¹ Ja̧u̧nu̧ o'ca'a TÖ̧Ä̧NÄ̧HUA̧MÄ̧, Moisésrö pä'inö: "Chö̧ja̧'a̧cu̧ 'cha'achi, Ucu'inä, Aarón'inä, Nadab'inä, Abiú'inä, ja̧'hua̧ta̧'a̧nö̧ Israel ttö̧ja̧ tturuhuotö ttä̧mö̧ setentanö huotucu juhua'atä otonänö kä̧nö̧ ucuo tecuähuätucuattö̧jä̧. ² Suro Moiséstä jä̧cua̧'a̧ chö̧ja̧'a̧cu̧ tö'cönä̧nö̧ päi'ö̧cua̧mä̧. Korotömä chö̧jo̧mȩcu̧mä̧ ttötö'cöhuächi'a pä'ömä jo̧ca̧'a̧, ja̧'hua̧ta̧'a̧nö̧ ttö̧ja̧'i̧nä̧ ja̧u̧cu̧mä̧ 'cha'achocotö ttäcuotö. ³ Moisésmä 'chä̧hui̧'ö̧ ttö̧ja̧rö̧ o'cajuiyönä TÖ̧Ä̧NÄ̧HUA̧ i̧huȩnȩ'i̧nä̧, päji huȩnȩ'i̧nä̧ ji'ähuinö. Ttö̧ja̧ o'catoi'önä ji̧nä̧ yo̧mȩtȩnä̧ huopö ädätinä̧tö̧: "Ujutumä jȩtä̧cuo̧tö̧jä̧ o'cajuiyönä TÖ̧Ä̧NÄ̧HUA̧ i̧huȩnȩ'i̧nä̧ ja̧'hua̧ta̧'a̧nö̧ päji'inä̧ ." ⁴ Ja̧'hua̧nö̧ ja̧'a̧ Moisésmä TÖ̧Ä̧NÄ̧HUA̧ i̧huȩnȩmä̧ o'cajuiyönä̧tä̧ huȩyu̧ti̧nö̧. Pä'ötä mo̧ro̧ päia'a, Moisésmä möä'ca kada'ca i̧a̧sa̧rö̧ ku icu iyähuome aditinö ja̧'hua̧nö̧ jȩpö̧ docenö ido'qui'inä aditö ku̧ni̧nö̧, ja̧u̧ inä o'quimä huȩnȩcuä̧chi̧na̧'a̧ israel ttö̧ja̧ docenö huotörö. ⁵ Ja̧u̧mä̧ Israel ttö̧ja̧ mö̧ä̧yotöttö yotuterö hue'inö ttiäre ku icu ttiya pä'ö, ja̧'hua̧nö̧ ja̧'a̧ttö̧ ttöäre iyähuä iyinä̧tö̧ pä̧cä̧yu̧rö̧ TÖ̧Ä̧NÄ̧HUA̧RÖ̧. ⁶ Moisésmä ttucuoja ju'toyattä ca̧ca̧tä̧ji̧'ca̧ o̧'ta̧hui̧yä̧nä̧ dachö ku̧ni̧nö̧; juhuoyatä ju'toyamä ku icu iyähuome riripinö. ⁷ Ja̧u̧mä̧ esecuinö cuyäru'tä ȩmo̧po̧'ö̧ pä̧i̧cu̧nä̧ ttö̧ja̧ ttä'ca jo̧mȩttö̧ ucuocuinö. Jahuätömä pä'inä̧tö̧: "Ujutumä jȩtä̧cuo̧tö̧jä̧ o'cajuiyönä TÖ̧Ä̧NÄ̧HUA̧ ucuocuäjimä. Ujutumä isopäi'önä tucuotäcuotöjä̧". ⁸ Ja̧u̧nu̧ o'ca'a Moisésmä ca̧ca̧ti̧nö̧ isotö ttucuoja ja̧'hua̧nö̧ ja̧'a̧ ttö̧ja̧rö̧ riripinö, ja̧u̧mä̧ pä'inö: poya ttucuojanä ucuturu esecuinö TÖ̧Ä̧NÄ̧HUA̧MÄ̧, pi̧yȩ jȩä̧cuä̧ iyinömä o'cajuiyönä ucuocuinötä̧ ja̧'a̧. ⁹ Ja̧u̧nu̧ o'ca