajä, ²⁷ Dios ö̧jo̧de pätecua'anä cu̧ju̧nä̧cuä̧mä̧ cinconö̧ odiyätä, cinconö jo̧mȩnä̧ käcuorä odiyä kä̧cua̧'a̧ Dios ö̧jo̧dettö kä̧hua̧ räopa'acunättömä, ja̧'hua̧ta̧'a̧nö̧ cinconö jo̧mȩnä̧ käcuorä odiyä kä̧cua̧'a̧ Dios ö̧jo̧dettö kä̧hua̧ ma̧ä̧cha̧'a̧cu̧ttömä. ²⁸ Käcuorä odiyä kä'co päte'ö 'chu̧huä̧rö̧cuä̧mä̧ ja̧'hua̧nö̧ pä'ömä kä'codäbötä, kara'anä beipome'inä pa̧ja̧cuä̧chö̧nä̧. ²⁹ Ttoecuä odiyämä orottö tucuepätucuaja. O̧bö̧mä̧ orottö cuaditätucuajá, ja̧u̧ o̧bö̧mä̧ käcuorä odiyä 'chu̧huä̧rö̧ jä̧cua̧'a̧ ja̧'hua̧ta̧'a̧nö̧ odiyämä orottö a̧tto̧pö̧ icuähuäcua'a, ³⁰ Dios ö̧jo̧denä möä'cara̧'a̧ttö̧ jiäcuähuinöta'anötä jȩ'cuä̧tu̧cua̧jä̧. ³¹ I̧sa̧ i̧jȩta̧ ja̧'tu̧huä̧ta̧ttö̧'i̧nä̧ tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧ tto̧ȩcuä̧ta̧mä̧ cuaditätucuaja, querubin tta̧'cua̧juȩ ku̧nä̧, pi̧yȩ adicuämä ya̧tȩ huo̧juö̧nä̧ hua̧tä̧ a̧di̧tä̧cuä̧. ³² Pa̧ja̧cuä̧nö̧ o'ca oro tuhuecuä o'canä ti̧'ä̧dö̧ cu̧nä̧tu̧cua̧ pä'ö ja̧'a̧. Pi̧yȩ o'canämä ppa̧ja̧cuä̧nö̧ oro o̧bö̧'i̧nä̧ ka̧'a̧nä̧ 'chu̧huä̧ro̧mȩ platattö adicuomemä pa̧ja̧cuä̧nö̧ jo̧mȩnä̧ kä̧cua̧'a̧. ³³ O̧bö̧hui̧yä̧ dȩa̧'a̧nä̧ ttoecuä̧ta̧mä̧ ttö̧na̧ pä'ö ja̧'a̧ ja̧'hua̧ta̧'a̧nö̧ hueähuä hȩnȩ ȩco̧ca̧'i̧nä̧ cui'cächätucuaja. Tto̧ȩcuä̧ta̧mä̧ ro̧o̧ca̧ttö̧, rö̧ä̧nä̧ ro̧ca̧mä̧ 'cä̧ȩcuä̧chö̧nä̧ kä'co rö̧nä̧hua̧cua̧'a̧. ³⁴ Hueähuä huȩnȩ ȩco̧ca̧ rö̧ä̧nä̧ ro̧o̧mȩ ko̧ca̧ mö̧ȩcuäbimä mö̧cuȩpä̧tu̧cua̧ja̧. Tto̧ȩcuä̧ta̧ttö̧ umicu̧nä̧mä̧ ttu̧cuȩ rötähuodä ku̧ju̧nä̧tu̧cua̧ja̧. ³⁵ Cuoö käcämä ttu̧cuȩ ku̧nä̧huodä aboja'acu, Dios ö̧jo̧dettömä ttu'ohuecunä. Ttu̧cuȩ rutähuodämä ttu̧huo̧jua̧'a̧cu̧nä̧ ka̧ pä'ö ja̧'a̧. ³⁶ Isodecu doächi'äcuähuome i̧sä̧ta̧ aditi'ipö ku̧nä̧tu̧cua̧ja̧. Ja̧huä̧ta̧mä̧ ja̧'tu̧huä̧ta̧ttö̧'i̧nä̧ tädönä tu̧huä̧ta̧ttö̧'i̧nä̧ ja̧'hua̧ta̧'a̧nö̧ tu̧huä̧ta̧ttö̧'i̧nä̧ juhua'atäcu Lino adihuä juei i̧sä̧ta̧ a̧'cua̧tä̧cuä̧huä̧ta̧ttö̧'i̧nä̧ adicuäcua'a, ja̧huä̧ta̧ a̧di̧tä̧cua̧mä̧ ja̧u̧ juei adicuä isa̧ jä̧cua̧'a̧. ³⁷ Ja̧u̧ o̧ta̧ ttu̧na̧ pä'ömä acacia dauttö cinconö o'ca orottö tuhuecuä o'ca ttadita pä'ö jä̧cua̧'a̧. O̧bö̧'i̧nä̧ oro jähuätä jä̧cua̧'a̧ ja̧'hua̧ta̧'a̧nö̧ ja̧u̧ kä̧cuo̧mȩmä̧ bro̧ncȩttö̧ ku icu adicuäcua'a ja̧u̧ ttu̧ju̧na̧ pä'ömä.