¹ To̧mä̧rȩttö̧ todärenö a̧'ȩ Acaz Juda ttö̧ja̧rö̧ hueinö pänä, Ela i̧tti̧ Oseamä ruhuo huea pä'ö kä̧mä̧di̧nö̧. ² Ja̧u̧mä̧ hueinö samarianä'inä, Israelnämä ji̧mu̧trttö̧ pä̧ja̧cuä̧nö̧ jo̧mȩnä̧. Ja̧u̧mä̧ Dios ä'ca jo̧mȩttö̧ suronä jȩpi̧nö̧, ja̧u̧ ä'canä ruhuonä hueinätö jȩtti̧nö̧ a̧nö̧mä̧cö̧. ³ Asiria ru̧hua̧ Salmanasarmä, Oseacu ru̧hua̧ hui̧nö̧ ja̧u̧mä̧ umuhuäyotö juepinäcu imippotötä mitähuinö. ⁴ Asiria ru̧hua̧mä̧ Osea suronä ucuocuächa' huo̧juä̧chi̧'i̧nö̧, Osea Egipto ru̧hua̧ Sorö jȩpi̧nö̧ ujurucu hueomettö̧ ppä̧dä̧ra̧ pä'ö; ja̧u̧nä̧ Asiria ru̧hua̧rö̧ kä̧hua̧ jö̧ a̧u̧cuä̧ imitähua ijanömä mitähuocö pinö ja̧hua̧nö̧ ja̧'a̧ttö̧ Asiria ru̧hua̧ ujurucu pä̧i̧cu̧nä̧ jȩpö̧ chuädö cärenä rutu icuinäcu. ⁵ Ja̧u̧nö̧ o'comenämä Asiria ru̧hua̧mä̧ o'cajuiyönä ötahuiyä rohuäu cho'ipinö, Samaria'inä 'cho'inpinö huäbodäcuä a̧'ȩ ki̧nö̧ juȩnȩmä̧. ⁶ Ji̧mö̧tȩttö̧ pa̧ja̧cuä̧nö̧ a̧'ȩ Osea hueomenä, Asiria ru̧hua̧mä̧ Samaria'inä 'choipinö; Israel ttö̧ja̧rö̧mä̧ Asiria'acu Halahrȩjȩnä̧ u̧ju̧ni̧nä̧u̧ Habor ajenämä, Gozan'inä medo ttötahuiyä'inä ki̧na̧'a̧. ⁷ O'cajuiyönä pi̧yȩ cuä'opina'a Israel ttö̧ja̧ Ttö̧ä̧nä̧hua̧ Diosrö suronä jȩtti̧na̧'a̧ttö̧, epgipto ru̧hua̧ Faraón 'chu̧huä̧ro̧mȩttö̧ ja̧u̧nu̧mä̧ korotö ttö̧ä̧nä̧hua̧rö̧ esetinätö̧. ⁸ Juä̧jä̧ rȩjȩ Diosrö esetocotö jȩttö̧'a̧nö̧tä̧ jȩpö̧ ki̧nä̧tö̧ Dios rä'opö icuinö o'ca'amä, ji̧yȩmä̧ Israelttö ruhuotä jȩttä̧cuä̧ dottäri̧nö̧ ji̧na̧'a̧. ⁹ Israel ttö̧ja̧mä̧ Ttu̧ru̧hua̧ Dios öjö'cocö yä̧huȩi̧nä̧ jȩpi̧nä̧tö̧ jueinä jo̧cö̧. Ötahuiyä jö̧ a̧u̧cuä̧ tätähuä o'ca aditächö ku̧ni̧nä̧tö̧ to̧pä̧rä̧tö̧ ttö̧jo̧mȩ jutä'inä ötahuiyä ttoecuä'ca 'quiyä'ca huä̧mȩ'i̧nä̧. ¹⁰ Möä'quiyö ju'tä'inä, Dauhuiyä dea'anä'inä ttö̧ä̧nä̧hua̧ ju̧ Asera ka̧cuä̧jui̧yä̧'i̧nä̧ o'quittö adicuä'a ärädächä ku̧ni̧nä̧tö̧. ¹¹ Ja̧u̧ o'canä incienso pähuä ku icu iyä'chinätö̧ juä̧jä̧ ttö̧ja̧ Dios ȩpi̧nä̧u̧ ttö̧ju̧'a̧nö̧tä̧ jȩpi̧nä̧tö̧. Diosröämä ö'ä'inä ö̧jö̧nä̧ ri̧ä̧nä̧tä̧ suronä jȩpi̧nä̧tö̧. ¹² Juatömä tätähuä o'catä ucuo teähuinätö̧ Diosmä päina'a ji̧na̧'a̧. "Pi̧yȩmä̧ jȩ'cuä̧tu̧cuä̧". ¹³ Diosmä jiähua'iaja'a ji̧na̧' Israel ttö̧ja̧rö̧'i̧nä̧ Judas ttö̧ja̧rö̧'i̧nä̧ i̧huȩnȩ jiäcuähuä ttö̧ja̧nä̧ o'cajuiyönä 'cuäopäcuämä pa'anö pä'inö: suronä jȩpö̧ cu̧jä̧tu̧cuä̧mä̧ttö̧mä̧ ppa̧'a̧chä̧tu̧cui̧, ttö huȩyu̧tö̧ huedinötä̧, jȩpä̧tu̧cui̧, ucuotönö cuä'otöminä jȩtti̧nö̧'a̧nö̧tä̧. Ttömä chumuhuäyotö chi̧huȩnȩ jiäcuähuä ttö̧ja̧rö̧tä̧ hueinösä̧. ¹⁴ Ja̧hua̧nö̧ ja̧'a̧nä̧ jätömä ä̧ju̧cuo̧co̧tö̧pi̧nä̧tö̧ ttä̧'o̧tö̧ mi̧na̧'a̧nö̧tä̧ 'qui'inätö̧ Diosrö tteseta pä'ömä. ¹⁵ Ttä'otö mi̧nä̧rö̧ ucuocu huȩyu̧tö̧ jueö pähuänä ucuocuinömä esetocotö pinätö̧. Juätömä esetocotö jȩttö̧tä̧ jȩpi̧nä̧tö̧, juätö'anötä̧ juo'ächinätö̧; ttippeyenä kä̧tö̧ jȩttö̧tä̧ jȩpi̧nä̧tö̧ jȩcuä̧tö̧cuo̧ pä'inömä jarodinätö̧. ¹⁶ Ttö̧ä̧nä̧hua̧ Dios hueipinömä jaropi'inätö̧do, curäuttö päcäyä i̧tti̧mö̧ tta̧u̧cuä̧ aditinätödo ja̧hua̧ta̧'a̧nö̧ Asera ka̧cuä̧jä̧'i̧nä̧ aditinätödo ja̧hua̧ta̧'a̧nö̧ Asera ka̧cuä̧jä̧'i̧nä̧ aditinätödo ucuotö jȩpi̧nä̧tö̧do mo̧ro̧jä̧ttö̧ si̧ri̧'cö̧i̧nä̧, ja̧hua̧ta̧'a̧nö̧ baalrö'inä esetinätö̧do. ¹⁷ Ja̧hua̧ta̧'a̧nö̧ tti̧tti̧mö̧ u̧mä̧tö̧rö̧'i̧nä̧, nä̧tö̧rö̧'i̧nä̧, ocuränä kuicu iyähuä jȩpi̧nä̧tö̧, juei jiäcuähuä i̧sa̧rö̧'i̧nä̧, ttu̧mä̧ri̧tö̧rö̧'i̧nä̧, ku̧nä̧ri̧nä̧tö̧ suroju adita'anä ättäpäyotötä iyähuinätö̧ Dios ö̧'ä̧i̧tä̧ uhuäbeö ku̧ni̧nä̧tö̧. ¹⁸ ja̧hua̧nö̧ ja̧'a̧ Israel ttö̧ja̧rö̧ rö̧ä̧nä̧ öjö'coca'attö to̧ä̧rä̧i̧jo̧mȩttö̧mä̧ siepö icuinäu̧, ja̧hua̧nö̧ jo̧'ca̧'a̧ Judas ttö̧ja̧tp ki̧'i̧pi̧nä̧tö̧. ¹⁹ Ja̧hua̧nö̧ ja̧'a̧nä̧ Judas ttö̧ja̧'i̧nä̧ Ttö̧ä̧nä̧hua̧ Dios hueinömä jȩpo̧co̧tö̧ pi̧nä̧tö̧, Diosrä esetocotö Israel ttö̧ja̧ jȩtti̧nö̧'a̧nö̧tä̧ jȩpi̧nä̧tö̧. ²⁰ Ja̧hua̧nö̧ ja̧'a̧ttö̧ o'catoinä Israel ttö̧ja̧ tti̧tti̧mö̧ 'cotörö'inä icuipinäu̧, ja̧u̧mä̧ ro̧'ȩpö̧nö̧ ttaboiyotörötä