¹ Pii̧yȩ ja̧'a̧ hueähuä huȩnȩ jähuätörö cui̧jȩpa̧ pä'ö jö̧mä̧. ² Hebreo ttö̧ja̧sa̧rö̧ cu̧mö̧huä̧ya̧tu̧cu̧ päi'önä cuȩmä̧tu̧cu̧ttö̧mä̧, ja̧u̧mä̧ seisnö̧ a̧'ȩ jo̧mȩnä̧ adita pä'ötä ö̧jä̧cua̧ ja̧'hua̧nö̧ ja̧'a̧ sietenö a̧'ȩ päi'omenä ja̧u̧mä̧ huȩnȩ juiyönä̧tä̧ i̧mi̧toca'atä rä̧o̧pä̧cua̧. ³ Ja̧u̧ katätä ichinöttö̧mä̧, ja̧u̧mä̧ kätätä huȩnȩmä̧ juiyönätä rä̧o̧pä̧cua̧; ja̧u̧ irecuarö ȩmi̧nö̧ jö̧ttö̧mä̧, ja̧u̧ irecuamä kirecuocu huȩnȩ juiyönätä̧ räjopäcuaju. ⁴ U̧ru̧hua̧ u̧mö̧huä̧ya̧rö̧ irecua päi'önä iyinäcu̧ jö̧ttö̧mä̧, ja̧hua̧nö̧ ja̧'a̧ jähuäjumä kuhuäbecuinä̧ö̧ u̧mä̧tö̧'i̧nä̧, nä̧tö̧'i̧nä̧, irecua ki̧tti̧mö̧cu̧mä̧ ttu̧ru̧hua̧tä̧ umöhuäyotö jö̧nä̧tä̧ opätti'äcuotö. Ja̧'hua̧nö̧ jo̧mȩnä̧ ubomä katätä huȩnȩ juiyönätä̧ rä̧o̧pä̧cua̧. ⁵ Ja̧'hua̧nö̧ ja̧'a̧nä̧ u̧mö̧huä̧ya̧ huäjönätä̧ ucuocuttömä: Ttömä chu̧ru̧hua̧rö̧mä̧ repe'ösä. Chirecuacu'inä, chi̧tti̧mö̧cö̧'i̧nä̧ rädopächamä pä'ocösä" ⁶ Ja̧'hua̧nö̧ päomenä u̧ru̧hua̧mä̧ Dios ö̧ja̧'a̧cu̧ i̧'cä̧chä̧cua̧, u̧ru̧hua̧mä̧ äpatecu i̧'cä̧chä̧cua̧ ja̧'hua̧nö̧ jo̧ca̧'a̧ttö̧mä̧ doächi'äcuähuomecu̧, ja̧'hua̧nö̧ ja̧'a̧ u̧ru̧hua̧mä̧ i̧sa̧ri̧nä̧ ä̧ja̧nä̧ 'tä̧ȩpä̧cua̧, ja̧'hua̧nö̧ tä̧ȩpö̧ o'ca'a ji̧nä̧ pi̧jä̧nä̧ ö̧jä̧i̧mä̧ ppä̧'ä̧dä̧rö̧tä̧ aditö ö̧jä̧cua̧. ⁷ Ya̧tȩ ittijuru ttumöhuäyaju päi'önä iyö icuttömä jahuäjumä huȩnȩ juiyönämä räjopö juiyönä jä̧cua̧'a̧. Ttumöhuäyotö u̧mä̧tö̧rö̧ jȩttö̧ta̧'a̧nö̧. ⁸ Jahuäjuru ku̧ru̧hua̧ öjö'coca'a jö̧ttö̧mä̧, chutä hueinäcua̧ pinäju̧ ja̧'hua̧nö̧ jo̧mȩnä̧ ja̧u̧mä̧ pä'äjita'anö ttȩma̧ju̧ pä'ömä hue'ocö jä̧cua̧. Ja̧u̧mä̧ ko̧ro̧jä̧ttö̧ ichäcuähuotörö ichäcuähuotörö iya pä'ömä hueähuoca'a, ja̧u̧ jȩa̧ pä'ömä jui̧'a̧, täcö ja̧u̧mä̧ yaparetä jȩä̧'i̧ja̧'a̧ttö̧. ⁹ Ku̧ru̧hua̧ i̧tti̧ irecua päi'önä hueöttömä, ja̧u̧mä̧ yoräteönätä̧ ittiju 'cua̧rö̧nä̧tä̧ jȩa̧ pä'ötä ja̧'a̧. ¹⁰ Ja̧u̧ karajuru irecua päi'önä ȩmö̧ttö̧mä̧ ja̧u̧mä̧ u̧cuȩ'i̧nä̧ pö̧jä̧tti̧yö̧'i̧nä̧, iäre jö̧ttö̧'i̧nä̧ hu̧yi̧ä̧chi̧'ö̧nä̧ jȩa̧ pä'ömä juiya'a. ¹¹ Ja̧'hua̧nö̧ ja̧'a̧nä̧ huäbodäcuänä jä̧ji̧ i'cächö iyoca'a jö̧ttö̧mä̧, jahuäjumä huȩnȩ juiyönätä̧ pärätämäkimitoca'atä räjopächäcuaju. ¹² Ya̧tȩ ka̧ra̧rö̧ 'tahuomenä 'tahuäcu 'corujuoächöttömä, isopäi'önä̧tä̧ ja̧u̧ ttö̧ja̧sa̧mä̧ 'coru juoächa pä'ötä hua̧. ¹³ Ya̧tȩ ja̧'hua̧nö̧ jȩcha̧ja̧ päoca'a jä̧ja̧'a̧nä̧ ji̧yȩtȩ mȩä̧huä̧chä̧ji̧ttö̧mä̧, mȩä̧huä̧chö̧nä̧ jȩpä̧ji̧rö̧mä̧ dajahuächö ö̧jä̧cuo̧mȩ jȩpö̧ chu̧ju̧nä̧cua̧sä̧. ¹⁴ Ya̧tȩ chutä amöcuädö ö̧jo̧mȩ ppäyänä kö̧rö̧ rohuäu, a̧mö̧cuädö ö̧jö̧nä̧ji̧ta'anö cuä'ö icuttömä, ja̧'hua̧nö̧ ja̧'a̧ ja̧u̧rö̧ 'chu'ädö ku icu iyähuome Diosrö ö̧ja̧ pä'ö'inä ja̧u̧mä̧ cuä'ötä i̧cuä̧huä̧cua̧. ¹⁵ Ya̧tȩ jä'oröcö̧ ja̧ju̧rö̧cö̧ cuäcuäuttömä isopäi'önätä̧ 'coru päi'a pä'ötä hua̧. ¹⁶ Ya̧tȩ ttö̧ja̧sa̧rö̧ u̧nä̧u̧cu̧ttö̧mä̧ ja̧hua̧ta̧'a̧nö̧ iyö icuttömä, ja̧'hua̧nö̧ jo̧ca̧'a̧ttö̧'i̧nä̧ chutäcu ö̧ja̧'a̧ ttö̧'o̧cui̧'ö̧ttö̧mä̧, ja̧u̧ ttö̧ja̧rö̧ nä̧u̧cuä̧rö̧mä̧, isopäi'önä̧tä̧ cuä'ö tticua pä'ötä hua̧. ¹⁷ Ya̧tȩ jä'oröcö̧ ja̧ju̧rö̧cö̧ suronä päöttömä isopäi'önätä̧ cuä'ö tticuarö pä'ötä hua̧. ¹⁸ U̧mä̧tö̧ tturohuähuöttömä ja̧'hua̧nö̧ ja̧'a̧ ya̧tȩ ka̧ra̧rö̧ ido'quinä̧cö̧, u̧mä̧nä̧cö̧ cuäöttömä, ja̧'hua̧nö̧ cuäomenä ja̧u̧ ttö̧ja̧sa̧ 'coru juoächoca'a jö̧ttö̧mä̧, ja̧'hua̧nö̧ ja̧'a̧nä̧ ä'ö ö̧'ä̧'i̧jo̧mȩ ö̧'ö̧ttö̧mä̧; ¹⁹ ja̧'hua̧nö̧ ö̧'a̧'a̧nä̧ yoyoja̧'a̧ a̧'cua̧ttö̧ juoöttömä ja̧'hua̧ta̧'a̧nö̧ itta'canätä cueächöttömä̧, ja̧u̧rä̧ cuä'äji päjimä adita pä'ö jä̧ji̧ mo̧ro̧ toe'ächäji micuämä imitähua pä'ötä jä̧cua̧'a̧; ja̧'hua̧ta̧'a̧nö̧ ja̧u̧mä̧ jo̧mȩnö̧ a̧'cua̧ttö̧ juhuome jubö päi'önä imitähua pä'ötä jä̧cua̧'a̧. Ja̧'hua̧nö̧ ja̧'a̧nä̧ ja̧u̧ ttö̧ja̧sa̧mä̧ ttö̧ja̧sa̧rö̧ cuä'ö icuähuä ttö̧ja̧sa̧ pä'ömä pä'ähuocö jä̧cua̧. ²⁰ Ya̧tȩ itta'canä cuäöttömä