¹ Ttö̧ja̧sa̧ ya̧tȩnö̧ a̧'ȩ päiomenä Joroboamä Israel Tu̧ru̧hua̧ pä'inö ji̧na̧'a̧, Azaria ruhuo huea ppä'ö rötädinödo Amasia ki̧tti̧ ji̧na̧'a̧ ja̧u̧mä̧ Juda ru̧hua̧. ² Azarias ruhuo huea päö ö̧ja̧mä̧di̧nö̧mä̧ tu̧mu̧ to̧mȩrȩnö̧ ja̧'a̧nä̧ tti̧jä̧pu̧ttö̧ yo'chetenö a̧'ȩ hui̧nö̧do. Ja̧u̧mä̧ ruhuonä pänö ttö̧ja̧ ta̧ju̧nu̧ ja̧'a̧nä̧ yabocu todäre a̧'ȩ jo̧mȩnä̧ ru̧hua̧ kä̧nö̧ hueinö Jerusalenä. Ja̧u̧ a̧ju̧ ki̧mi̧mä̧ micuinäju ji̧na̧'a̧ Jecolia päö Jerusalen ttö̧ja̧sa̧ju ja̧'a̧ttö̧. ³ Ja̧u̧mä̧ Tu̧ru̧hua̧ Tö̧ä̧nä̧hua̧ to̧ä̧ro̧mȩ a'cattömä juȩnä̧ a̧'cua̧ huȩnä̧ri̧nö̧ ji̧na̧'a̧ jä'o a̧'cua̧ huȩnä̧ri̧nö̧ 'chä̧nö̧ ö̧ji̧nö̧'a̧nö̧tä̧ ja̧hua̧ta̧'a̧nö̧ jȩpi̧nö̧do Amasia jȩi̧nö̧'a̧nö̧. ⁴ Ja̧hua̧'a̧nö̧ ja̧'a̧nä̧, jutoju jö̧ o̧du̧nä̧ttömä jȩpu̧ icuähuoca'a ji̧na̧'a̧do tocu päö ttöäre icienso kuicu i̧yä̧huä̧ ji̧nä̧ jȩtta̧'a̧ttö̧. ⁵ Ja̧u̧ U̧ru̧hua̧ Ö̧ä̧nä̧hua̧ a̧'cua̧ ta̧huȩcu̧nä̧ jȩpi̧nö̧ ja̧u̧ ru̧hua̧rö̧mä̧, lepra märiche kä̧mu̧nä̧ jȩi̧nä̧cu̧ huaö icuome jubu päinönä ja̧hua̧ta̧'a̧nö̧ ojusodenämä katä kȩ'ȩpu̧ icuähuätä ki̧nö̧do. Jotamä, ru̧hua̧ i̧ttti̧ ji̧na̧'a̧, ruhup isodenä kä̧nö̧ juä̧jä̧ rȩjȩnä̧ ru̧hua̧ pä'iönä hueö ki̧nö̧ ötahuiyä ttö̧ja̧rö̧. ⁶ Azaria koro jȩi̧nö̧mä̧, o'ca juiyönä jȩi̧nö̧mä̧ ¿Huȩyu̧tu̧ ku̧nä̧huo̧ca̧'a̧ ji̧na̧'a̧di̧ Judas ruhuotö jȩtti̧nö̧ cronica cuyärunämä? ⁷ Ja̧hua̧ta̧'a̧nö̧ Azariamä jäo mi̧nä̧ ä'i'ina'anötä̧ ä'i'inö jä̧o̧tö̧ mi̧nä̧cu̧tä̧; jahuätötä ttu'turinäcudo ö̧tä̧mu̧ mi̧nä̧ i'co jähuä ttötinome ji̧no̧mȩ David minä ötahuiyänä. Jotamä Azaria i̧tti̧ ji̧na̧'a̧ mi̧nä̧ jäo hueinome o'come huea pä'ö pä̧mä̧di̧nö̧ ruhuonä. ⁸ Ttö̧ja̧sa̧ ya̧tȩnö̧ ödo'chiyä ja̧'a̧nä̧ ka̧ra̧ u̧mu̧ttö̧ yo'chetenö a̧'ȩ jo̧mȩnä̧ Azariamä Juda ruhuo hueö ki̧nö̧ ji̧na̧'a̧, Zacariamä Jeroboam i̧tti̧ ji̧na̧'a̧do Israel ttö̧ja̧rö̧ ruhuo hueö ki̧nö̧do Samarianä ttumu jimutenö ja̧'a̧nä̧ ko̧ro̧mu̧ttö̧ yochetenö cä̧hua̧tö̧ jo̧mȩnä̧. ⁹ Ja̧u̧mä̧ U̧ru̧hua̧ Ö̧ä̧nä̧hua̧ to̧ä̧ro̧mȩ a'cattö surojutä jȩpi̧nö̧do, "jäo minä jȩi̧nö̧ ji̧na̧'a̧nö̧tä̧. Ja̧u̧mä̧ Jeroboam suronä jȩa̧ pä'ö amucuädö ji̧nö̧tttö̧mä̧ jaropiocö pinödo Nabat i̧tti̧ ji̧na̧'a̧ ja̧u̧mä̧, ja̧u̧ ji̧na̧'a̧do Israel ttö̧ja̧ kȩi̧pä̧chö̧ jȩcuä̧huä̧ ttamucuädönä päiönä jȩpi̧nö̧. ¹⁰ Ja̧hua̧nö̧ ji̧yä̧cu̧ Salumä, Jabe i̧tti̧mä̧, ja̧u̧ abo'chatä̧ pä'i'inödo ja̧hua̧ta̧'a̧nö̧ idiyahuächiönä cuäji'ca̧ ötahuiyä ttö̧ja̧ ttä'cattö cuäö icuinäcudo, ja̧u̧ o'come ruhuonähueö ki̧nö̧do. ¹¹ Zacaria koro jȩi̧nö̧mä̧, huȩyu̧cua̧'a̧ ka̧'a̧ cronica cuyärunä Israel ruhuotö jȩpu̧ ttö̧ji̧nö̧mä̧. ¹² Pi̧yȩ ji̧na̧'a̧ Jehurö U̧ru̧hua̧ Ö̧ä̧nä̧hua̧ i̧huȩnȩ jiähuinömä: "Ucu cui̧tti̧mä̧ttö̧ pa̧ja̧cuä̧nö̧ jo̧mȩ päiomenä Israel ttö̧ja̧ turuhuotö ruhuonä hueö ttö'inome tto̧'ä̧cuo̧tö̧ ja̧hua̧ta̧'a̧nö̧ 'cuäopäcua'a. ¹³ Jabe i̧tti̧ Salumä ruhuo huea pä'ö rötädinödo ttö̧ja̧sa̧ ya̧tȩnö̧ ja̧'a̧nä̧ ka̧ra̧ u̧mu̧ tomurenö koromuttö̧ pa̧ja̧cuä̧nö̧ a̧'ȩ ji̧na̧'a̧ Azarias ruhuonä hueina'amä Juda ttö̧ja̧rö̧ ja̧hua̧ta̧'a̧nö̧ ja̧u̧ ttö̧ja̧mä̧ yaute kä̧hua̧ jo̧mȩtä̧ ruhuo hueinö Samarianämä. ¹⁴ Manahemä GAdi i̧tti̧ ji̧na̧'a̧do ja̧u̧mä̧ 'cha'achö 'chi̧nö̧do Tirsara̧'a̧ttö̧ Samariacu. Juoröttö ttoepu 'chuädinödo Jabe i̧tti̧ Salumrö̧ Samariattö. Ja̧u̧tä̧ cuäö icuinäcudo ja̧hua̧ta̧'a̧nö̧ cuäö icuäji'ca̧ ja̧u̧ru̧ ru̧hua̧ pä'inödo ja̧u̧ hueäijome ji̧no̧mȩmä̧. ¹⁵ Koro Salum jȩi̧nö̧mä̧, ja̧hua̧ta̧'a̧nö̧ jȩpu̧ pä'ö huȩnȩ jȩi̧nö̧mä̧, cronica cuyärunä huȩyu̧tö̧ rötähua'ado Israel ruhuotöttötökömä. ¹⁶ Ja̧u̧nö̧ o'comenä Mahahemä Tirsattö'inä o'catoiö'närö̧ 'chu̧ä̧dä̧ji̧ca̧ cuäcuäpu icuinödo juȩnȩ ka̧cui̧nä̧tö̧rö̧mä̧, ja̧hua̧ta̧'a̧nö̧ Tirsa jäyäcu kä'co pä'teö jo̧mȩ'i̧nä̧ dä̧bu̧ pä'ö jahuätömä ötahuiyänä doächa pä'ö baepocotö pinätödo ja̧u̧ru̧. Ja̧u̧mä̧ pa̧'a̧nö̧ jȩpi̧nö̧do̧ o'catoiönä nä̧tö̧ muchotö cuä'ä'chö icuinödo ja̧u̧ ötahuiyättömä. ¹⁷ Ttö̧ja̧sa̧ ya̧tȩnö̧ ja̧'a̧nä̧ ka̧ra̧ u̧mu̧ttö̧dä̧ ja̧'a̧nä̧ i̧jä̧pi̧yu̧ pa̧ja̧cuä̧nö̧ a̧'ȩ päiönä Azariasruhuo hueinö pänä ji̧na̧'a̧ Manahem Judanä ruhuo huea päö ö̧jä̧mä̧di̧nö̧mä̧ Gadi i̧tti̧ ja̧u̧mä̧ Israel ötahuiyä ttö̧ja̧rö̧ ruhuonä huea pä'ö cä̧mä̧di̧nö̧do to̧mu̧rȩnö̧ a̧'ȩ jo̧mȩnä̧ Samarianä. ¹⁸ Ja̧u̧mä̧ U̧ru̧hua̧ Ö̧ä̧nä̧hua̧ to̧ä̧ro̧mȩ ä'cattö suronä jȩpi̧nö̧do. O'cajuiyönä a̧'cua̧rö̧ ö̧jä̧i̧mä̧, ja̧u̧ ttö̧ja̧sa̧mä̧ Jeronoam suronä jȩi̧nö̧ttö̧mä̧ jaropiö 'quȩi̧pä̧cha̧ pä'ömä amucuädocö pinödo, Nabat i̧tti̧ ji̧na̧'a̧do ja̧u̧tä̧ ji̧na̧'a̧do Israel ttö̧ja̧ suronä jȩttö̧nä̧ jȩpi̧nö̧mä̧. ¹⁹ Ja̧u̧nö̧ o'ca'a Asiria ru̧hua̧ Pulmä' ichinö rohuähuö rȩjȩ 'choipa pä'ö ,ja̧'hua̧ta̧'a̧nö̧ Manahenmä Pulrö iyinö mil talento plata jo̧mȩnä̧, ja̧u̧ru̧ ru̧hua̧ Pulrö ppä'ädö ja̧huä̧jä̧ rȩjȩ Israel ttö̧ja̧'chottipö juiyönä 'chuä̧rä̧cuä̧hua̧ pä'ö. Pärätä ö̧'o̧cui̧'a̧ pä'ömä ²⁰ Manahemmä o'catoi'önä ruhuotörömä̧ ujurunä jä'epinö ru̧hua̧rö̧ mi̧tä̧huä̧rö̧ ö̧ja̧ pä'ö rȩjȩ 'choipa'acu ya'utenätämä tti̧mi̧tähua pä'ö ji̧na̧'a̧ cincuenta ciclo de plata jo̧mȩnä̧ ja̧u̧ Asiria ru̧hua̧rö̧mä̧. Ja̧'hua̧ta̧'a̧nö̧ Asiria ru̧hua̧mä̧ ppa̧'ä̧chi̧nö̧ i̧rȩjä̧ra̧'a̧cu̧. ²¹ Koro huȩnȩ o'cajuiyönä̧ Manahem jȩi̧nö̧mä̧¿huȩyu̧tu̧ rutähuoca'a tä̧ji̧ Israel ahuaruhuä 'cotö hueähuä ruhuotö tti̧mi̧ huȩyu̧tu̧ rötähuä'tänämä? ²² Ja̧'hua̧ta̧'a̧nö̧ Manahemmä 'corujuo'ächinö,jä̧do̧tö̧ mi̧nä̧ 'corujuottächinö'anötä ja̧'hua̧nö̧ 'corujuo'ächäji o'ca'a i̧tti̧ Pekaiatä ruhuo hue'ö ki̧nö̧ ju'hua'a yabocumä. ²³ Manahen i̧tti̧ Pekaiamä i̧tti̧ Azarias cincuenta a̧'ȩ u̧ju̧nä̧ra̧'a̧ ruhuo hue'ö kä̧mä̧di̧nö̧ Samaria rȩjȩttö̧ Israel ttö̧ja̧rö̧mä̧; ja̧u̧mä̧ juȩnȩmä̧ hue'inö todäre a̧'ȩ jo̧mȩnä̧. ²⁴ Ja̧'hua̧nö̧ ja̧'a̧nä̧ ja̧u̧mä̧ surojönätä hue'inö Tu̧ru̧hua̧ ä'ca jo̧mȩttö̧. Ja̧u̧mä̧ surojömä icuipocö pinö Nabat i̧tti̧ Jeroboam jȩi̧nö̧mä̧, ja̧u̧nä̧tä̧ pä'i'ö Israel ttö̧ja̧ suronä jȩttö̧nä̧ jȩpi̧nö̧. ²⁵ Ya̧tȩ su̧ro̧da̧u̧ ttu̧ru̧hua̧ Peka pä'ö mi̧cua̧, Remalia i̧tti̧mä̧,yo̧huȩö̧nä̧tä̧ jȩpö̧ ku̧ni̧nö̧ Pekaiarö cuä'ö icua pä'ö. Cincuentanö huotöcu Galaadita ttö̧ja̧cu̧ ppä'ädäcuähuö ja̧'hua̧ta̧'a̧nö̧ Argog'inä, Arie'inä, Pekamä cuä'ö icuinö ru̧hua̧ Pekaiasrö ruhuonä hue'ö päcuähuode jacuättö. ²⁶ Ja̧hua̧ta̧'a̧nö̧ ru̧hua̧ Pekaia ucuocuinö'inä , o'cajuiyönä jȩi̧nö̧'i̧nä̧, cuyäru'tänä huȩyu̧tu̧ rötähua'a pa̧'a̧ Israel ahuaruhä 'cotö tti̧mi̧ huȩyu̧cuä̧'tä̧nä̧mä̧. ²⁷ Remalia i̧tti̧ peka ruhuo hue'ö kä̧mä̧di̧nö̧ Israel ttö̧ja̧rö̧mä̧ i̧tti̧ Azariamä cincuenta y dos a̧'ȩ u̧ju̧nä̧ro̧mȩnä̧; ja̧u̧mä̧ hue'inö ja̧huä̧jä̧ rȩjȩnä̧mä̧ veinte a̧'ȩ jo̧mȩnä̧. ²⁸ Ja̧u̧mä̧ suronä jȩpi̧nö̧ Tu̧ru̧hua̧ ä'ca jo̧mȩttö̧. Ru̧hua̧ Pekamä̧ Ö̧ä̧nä̧hua̧ Diosrömä u̧ni̧chi̧'i̧nö̧, ja̧'hua̧nö̧ ja̧'a̧nä̧ ja̧u̧mä̧ surojömä icuipocö pi̧nö̧ Nabat i̧tti̧ Jeroboam Israel ttö̧ja̧rö̧ surojö jȩtta̧ pä'ö hueinömä. ²⁹ Ja̧'hua̧ta̧'a̧nö̧ ja̧u̧nu̧ mo̧ro̧ ,Tiglat Pileser Asiria rȩjȩ ru̧hua̧mä̧ ichö 'cho'ipinö, ötahuiyä Ijon'nä, Abel Betel Maaca'inä, Janoa'inä, Cades'inä, Hazor'inä, Galaad'inä, Galilea,inä ja̧'hua̧ta̧'a̧nö̧ o'cajuiyönä Neftali ahuaruhuä 'cotö tti̧rȩjä̧ o'cajuiyönä. Ja̧u̧mä̧ ötahuiyä jö̧ a̧'u̧cuä̧ ka̧cuä̧tö̧rö̧mä̧ 'chu'ädö ȩmi̧pi̧nö̧ cärenä öta pä'ö Asiria rȩjȩra̧'a̧. ³⁰ Ja̧'hua̧nö̧ ja̧'a̧ttö̧ Ela i̧tti̧ Oseamä