iyipinä̧u̧ toö juiyönätä. ²¹ David uruhuo ji̧nö̧mä̧, Diosmä Israel ttö̧ja̧rö̧ 'choipomenämä, Jeroboam Nabat i̧tti̧rö̧tä̧ tu̧ru̧hua̧ ru̧hua̧ jö̧nä̧tä̧ ku̧ni̧nä̧tö̧, ja̧u̧mä̧ Israel ttö̧ja̧rö̧ jö̧nä̧tä̧ ku̧ni̧nä̧tö̧, ja̧u̧mä̧ israel ttö̧ja̧rö̧ Diosttö 'quȩ'ȩpö̧ icuinö ja̧hua̧nö̧ jȩo̧mȩnä̧ Dios ä'cattö rö̧ä̧nä̧ suronä jȩpi̧nö̧. ²² Israel ttö̧ja̧mä̧ Jeroboan su̧rä̧jä̧mä̧nä̧ oipa'acutä 'chi̧nä̧tö̧, suronä jȩttö̧mä̧ icuipocotö pi̧nä̧tö̧. ²³ Röjinä, Diosmä Israek ttö̧ja̧ttö̧mä̧ 'quȩ'i̧pä̧chi̧nö̧, Dios i̧huȩnȩ jiäcuähuä ttö̧ja̧nä̧ ucuocuinö'a̧nö̧tä̧, ja̧hua̧nö̧ ja̧'a̧ttö̧ Israel ttö̧ja̧mä̧ jitötä tti̧rȩja̧'a̧ ttȩmi̧pi̧nä̧u̧ Asiriara'a, jitä mo̧ro̧ jubötä jua'atä kä̧tö̧. ²⁴ Asiria ru̧hua̧mä̧ Babiloniara'attö̧'i̧nä̧, Cutara'attö'inä, Ava ra'attä'inä, ttamat'ttöinä, Sefarvainttö'inä, ttö̧ja̧rö̧ 'cächinö, juätörö Israel ttö̧ja̧ ttötahuiyä Samarianä ku̧ni̧nö̧ juätömä ttidepiyötä juepö, juȩnȩ ötahuiyänätä̧ ka̧cui̧nä̧tö̧. ²⁵ A̧cuo̧mȩnä̧ji̧ juä̧nȩ ttö̧ja̧ pä'ö tti̧rȩbȩhuo̧mȩnä̧mä̧ Diosmä esetocotö pi̧nä̧tö̧. Ja̧hua̧nö̧ ja̧'a̧ttö̧ Diosmä mö̧yä̧hui̧tö̧rö̧ hueinö, juätömä yotucunärö cuä'ö icuinätö̧. ²⁶ Ja̧hua̧nö̧ ja̧u̧ juätömä Asiria ru̧hua̧rö̧ ucuocu pä'inätö̧. Ötahuiyä u̧mi̧ttö̧ i'cächö Samarianä cu̧ju̧ni̧nä̧u̧ pi̧nä̧tö̧mä̧, Dios pi̧jä̧ttö̧ jȩpö̧ ttö̧ja̧ pä'ö hueinömä jerupätö. Ja̧hua̧nö̧ ttieruhua'attö ttö̧'cä̧tȩnä̧ mö̧yä̧hui̧tö̧rö̧ huea'a topöjä. Juätö mö̧yä̧hui̧tö̧mä̧ ttö̧ja̧rö̧ cuä'ö icuätö, Dios pi̧jä̧ttö̧ hueinö jȩpö̧ ttö̧jo̧ca̧'a̧ttö̧. ²⁷ Asiria ru̧hua̧nä̧ hueönö päinäu̧: Samaria ra'attö Dios i̧huȩnȩ jiäcuähuä ttö̧ja̧, jua'attö cui'cächatucuarumä, jua'atä ttö̧ja̧ oipätucuitö, jua'attötä juä̧jä̧ttö̧ Dios päinö huȩnȩ jitähuäcuotö. ²⁸ Samariattä ttȩmi̧pi̧nä̧u̧ Dios i̧huȩnȩ jiäcuähuä ttö̧ja̧ttö̧ ya̧tȩ, ichö Betelnä ki̧nö̧, juȩnȩtä̧ kä̧nö̧ Di̧osrö tteseta pä'ö jiähuinö. ²⁹ Ja̧hua̧nö̧ ja̧'a̧nä̧ ko̧ro̧jä̧ttö̧ ichäcuähuotömä