umöhuä̧ya̧rö̧cö̧ umöhuäyajurucö̧, umöhuä̧ya̧ päjirö cuäja'a 'coru juoächöttömä, isopäi'önä ja̧u̧ ttö̧ja̧sa̧mä̧ ro̧'ȩpö̧tä̧ ro̧ȩcuä̧cua̧. ²¹ Ja̧'hua̧nö̧ ja̧'a̧nä̧ ttu̧mö̧huä̧ya̧ ya'ute mo̧ro̧cö̧ todäre mo̧ro̧cö̧, u̧ru̧hua̧mä̧ ro̧'ȩpö̧mä̧ ro̧'ȩcuo̧cö̧ jä̧cua̧, juhua'amä ja̧u̧ u̧mö̧huä̧ya̧mä̧ usurä ȩmä̧u̧ toe'ächönä jȩä̧ja̧'a̧ttö̧. ²² U̧mä̧tö̧ tturohuäuttömä ja̧'hua̧nö̧ tturohuähuomenä isaju muchajuru 'tahuähuächomenä cu̧cuä̧ba̧ ppö'ö icuttmä, ja̧'hua̧nö̧ ja̧'a̧nä̧ jahuäju kutta päi'önä jȩä̧cho̧ca̧'a̧ jä̧ji̧ttö̧mä̧, ja̧'hua̧nö̧ ja̧'a̧ ja̧u̧ ttö̧ja̧sa̧ jȩä̧ji̧ huȩnȩcuä̧chä̧ji̧mä̧ imitähua pä'ötä huettäcua̧, kirecuo ja̧u̧ imitähua pä'ö hueö'acuä̧tä̧, ja̧'hua̧ta̧'a̧nö̧ ja̧u̧mä̧ imitähua pä'ötä jä̧cua̧'a̧ röji pä'ö icuätö pättö'a̧cuä̧tä̧. ²³ Ja̧'hua̧nö̧ ja̧'a̧nä̧ ttötta päi'önä 'tahuähuächäjittömä̧, ka̧ra̧ a̧'cua̧rö̧mä̧ ucu cua̧'cua̧rö̧mä̧cu̧ micuähuächa pä'ötä jä̧cua̧'a̧, ²⁴ i'äremä, cui'ärecu, acupa'chemä cuacupa'checu, umömä ucu cumöcu̧, öjä̧pö̧mä̧ kö̧jä̧pö̧cu̧, ²⁵ cuo'ö icuäjimä ucu cuo'ö cuicunä, ötta päi'äjittömä, cutta päi'önä ja̧'hua̧nö̧ jo̧ca̧'a̧ttö̧mä̧, i̧jȩta̧nä̧ tuhuäba jö̧nä̧ päi'äjittömä cui̧jȩta̧ tuhuäba päi'önä. ²⁶ Ya̧tȩ u̧mö̧huä̧ya̧cu̧, umöhuäyajucö̧ ki'ärenä 'tauttömä ja̧'hua̧nö̧ 'ta'ö ttȩ'ö̧ icuttömä, umöhuä̧ya̧mä̧ huȩnȩ juiyönätä̧ räopa'anä ja̧'a̧tä̧ toa pä'ötä jä̧cua̧'a̧ i'äre ttȩä̧huä̧ji̧ micuämä. ²⁷ U̧mö̧huä̧ya̧cu̧, umöhuäyajucö̧ kacu baropö icuttömä, ja̧u̧mä̧ huȩnȩ juiyönätä̧ räopa'anä ja̧'a̧tä̧ toa pä'ötä jä̧cua̧'a̧ acu barächi'äji micuämä jö̧nä̧tä̧. ²⁸ Päcäyämä̧ ä̧ja̧ i̧sä̧na̧nä̧ uboröcö̧, isajurucö̧ 'coru pätti'önä äcuädö jȩpö̧ icuttömä, ja̧u̧ päcäyämä 'coru päi'ome jubö inädönä icuäu i̧cuä̧jhuä̧cua̧, ja̧'hua̧ta̧'a̧nö̧ ja̧u̧ idepämä cuäcuähuocö jä̧cua̧; ²⁹ ja̧'hua̧nö̧ ja̧'a̧nä̧ ja̧u̧ päcäyä u̧ru̧hua̧mä̧ äji jȩä̧ji̧nämä surojönämä ki̧'o̧cö̧ jä̧cua̧. Ja̧'hua̧nö̧ ja̧'a̧ päcäyä ä'cojitä päi'önä ja̧'hua̧nö̧tä̧ jȩpä̧'i̧jö̧ jö̧ttö̧mä̧ ja̧'hua̧nö̧ ji̧yä̧u̧ u̧ru̧hua̧rö̧mä̧ jittähuina'anä do'ädö mö'ȩpö̧ ö̧jö̧no̧ca̧'a̧ jä̧'i̧ttö̧mä̧, ja̧'hua̧nö̧ jo̧mȩnä̧ ja̧u̧ päcäyämä uboröcö̧ isajurucö̧ cuä'ö icuina'a jö̧ttö̧mä̧ ja̧u̧ päcäyärömä inädönä icuä icuähuä̧cua̧ ja̧'hua̧ta̧'a̧nö̧ u̧ru̧hua̧rö̧'i̧nä̧ cua'ö icuähuäcua'a. ³⁰ A̧'cua̧rö̧ ki̧'a̧rö̧ pä'ömä ttimita pä'ö, pä'ö ku̧nä̧huo̧mȩ imita pä'ö ja̧'a̧, ja̧u̧mä̧ pä'ö ku̧nä̧huo̧mȩmä̧ juia pä'ö'inä imita pä'ötä jä̧cua̧'a̧. ³¹ Ya̧tȩ päcäyä ä̧ja̧ i̧sä̧na̧nä̧ äcuädöttömä ya̧tȩ i̧tti̧rö̧cö̧ ittijurcö̧, ja̧u̧ u̧ru̧hua̧mä̧ jȩtta̧ pä'ö hue'ö ku̧nä̧hua̧'a̧cu̧tä̧ jȩa̧ pä'ötä jä̧cua̧'a̧. ³² Ya̧tȩ päcäyä ä̧ja̧ i̧sä̧na̧nä̧ äcuädöttömä ttumöhuäya̧rö̧cö̧ ttumöhuäyajurucö̧, päcäyä u̧ru̧hua̧mä̧ pärätämä 30nö ciclo jomenä imita pä'ötä jä̧cua̧'a̧ ja̧'hua̧nö̧ i̧mi̧ta'anä päcäyärömä inädönä icuäu icuähuäcua'a. ³³ Ya̧tȩ reju mö̧ȩcuo̧mȩ ba'epö icuttö̧cö̧, ya̧tȩ reju sa'ö'ca̧ mö̧ȩpo̧ca̧'a̧ ja̧'a̧ päcäyäcö̧, burocö̧ jahuäjunä ma̧ä̧chö̧ttö̧mä̧, ³⁴ jahuäju u̧ru̧hua̧mä̧ toe'ächäji micuämä imitähua pä'ötä jä̧cua̧'a̧. Ja̧u̧mä̧ pärätämä̧ i̧yä̧cua̧ i̧sa̧ 'coru juo'ächäji u̧ru̧hua̧rö̧ ja̧'hua̧nö̧ i̧yomenä i̧sa̧ 'coru juo'ächäjimä mitähuäjitä ö̧'o̧ya̧ pä̧i̧'ä̧cua̧. ³⁵ Ya̧tȩ aji päcäyä ka̧ra̧ aji päcäyärö dö'ö icuomenä 'corujuo'ächöttömä, ja̧'hua̧nö̧ ja̧'a̧ jahuätömä päcäyä a̧'cua̧ra̧rö̧ iyö icu micuämä 'cä̧ttȩcuä̧cuo̧tö̧ ja̧'hua̧ta̧'a̧nö̧ jahuätömä päcäyä 'corujuo'ächäjirö'inä pä̧cuä̧da̧ pönä ttȩmä̧cuo̧tö̧. ³⁶ Ja̧'hua̧nö̧ ja̧'a̧nä̧ ä'cojitä päi'önä päcäyämä ä̧ja̧ i̧sä̧na̧nä̧ äcuädä'chö jȩpä̧'i̧jö̧ jö̧ttö̧mä̧ ja̧'hua̧nö̧ jȩa̧'a̧nä̧ do'ädö ö̧jö̧no̧ca̧'a̧ jä̧'i̧ttö̧mä̧, päcäyä 'corujuo'ächäjinämä a̧'cua̧ra̧rö̧tä̧ i̧yä̧cua̧ ja̧'hua̧nö̧ i̧yo̧mȩnä̧ 'corujuo'ächäjirömä mitähuäjitä ö̧'o̧ya̧ jö̧nä̧tä̧ pä̧i̧'ä̧cua̧.