¹ O'catoi'önä ji̧n= yo̧mȩtȩ ka̧cuä̧tö̧ Israel ttö̧ja̧mä̧ rä'opinä̧tö̧ rȩjȩ de'a juiyomecu̧ Sin mänä yabocu u̧'cua̧pö̧ja̧'a̧ 'chä̧nö̧ TÖ̧Ä̧NÄ̧HUA̧ huea'anä. Kä̧mä̧di̧nä̧tö̧ Refidim pä'ö micuome, ja̧'hua̧nö̧ ja̧'a̧nä̧ ajiyamä juiyinome ttö̧ja̧ ttahua pä'ömä. ² Ja̧'hua̧nö̧ ja̧'a̧ttö̧ huȩnȩ jö̧mä̧ Moisésrö huȩnȩtö̧mä̧ pä'inä̧tö̧: "Ajiya tahua iyitö. Moisésmä pä̧i̧nä̧u̧: ¿Tta̧'a̧nö̧ pä'ö ttörö cu̧ra̧huä̧rä̧tu̧cua̧'a̧ttö̧? ¿Tta̧'a̧nö̧ pä'ö TÖ̧Ä̧NÄ̧HUA̧RÖ̧ ka̧cuä̧mȩ'ö̧ to'cuätucua'attö̧? ³ Ttö̧ja̧mä̧ ttahua pä'ö rö̧ä̧nä̧ a̧di̧ri̧jä̧u̧, ja̧'hua̧nö̧ jä̧u̧ ttö̧ja̧mä̧ Moisésrö suronä pä'ä'chu̧mä̧ jahuätömä pä'inä̧tö̧. ¿Tta̧'a̧nö̧ pä'ö Egipto rȩjȩttö̧mä̧ rä'epö cuicuäjätöttö̧? ¿Ujuturu'inä, ti̧tti̧mö̧rö̧'i̧nä̧ cuä'ö cuicua pä'ö ja̧'hua̧ta̧'a̧nö̧ tä̧ji̧mö̧ pä̧cä̧yu̧'i̧nä̧ tahua a̧di̧ttö̧ 'coru juottächa pä'ö? ⁴ Ja̧'hua̧nö̧ ja̧'a̧ Moisésmä jä'epinö TÖ̧Ä̧NÄ̧HUA̧RÖ̧ pa̧'a̧nö̧ pä'önö̧: ¿Tta̧'a̧nö̧ jȩchä̧cua̧'a̧ttö̧ pitö ttö̧ja̧rö̧mä̧? ¡Täcö ttörömä inädönä icuäu tticuometä̧ ja̧'a̧! ⁵ Ja̧'hua̧nö̧ ji̧yä̧cu̧ TÖ̧Ä̧NÄ̧HUA̧MÄ̧ ädätinä̧cu̧ ttö̧ja̧ ttä'canä 'cuä'opö täi, ja̧'hua̧ta̧'a̧nö̧ ucucu tti̧'cha̧ o'ipi Israel tturuhuotörö'inä. Cuitta'ca ajenä cuäcuinä̧'ca'inä ȩmi̧pö̧ tä'i. ⁶ Ttömä cuä'ca jo̧mȩ Horeb inähuänä chö̧jä̧cua̧sä̧, ja̧'hua̧ta̧'a̧nö̧ ucumä inähuänä cuäcuajä̧. Ajiyamä juähuättötä räopäcua'a ttahua pä'ömä, Moisésmä ja̧'hua̧nö̧ jȩpi̧nö̧ Israel ttö̧ja̧ tturuhuotö ttä'ca jo̧mȩttö̧mä̧. ⁷ Ja̧hua̧nö̧ ja̧'a̧ttö̧ ju̧huȩnȩmä̧ Masah pä'ö'inä Meribá pä'ö'inä o'inö Israel ttö̧ja̧mä̧ ö̧ra̧huä̧rö̧nä̧ jȩtti̧na̧'a̧ttö̧ ja̧'hua̧ta̧'a̧nö̧ TÖ̧Ä̧NÄ̧HUA̧RÖ̧ ka̧cuä̧mö̧ topö pättina'attö̧: ¿TÖ̧Ä̧NÄ̧HUA̧MÄ̧ ujututäcu ku̧, ko̧cu̧? ⁸ Ja̧'hua̧nö̧ ja̧'a̧ Amalec ttö̧ja̧ttö̧ su̧ro̧da̧u̧mä̧ ichinä̧tö̧, ichömä Israel ttö̧ja̧cu̧ rohuähuinä̧tö̧ Refidim pä'ö micuomettö̧. ⁹ Ja̧'hua̧nö̧ ja̧'a̧ Moisésmä, Josuérö pä'inö: Ya̧cu̧nä̧ u̧mä̧tö̧rö̧ pojopö ȩmö̧'ca̧ rä'opi. Amalecu rohuähui. Yo̧i̧ mo̧ro̧ po̧ri̧'tä̧ jo̧mȩ beipome Dios iäro̧'quȩ 'chu̧huä̧rä̧nö̧ chö̧jä̧cua̧sä̧. ¹⁰ Josuémä amalec ttö̧ja̧cu̧ rohuähuinö Moisés jiähuinöta'anötä̧, Moisés, Aarón'inä ja̧hua̧ta̧'a̧nö̧ Hur'inämä po̧ri̧yä̧'tä̧ päi'ome beipomecu̧ 'cha'achinä̧tö̧. ¹¹ Ja̧'hua̧ta̧'a̧nö̧ Moisés umö cä̧'ȩpä̧ra̧'a̧nä̧mä̧, Israel ttö̧ja̧mä̧ rohuäu iso juo'epinä̧tö̧, 'cuä'ächi'ö umö juiädomenämä, amalec ttö̧ja̧tä̧ rohuäu isojuo'epinä̧tö̧. ¹² Moisés u̧mö̧ a̧mä̧cä̧chi̧'i̧yä̧u̧mä̧, Aarón'inä, Hur'inä ido'qui ȩmo̧po̧'ö̧ ppättepinä̧cu̧ i̧dȩ'a̧ jo̧mȩ ö̧'ä̧mä̧da̧ pä'ö, ja̧'hua̧ta̧'a̧nö̧ ja̧'a̧nä̧ Aarón'inä Hur'inä umö cä̧ttȩpä̧ri̧nä̧cu̧ yotucu pönä pätecu, ¹³ ja̧'hua̧nö̧tä̧ Moisés umöpi̧yä̧mä̧ 'chu̧'ä̧ri̧nä̧tö̧ kä̧hua̧ ma̧ä̧cho̧mȩ jubö päi'ömnä̧. Ja̧'hua̧nö̧tä̧ Josuémä rohuäu icuinö ucurä'chunä Amalec ttö̧ja̧rö̧mä̧. ¹⁴ TÖ̧Ä̧NÄ̧HUA̧ pä'inö Moisésrö: Pi̧yȩmä̧ cuyäru'tänä huȩyu̧ti̧, huȩyu̧ti̧'i̧pö̧mä̧ Josué ä̧ju̧cua̧ ucuocui, Mo̧ro̧jä̧ dȩa̧'a̧ttö̧mä̧ o'catoi'änärö si'epö chi̧cuä̧cua̧sä̧ Amalec ttö̧ja̧rö̧mä̧. ¹⁵ Ja̧'hua̧nö̧ ja̧'a̧ Moisés aditinö ku icu iyähuome ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ ji̧yȩtȩ jä̧cuä̧ jiäcuähuä i̧sa̧ pä'ö o'inö. ¹⁶ Ja̧u̧mä̧ pä'inö, chöjo cä̧dȩpä̧ȩä̧ji̧mä̧ TÖ̧Ä̧NA̧HUA̧ i̧dȩä̧cä̧tä̧ ja̧'a̧, TÖ̧Ä̧NÄ̧HUA̧TÄ̧ jä̧cua̧'a̧ Amalec ttö̧ja̧cu̧ juhua'a yabo tti̧tti̧cu̧'i̧nä̧ tturohuäunä jȩä̧cua̧mä̧.