ttö̧ä̧nä̧hua̧tö̧rö̧tä̧ tätö ku̧nu̧ aditinätö̧ juätörömä Samaria ttö̧ja̧ ttaditinö ode ju'tä ku̧ni̧nä̧tö̧, ttö̧jo̧mȩ pö̧nä̧. ³⁰ Babilonia ttö̧ja̧mä̧ dios negalrö aditinätö̧, Hamat ttö̧ja̧mä̧ dios Asimarö aditinätö̧. ³¹ Aveo ttö̧ja̧mä̧ dios Nibhazrö'inä - Tartac'rö'inä aditinätö̧. Serfaditamä tti̧tti̧mu̧rö̧ ku icu iyinätö̧ Adramelec'rö'inä - Anamelec'röinä, jätömä Serfarain ttö̧ä̧nä̧huo̧ttö̧ ji̧na̧'a̧. ³² Järeunä ichätömä Diosrö'inä esetinätö̧ jätömä pä̧huä̧rö̧ja̧'a̧nö̧ huotörö Dios päö huȩnȩ jiäcuähuä ttö̧ja̧ jö̧nä̧ ku̧ni̧nä̧tö̧ pä̧huä̧rö̧ ja̧'a̧nö̧ ttiya pä'ömä. ³³ Diosrö'inä teseta'anö yitö ttö̧ä̧nä̧hua̧rö̧ esetinätö̧ korome ttö̧ja̧ jȩttö̧'a̧nö̧tä̧ jȩpi̧nä̧tö̧. ³⁴ Jitö pi̧yȩ mo̧ro̧ jubötä, ttä̧do̧tö̧mi̧nä̧'i̧nä̧ jȩtti̧nö̧'a̧nö̧tä̧ jȩpö̧ ka̧cuä̧tö̧, Diosrö'inä esetocotö hueinö'anömä jȩpo̧ci̧tö̧. Javobmi̧nä̧ ahuaruhuä 'cotörömä jȩttä̧cuä̧'i̧nä̧ huȩyu̧tö̧ ku̧ni̧nö̧, i̧mi̧mä̧ pärotö icuinäcu Israel jö̧nä̧tä̧. ³⁵ Israel ttö̧ja̧cu̧ jueönä ucuocu ku̧nä̧huä̧nä̧ pä'inö korotö ttö̧ä̧nä̧hua̧tö̧rö̧ ucuotö jȩtta̧i̧a̧nö̧mä̧ jȩcuä̧tu̧cuä̧ ä'cattö jä̧rȩyö̧ päiö'inä jȩcuä̧tu̧cuä̧, ku icu iyähuä'inä jȩcuä̧tu̧cuä̧. ³⁶ Diosrötä esetätucui. Egiptottö ujurucu rä'opö icuinörö̧tä̧, ja̧u̧ Chuä̧cua̧rö̧tä̧ esetö cuiäre iyähuä'inä iyätucui. ³⁷ Ucuotönö ttö̧huȩcuä̧nä̧ Dios hueipinömä jȩpä̧tu̧cui̧, hueähuä huȩnȩ'i̧nä̧ huȩyu̧tö̧ iyinö, korotörumä cuesetätucuo. ³⁸ Dios ucutucu jueö pähuänä ucuocu u̧ju̧ni̧nö̧mä̧ cunichiätucuo ja̧hua̧nö̧ jö̧ttö̧ ka̧ra̧ diosrömä cuesetätucuó. ³⁹ Dios Chuä̧cua̧rö̧tä̧ ja̧u̧tä̧ ja̧'a̧ ta̧bo̧cha̧ ujuruttö tö̧ji̧pö̧nä̧ jȩä̧cua̧mä̧. ⁴⁰ Ja̧hua̧nö̧ ja̧'a̧nä̧ esetocotö pinätö̧; ttä̧do̧tö̧mi̧nä̧ jȩtti̧nö̧'a̧nö̧tä̧ jȩpi̧nä̧tö̧. ⁴¹ ja̧hua̧nö̧tä̧, jareönä ka̧cuä̧tö̧mä̧ Diosrötä esetinätö̧, tteseta'anäi̧nä̧ jitötä ttö̧ä̧nä̧hua̧rö̧'i̧nä̧ esetinätö̧, jitä pi̧yȩ mo̧ro̧ jubötä tti̧tti̧mö̧ 'cotö'inä ja̧hua̧nö̧tä̧ jȩpi̧nä̧tö̧.