¹ Madián rȩjȩ sacerdote Jetró pä'ü mi̧kua̧, Moisés irecua kä'omä̧, Moisésrö'i̧nä̧, Israel ttö̧ja̧rö̧'i̧nä̧ o'cajuiyönä Dios jȩä̧ji̧mä̧ ä̧ju̧cui̧nö̧. Ja̧u̧mä̧ ä̧ju̧cui̧nö̧ TÖ̧Ä̧NÄ̧HUA̧MÄ̧, Egipto rȩjȩttö̧ Israel ttö̧ja̧rö̧ rä'epö icuäja'a. ² Moisés imiya̧ Jetromä, Moisés i̧tti̧mö̧ tta̧ju̧ Séforarö ȩmi̧pä̧ 'chi̧nö̧ isodera̧'a̧ hue'ö icuinä̧cua̧rö̧, ³ ja̧'hua̧ta̧'a̧nö̧ ki̧tti̧mö̧ ta̧ju̧ru̧cu̧tä̧; Ya̧tȩmä̧ Gersón pä'ö micuinü̧, juhua'amä̧: “Korotö tti̧rȩjä̧ttö̧mä̧, ko̧ro̧jä̧ ttö̧ja̧sa̧sä̧”, Moisés päinomȩttö̧. ⁴ ka̧ra̧mä̧ Eliezer pä'ü micuinü̧, juhua'amä̧ Moisésmä̧ pa̧'a̧nö̧ päina̧'a̧ttö̧: “Chä'o Ö̧ä̧nä̧hua̧ Diosmä̧ ttörö ppä'ädinö. Ja̧u̧mä̧ faraón ucurä'chuttö tode'ö juiyönä̧ ppädinäcu̧sä̧.” ⁵ Moisés imiya Jetromä, Moisés i̧tti̧mö̧ tta̧ju̧ru̧'i̧nä̧, i̧tti̧mö̧rö̧'i̧nä̧ o'ipö ichinö, de'a jui̧yä̧jä̧ Dios ö̧jo̧mȩ mü̧ä̧'ca pättomȩ ä'ö ö̧ja̧'a̧. ⁶ Ja̧u̧mä̧ Moisésrö pä'inö: "Ttö cuimiya̧ Jetromä̧ ucuru topö ichäjisä, kui̧tti̧mö̧ tta̧ju̧ru̧'i̧nä̧, kui̧tti̧mö̧ ta̧ju̧ru̧'i̧nä̧ i'cächö. ⁷ Moisésmä̧ i̧tti̧mö̧ ttä̧do̧rö̧ topo'ö ichö rä'o'ömä, ä'cajo̧mȩ ja̧rȩyu̧ pä'i'ö te'äu 'chu̧o̧pi̧nä̧cu̧. Jahuätömä jitötä yotucunä adihuomenä 'cuättopäji jä'ecuäjä'cotömä̧, ö̧jode jacuä dodepinä̧tö̧. ⁸ Moisésmä̧ o'cajuiyönä ji'ähuinü̧ Israel ttü̧ja̧rö̧ ppä'ädö TÖ̧Ä̧NÄ̧HUA̧ faraónrö̧ jȩi̧nö̧'i̧nä̧, Egipto ttö̧ja̧rö̧ jȩi̧nö̧'i̧nä̧, mä̧nä̧nä̧ oto ttichomȩnä̧ usurä ttȩmä̧hua̧'a̧nä̧ ra̧huä̧pi̧jö̧ttö̧ TÖ̧Ä̧NÄ̧HUA̧ ppädinö̧'i̧nä̧ jiähuinä̧cu̧. ⁹ Jetromä̧ TÖ̧Ä̧NÄ̧HUA̧RÖ̧ rö̧ȩnä̧ esehuinö̧, o'cajuiyönä Israel ttö̧ja̧rö̧ adiu jȩä̧ji̧, Egipto ttu̧mu̧ttö̧ rä'epö icuäji'inä. ¹⁰ Jetromä pä'inö: TÖ̧Ä̧NÄ̧HUA̧MÄ̧ tesehuarö pä'ötä hua̧, Israel ttö̧ja̧rö̧ faraón u̧mö̧ttö̧'i̧nä̧ ja̧'hua̧ta̧'a̧nö̧ Egipto ttö̧ja̧ ttu̧mö̧ttö̧'i̧nä̧ rä'epö icuina̧'a̧ttö̧. ¹¹ Jitämä huo̧jua̧sä̧ TÖ̧Ä̧NÄ̧HUA̧MÄ̧, o'catoi'önä ttö̧ä̧nä̧huo̧tö̧ttö̧'i̧nä̧ abonänö böo ja̧'a̧ pä'ö, Egipto ttö̧ja̧ ttujurucu Israel ttö̧ja̧ ttö̧ja̧cuo̧mȩcu̧ dottächi'omenä, Diosmä umöhuäyotörömä rä'epö icuinö̧. ¹² Moises i̧mi̧ya̧, Jetromä iäre iyähuä Diosrö kuicu ichähuä i'cächinö. Araron'inä, jahuata'anö o'ca toinä Israelttö ta̧mö̧ huotö'inä iyinätö̧ ji̧yȩtȩ ttu̧cuä̧ cuä̧nö̧ Dios ä'ca jo̧mȩttö̧, Moises i̧mi̧ya̧cu̧. ¹³ Koro mo̧ro̧ Moisesmä pä̧mä̧di̧nö̧ ötahuiyä ttö̧ja̧rö̧ ro̧ȩpa̧ pä'ö. Ötahuiyä ttö̧ja̧mä̧ sobucuäcuönä kä̧mä̧di̧nä̧tö̧ ja̧u̧ttö̧mä̧, pä'i mo̧ro̧ jupmettö̧ kä̧mä̧dä̧ yodo jubö. ¹⁴ Moises i̧mi̧ya̧ o'ca juiyönä jȩi̧nö̧ ötahuiyä ttö̧ja̧rö̧ ja̧'a̧tä̧ jȩi̧nö̧ to'omenämä, pä'inö: "¿Däjettö̧ pi̧yȩ ötahuiyä ttö̧ja̧cu̧ jȩcu̧mä̧? ¿Dä̧mö̧ttö̧ pi̧yȩmä̧, ka'atä pä̧mä̧dö̧ ja̧hua̧ta̧'a̧nö̧ o'ca toinä ötahuiyä ttö̧ja̧mä̧ pä'i mo̧ro̧ päiomettö̧ kä̧mä̧dö̧ yodo jubö cuä'ca jo̧mȩ ttö̧ja̧mä̧da̧ttö̧?" ¹⁵ Moisesmä i̧mi̧ya̧rö̧ pä'inö: "Ötafuiyä ttö̧ja̧mä̧ ttö chu̧ja̧cu̧ ichätö Dios pä'ö huȩnȩ jitähuata pä'ö. ¹⁶ Jahuätö ji̧yȩtȩ huȩnȩ jö̧ ttö̧ju̧nä̧ro̧mȩnä̧, ttö chö̧ja̧cu̧ ichätö. Ttömä ka̧ra̧rö̧nä̧ ka̧ra̧rö̧nä̧ pä'ö jȩtta̧'a̧ pä'öcö̧nö̧sä̧, ja̧hua̧ta̧'a̧nö̧ huo̧juȩtö̧sä̧ Dios hueinö'inä ja̧hua̧ta̧'a̧nö̧ chutä jähuä'inä. ¹⁷ Moises i̧mi̧ya̧mä̧ päinäcu̧: "Ucu jȩcu̧mä̧ adihuoca'a. ¹⁸ Ucumä jueinätä̧mä̧ cuä'ächiöjä̧m ucu'inä ja̧hua̧ta̧'a̧nö̧ ucutä ka̧cuä̧tö̧ ötahuiyä ttö̧ja̧'i̧nä̧. Pi̧yȩmä̧ ucurumä ämäcö ja̧'a̧. Ucutä cuamo̧nä̧mä̧ jȩcu̧ juiyanö hua̧jä̧. ¹⁹ Ä̧ju̧cui̧ttö̧. Ttömä ji̧yȩtȩ huȩnȩ jidähuäcöjä, ja̧hua̧ta̧'a̧nö̧ Diosmä ucutä u̧ja̧'a̧cua̧, ucumä Dios ä'ca jo̧mȩttö̧ i̧jȩcuä̧rö̧ ötahuiyä ttö̧ja̧ tti̧mi̧nä̧, ja̧hua̧ta̧'a̧nö̧ ucumä i'cächöjä̧ jahuätörö