¹ Diescisieste du'onä Rumalias i̧tti̧ Peka ruhuo huinö pänä, Jotán i̧tti̧ Acazmä ruhuo de'äcänä 'chä'ächinö. ² Acazmä veinte du'o jo̧mȩnä̧ ku̧nä̧rö̧ ru̧hua̧ jö̧nä̧ huea päö kä̧mä̧di̧nö̧. Ja̧hua̧nö̧ ja̧'a̧ttö̧ Jerusalenämä diesciseis du'o jo̧mȩnä̧ hueinö, ja̧hua̧nö̧ ja̧'a̧nä̧ Acazmä U̧ru̧hua̧ Dios esehuome päteömä jȩpo̧cö̧ pi̧nö̧ jä̧do̧ Davidminä jȩi̧nö̧'a̧nö̧ jö̧nä̧mä̧. ³ Tiejicu ji̧nö̧mä̧, Israel ttö̧ja̧ ruhuotöttömä surojötä i̧jȩcuä̧chö̧nä̧ 'chä̧nö̧ icuinö, chutä i̧tti̧rö̧mä̧ ocuränä ku icu iyähuä iyinö, pi̧jä̧ jȩttö̧'a̧nö̧ jö̧nä̧. Ja̧u̧ juäimä Ttu̧ru̧hua̧ do'opö icuinö ji̧na̧'a̧ Israel ttö̧ja̧ ttä'ca jo̧mȩttö̧mä̧ . ⁴ Ja̧u̧mä̧ iyinö öäre iyähuämä a̧mȩu̧ juäi ku icu ju'tojujö ocunä dea jo̧mȩttö̧ ja̧hua̧nö̧ ja̧'a̧nä̧ dau jite pönä jatuhuäi kada'ca jo̧mȩttö̧. ⁵ Ja̧u̧nu̧ o'ca'a Rezin Siriattö ru̧hua̧'i̧nä̧, Ramalías i̧tti̧ Pecaj Israe ttö̧ja̧ ttu̧ru̧hua̧'i̧nä̧ 'chi̧nä̧tö̧ Jerusalen ra̧'a̧cu̧ Acazrö ttöröhuähua pä'ö, ötahuiyä soböcuächönä. Ttoecuächinätö̧ ja̧hua̧nö̧ ja̧'a̧nä̧ 'choipocotö pi̧nä̧tö̧. ⁶ Ja̧u̧nu̧ pä̧nä̧mä̧ Rezin Siria rȩjȩ ru̧hua̧mä̧ Elaz ötahuiyä ppä'ädinö Arameo ttö̧ja̧tä̧ ttö̧ja̧ pä'ö. Ja̧hua̧nö̧ ja̧'a̧ttö̧ Juda umöhuäyotö u̧mä̧tö̧rö̧mp rä'epö icuinö Elat ötahuiyänämä ja̧hua̧nö̧ ja̧'a̧nä̧ Arameos ttö̧ja̧tä̧ ichinätö̧ Elat ötahuiyänämä. Ja̧u̧nu̧ ttö̧jä̧mä̧di̧na̧mä̧ jitä mo̧ro̧ päiönä ju̧huȩnȩtä̧ kä̧cuä̧tö̧. ⁷ Acazmä pa'anö jö̧nä̧ hueinö jiäcuähuä ttö̧ja̧rö̧ Siriattö ru̧hua̧ Tiglat Pileserä pi̧yȩ jiäcuähuä jittähuiyarö pä'ö: "Ttömä ucutä cu̧mu̧hua̧yä̧ cha'anä ucutä cui̧tti̧sä̧ ppäcuhuädattö pä'ö ichi Arameo ttö̧ja̧ ttu̧ru̧hua̧ umöttö'inä, Israel ttö̧ja̧ ttu̧ru̧hua̧ umöttö'inä, jahuätömä ttöcu rohuähuätö". ⁸ Ja̧hua̧nö̧ ja̧'a̧ Acazmä ȩmi̧nö̧ pärätä'inä, oro'inä u̧ru̧hua̧ ojusodettö ö̧'o̧cui̧ä̧i̧jmä̧, juhua'a jö̧ta̧'a̧nö̧ ruhuo isodettö uruhuo jahuä päi'önä ka̧cu̧ttu̧'i̧nä̧ ȩmi̧nö̧, ja̧u̧mä̧ mippo'önä iyähuä päiönä hueö icuinö Asiria rȩjȩttö̧ ru̧hua̧ öäre päiönä. ⁹ Ja̧u̧nu̧ o'ca'amä Asiriattö ru̧hua̧mä̧ a̧ju̧cui̧nö̧ ja̧u̧ jäepäjimä. Ja̧hua̧nö̧ ja̧'a̧ttö̧ Damasco ttö̧ja̧rö̧ rohuäu icu 'choipinö ja̧u̧ ötahuiyämä ja̧u̧nu̧ o'ca'amä ttö̧ja̧rö̧mä̧ ȩmi̧pi̧nö̧ Quirta umöhuäyotö päi'önä, ja̧u̧mä̧ Arameottö ru̧hua̧ Rezinrö'inä cuä'ö icuinö. ¹⁰ Ja̧hua̧nö̧ ja̧'a̧ ru̧hua̧ Acazmä Damazascora'a 'chi̧nö̧ Asiattö ru̧hua̧ Tiglat Pileserö toäcuähua pä'ö. Damasco