rohuähuö cuä'ö icuinö Remalia i̧tti̧ Pekarö. Ja̧hua̧nö̧ jȩpö̧ Oseamä ja̧u̧ hueä'ijö o'come ruhuo huämädinö, Ozia i̧tti̧ Jotam veinte a̧'ȩ u̧ju̧nä̧ra̧'a̧ hue'ö kä̧mä̧di̧nö̧ Juda ahuaruhuä 'cotörörö. ³¹ O'cajuiyönä Ru̧hua̧ Peka jȩi̧nö̧mä̧ cuyäru'tänä huȩyu̧tu̧ rötähua'a pa̧'a̧ Israel ahuaruhuä'cotö ruhuo hue'inätö tti̧mi̧ huȩyu̧tu̧ rötähuä'tänä. ^{32 33} Ozias i̧tti̧ Jotammä Juda ahuaruhuä 'cotö tti̧rȩjä̧nä̧ hue'ö ö̧jä̧mä̧di̧nö̧ pä̧nä̧mä̧ veinticinco a̧'ȩ ku̧nä̧ri̧nö̧, ja̧u̧nö̧ pä̧nä̧mä̧ ru̧hua̧ Pecahmä todäre a̧'ȩ päi'önä hue'ö ki̧nö̧ Israel rȩjȩnä̧mä̧. Ja̧u̧mä̧ Jerusalennä̧ kä̧nö̧ hue'inö dieciseis a̧'ȩ jo̧mȩnä̧. Ja̧ju̧mä̧ micuinäju Jerusa pä'ö; Jahuäjumä Sadoc pä'ö micuaju kittiju ji̧na̧'a̧ ³⁴ Jotammä U̧ru̧hua̧rö̧tä̧ ucuotö jȩpi̧nö̧ Tu̧ru̧hua̧ ä'ca jo̧mȩttö̧. o'cajuiyönä jä'o Azarias a̧'cua̧ huȩnä̧rö̧ jȩi̧nö̧ta̧'a̧nö̧. ³⁵ Ja̧'hua̧nö̧ ja̧'a̧nä̧ Jotammä Dios ojusode ju'toju i̧sä̧jä̧ äpate isodä röodä ku̧nu̧ aditinö , ja̧hua̧nö̧ ja̧'a̧nä̧, ppo̧ö̧ odehuiyämä jȩpö̧ icuocö pinö möä'quiyu ppo̧ö̧ o̧'ca̧nä̧ huȩjö̧mä̧, ttö̧ja̧ ja̧u̧ odehuiyänä 'chä̧nö̧ i̧sa̧rö̧ ku'icu iyähuome a̧mȩhuö̧'i̧nä̧ ttö̧ä̧nä̧huo̧tö̧ tätähuä ucuotö jȩttä̧'i̧jo̧mȩmä̧. ³⁶ O'cajuiyönä Jotam jȩi̧nö̧mä̧ ¿cuyäru'tänä huȩyu̧tu̧ rötähuoca'a tä̧ji̧ Juda ahuaruhuä 'cotö ruhuo hue'ö jȩtti̧nö̧ huȩyu̧tu̧ rötähuä'tänämä? ³⁷ Ja̧u̧nu̧ mo̧ro̧, Tö̧ä̧nä̧hua̧ Dios hue'inö Rasinrö̧ Asiria rȩjȩ ru̧hua̧rö̧, ja̧'hua̧ta̧'a̧nö̧ Israel rȩjȩnä̧ hueähuä i̧sa̧rö̧, ru̧hua̧ Pekarö'inä, Juda rȩjȩ ru̧hua̧rö̧ ttörohuähua pä'ö. ³⁸ Ja̧u̧nu̧ o'ca'a Ru̧hua̧ Jo̧ta̧mmä̧ 'corujuo'ächinö,'turu tticuinäcu Jä̧do̧mi̧nä̧ Davidmi̧nä̧ öäre ötahuiyänä. Ja̧u̧nu̧ o'ca'a ja̧u̧ mi̧nä̧ hueä'ijö 'comȩmä̧ pä̧ro̧cua̧ i̧tti̧'ca̧ Acaztä ruhuo hue'inö ju'hua'a yabocumä.