Moisés'inä Aarón'inä, Nadab'inä, Abiú'inä ja̧'hua̧ta̧'a̧nö̧ setentanö̧ huotö Israel ttö̧ja̧ tturuhuotömä möä'cara̧'a̧cu̧ 'cha'achinä̧tö̧. ¹⁰ Jahuätömä topinä̧tö̧ Israel ttö̧ja̧ TTÖ̧Ä̧NÄ̧HUA̧RÖ̧. Ttö̧jä̧pö̧ ttö̧jä̧dä̧ro̧mȩmä̧ zafiro ido'quittö rutähua'a jä̧'i̧nö̧'a̧nö̧ ji̧na̧'a̧. Adiu saruhuina̧'a̧ mo̧ro̧jä̧ jö̧ ta'anö. ¹¹ Diosmä ra̧huä̧ro̧cö̧ pinö Israel ttö̧ja̧ tturuhuotörömä, jahuätömä Diosrö topinä̧tö̧ ja̧'hua̧ta̧'a̧nö̧ cuä̧nö̧'i̧nä̧ cuinä̧tö̧, au'inä ahuinä̧tö̧. ¹² TÖ̧Ä̧NÄ̧HUA̧MÄ̧, Moisésrö pä'inö: 'Cha'achi chö̧jo̧mȩ mö̧ä̧'cara̧'a̧cu̧ ja̧'hua̧ta̧'a̧nö̧ ju̧huȩnȩtä̧ cu̧ja̧jä̧. Ttötä chiyäcua̧jä̧ inäbittö chaditodä, hueähuä huȩnȩ ttö chi̧huȩyu̧tinodä, ja̧u̧mä̧ ucutä cu̧huo̧juȩta̧ pä'ö. ¹³ Ja̧'hua̧nö̧ ja̧'a̧ttö̧ Moisésmä umöhuä̧ya̧ Josuécutä rä'opinö̧ ja̧'hua̧nö̧ ja̧'a̧ 'cha'achinö möä'cara̧'a̧ Dios ö̧ja̧'a̧cu̧. ¹⁴ Moisésmä ji'ähuinö pinö jina'a̧ ttö̧ja̧ tturuhuotörömä: Pȩnȩtä̧ ka̧cuä̧tu̧cui̧ ja̧'hua̧ta̧'a̧nö̧ tta̧'ä̧rä̧tu̧cui̧ ujutu ppa̧tä̧chome jubö ucutu cujä̧tu̧cuo̧mȩcu. Aarón'inä, Hur'i̧nä̧ jahuätömä ucutucu ttö̧jä̧cuo̧tö̧. Ya̧tȩ surojö ucuocuttömä, ja̧'a̧tä̧ topätucuirö jahuätö ttö̧ja̧'a̧cu̧ i̧'cha̧'a̧nä̧." ¹⁵ Ja̧'hua̧nö̧ ja̧'a̧ttö̧ Moisésmä möä'cara̧'a̧cu̧ 'cha'achinö ja̧'hua̧nö̧ ja̧'a̧ ajiya isoppatä a̧ttä̧di̧'i̧nä̧cu̧. ¹⁶ TÖ̧Ä̧NÄ̧HUA̧ usärömä Sinaí möä'canä ki̧na̧'a̧ ja̧'hua̧ta̧'a̧nö̧ isoppamä a̧ttä̧di̧'i̧na̧'a̧ seisnö mo̧ro̧ jo̧mȩnä̧. Sietenö mo̧ro̧ päi'omenä Ja̧u̧mä̧ huopinö Moisésrö isoppa jacuättö. ¹⁷ TÖ̧Ä̧NÄ̧HUA̧ usärömä Israel ttö̧ja̧ tottomenämä ocurä cuoarä möä'ca ju'tättö cuoa'a jä̧'i̧nö̧'a̧nö̧ ji̧na̧'a̧. ¹⁸ Moisésmä isoppa jacuä do'ächächö möä'cara̧'a̧cu̧ 'cha'achinö. Ja̧u̧mä̧ ki̧nö̧ möä'ca ju'tämä cuarentanö mo̧ro̧ jo̧mȩnä̧ ja̧'hua̧ta̧'a̧nö̧ cuarentanö yodo jo̧mȩnä̧.