ötahuiyättömä topinö isarö cuäö icu iyähuodä ka̧'a̧, ru̧hua̧ Acazmä hueinö Sacerdote jö̧nä̧ adicuä'i̧sa̧ Uriasrö yojäte adicuojä. Isarö cuäö icu iyähuodä a̧u̧cuä̧ o'ca juiyönä ji̧yȩcu̧ pö̧nä̧ jö̧ ta̧'a̧nö̧ adicua'a. ¹¹ Ja̧hua̧nö̧ ja̧'a̧ Uriasmä aditinö i̧sa̧rö̧ cuä'ö icu iyähuodä ru̧hua̧ Acaz Damacora'attö hueö kä̧nö̧ jiähuäji'anötä̧ jö̧nä̧. Ru̧hua̧ Acazmä Damascora'attö ppa̧huä̧chä̧cua̧'a̧ äcanänö cä'ädinä. ¹² Ru̧hua̧mä̧ Damascora'attö i̧rȩbȩhuo̧mȩnä̧ ja̧u̧mä̧ topinö isarö cuäu icu iyähuodä ka̧'a̧. Ru̧hua̧mä̧ tö'cö päiönömä juhuorörä öäre iyähuä iyinö. ¹³ Ja̧u̧mä̧ ku icu iyähuä jȩpi̧nö̧; cuähuä u̧huä̧ju̧ttö̧ iyähuä'inä jȩpi̧nö̧, ahuähuoyattö iyähuä'inä toächinö, juhua'a jö̧ta̧'a̧nö̧ esecuähuätä ka̧ pä'ö iyähuodänämä i̧sa̧ ucuoja riripinö. ¹⁴ Brocen isodä u̧ru̧hua̧ äca jome ki̧nö̧dä̧mä̧, Diosrö ucuocuäcuähuode ä'ca i'cächinö Diosrö ucuocuäcuähuodecu brocen isodäcu 'cä̧tȩ jo̧mȩmä̧ avo ja̧'a̧cu̧ ja̧'a̧nä̧mä̧ ku̧ni̧nö̧ chutä öärodä jareodä isarö cuäö icu iyähuädä. ¹⁵ Ja̧u̧nu̧ o'ca'amä ru̧hua̧ Acazmä sacerdote hua̧ Uríasrö hueö pä'inö: "rö̧ä̧ö̧ juäi iyähuodämä mo̧ro̧ päia'a iyähuämä ku icu i̧yi̧, cuähuä u̧huä̧ju̧ttö̧ iyähuämä ni̧pä̧ro̧mȩ ja̧'a̧cu̧ iyi, ru̧hua̧ öäre iyähuä'inä, o'catoinä ttö̧ja̧ rȩjȩnä̧ ka̧cuä̧tö̧rö̧ amöcuädö iyähuä huä̧jo̧dä jutämä i̧sa̧. Ucuo riripätucui. Ja̧hua̧nöö̧ ja̧'a̧nä̧ bronce isodemä ttötä Dios ppädättö pä'ö jäepö jȩchä̧cuodä". ¹⁶ Sacerdote Uriasmä o'ca juiyönä ru̧hua̧ Acaz hueäjimä pa̧ja̧cuä̧chö̧nä̧ jȩpi̧nö̧. ¹⁷ Ja̧hua̧nö̧ ja̧'a̧ ru̧hua̧ Acazmä kada'ca 'chu̧huä̧rö̧ o'ca pporädö icuinö. Ja̧hua̧nö̧ ja̧'a̧ttö̧ ttö̧mö̧ töcäcuähuä ötahuiyä'inä ȩmö̧ icuinö; ja̧u̧mä̧ pä̧cä̧yö̧ brocenttö adicuotö ttedea'anä ro̧ya̧ ajiya'inä ȩmö̧ icuinö, ja̧hua̧nö̧ ja̧'a̧ rȩjȩnä̧mä̧ rötinö inähuä. ¹⁸ Asiria ru̧hua̧ttö̧ i̧mi̧cu̧nä̧ ji̧yä̧cu̧ U̧ru̧hua̧rö̧ ucuotö jȩä̧cuä̧huodettömä ȩmö̧ icuinö, sabado mo̧ro̧ jö̧ a̧u̧cuä̧ ucuotönö eseu jȩtta̧ pä'ö, juhuoröttötä 'tö'ö adicuä ji̧nö̧mä̧. Juhua'a jö̧ta̧'a̧nö̧ jö̧nä̧ ru̧hua̧ doächäcuome uminä'inä. ¹⁹ Ru̧hua̧ Acaz hueinö pänä 'cuäopinömä Judasttö ruhuotö pinätö̧ jȩtti̧nö̧ a̧u̧cuä̧ huȩyu̧cuä̧ cuyärö'tänä huȩyu̧cui̧'i̧na̧'a̧tä̧ ka̧'a̧. ²⁰ Acazmä huaö icuinö, ja̧hua̧nö̧ ja̧'a̧ jä̧o̧tö̧ mi̧nä̧cu̧tä̧ 'turu tticuinäcu Davidminä öäre ötahuiyänä. Ja̧hua̧nö̧ ja̧'a̧ttö̧ ja̧u̧ o'ca'anämä chutä i̧tti̧ Ezequiastp ru̧hua̧ päi'inö.