huȩnȩ jö̧mä̧ Dios ä'ca jo̧mȩ. ²⁰ Ucumä cu̧huo̧juȩta̧ra̧'a̧ pä'ö ja̧'a̧ chutä jähuä'inä ja̧hua̧ta̧'a̧nö̧ hueinö huȩnȩ'i̧nä̧. Ucumä ocui̧pä̧cua̧jä̧ tȩnȩ tti̧ya̧'a̧ pä'ö ja̧hua̧ta̧'a̧nö̧ ti̧yȩ jȩtta̧'a̧ pä'ö. ²¹ Ja̧hua̧ta̧'a̧nö̧, ucumä cu'ojoa pä'ö ja̧'a̧ ötahuiyä ttö̧ja̧ttö̧ u̧mä̧tö̧ jȩttö̧'a̧nö̧ huotörö, u̧mä̧tö̧ Dios ucuotätörö, u̧mä̧tö̧ isopäinä yapare jȩpö̧ micuäu jö̧ cuo̧cui̧pä̧cuä̧huä̧ a̧u̧tä̧tö̧rö̧. Ucumä cu̧ju̧nu̧'a̧nö̧ ja̧'a̧ ötahuiyä ttö̧ja̧rö̧, milnö'inä, cienö'inä, cincuentanö'inä ja̧hua̧ta̧'a̧nö̧ dieznö'inä jo̧mȩnä̧ huotörö huetta'a pä'ö. ²² Jahuätömä ro̧dȩppä̧cuo̧tö̧ o'ca juiyönä ötahuiyä ttö̧ja̧rö̧ ro̧ttȩpa̧pe jö̧ jäcuä, ja̧hua̧nö̧ ja̧'a̧nä̧ jeröunänö jö̧mä̧ ucurötä i'cächö ttichäcuotö. Ja̧hu̧anö ja'anä a̧u̧cu̧ jähuämä, jahuätötä ro̧ttȩpä̧cuo̧tö̧ jitötä. Pa̧'a̧nö̧ jö̧nä̧tä̧ , ucuru cojeunä jä̧hua̧'a̧, ja̧hua̧ta̧'a̧nö̧ ucutä ämäcö cättepäcuotö. ²³ Pi̧yȩ jȩcu̧tö̧mä̧, ja̧hua̧ta̧'a̧nö̧ Dios jȩpö̧ iyöttömä, ja̧hua̧nö̧tä̧ ucumä cuami'quiäyiu cui̧jä̧cua̧jä̧, ja̧hua̧ta̧'a̧nö̧ o'ca toinä ötahuiyä ttö̧ja̧mä̧ tta̧'cua̧ adihuatä ttojuisodecu ppa̧dä̧chä̧huo̧tö̧. ²⁴ Ja̧hua̧nö̧ ja̧'a̧ttö̧mä̧ Moisesmä i̧mi̧ya̧ i̧huȩnȩ ä̧ju̧cu̧ ja̧hua̧nö̧tä̧ jȩpi̧nö̧ o'cajuiyönä pä'äji ta'anötä̧. ²⁵ Moisesmä u̧mä̧tö̧ Israel ttö̧ja̧ttö̧ jȩttö̧a̧nö̧ huotörö pojopö ötahuiyä ttö̧ja̧ ttöröhuotö päiönä jȩi̧nä̧u̧, milnö juotö ttöruhuotö jö̧nä̧'i̧nä̧, cienö'inä, cincuetanö'inä ja̧hua̧ta̧'a̧nö̧ dieznö'inä. ²⁶ Jahuätömä ro̧ȩpi̧nä̧tö̧ pamonänö huȩnȩ jö̧nä̧. Rö̧ä̧nä̧ huȩnȩ jö̧mä̧ Moises ö̧ja̧cu̧ ȩpö̧ ichinätö̧, ja̧hua̧nö̧ ja̧'a̧nä̧ jahuätötä ro̧ȩpi̧nä̧tö̧ paponänötä̧ jö̧mä̧. ²⁷ Ja̧hua̧nö̧ ja̧'a̧mä̧ Moisesmä i̧mi̧ya̧rö̧ i̧hua̧nä̧ ja̧'a̧tä̧ topinö, ja̧hua̧nö̧ ja̧'a̧mä̧ Jetromä i̧rȩjä̧ra̧'a̧cu̧ ppa̧'a̧chi̧nö̧.