¹ Joás todäre a̧'ȩ päi'önä hue'inö, Joacaz i̧tti̧ ji̧na̧'a̧ Israel ru̧hua̧, Amasías Joás i̧tti̧, Judá ru̧hua̧, ruhuo hue'ö kä̧mä̧di̧nö̧. ² Ja̧u̧mä̧ ku̧nä̧ri̧nö̧ tä̧ju̧ ji̧mu̧tȩnö̧ jo̧mȩ(25) a̧'ȩ ji̧yȩnö̧ ruhuo kä̧mä̧dö̧ hue'inömä; Ja̧u̧mä̧ hue'inö ta̧ju̧ji̧mu̧tȩ pa̧ja̧cuä̧nö̧(29) a̧'ȩ jo̧mȩ Jerusalén ötahuiyänä. Ja̧ju̧ ki̧mi̧mä̧ micuinäju̧ Joadán, Jerusalén ttö̧ja̧sa̧ju̧. Ja̧u̧mä̧ jȩpi̧nö̧ TÖ̧Ä̧NÄ̧HUA̧ ä'cajomettö adiunä uhuäunä, ja̧'hua̧nö̧ ja̧'a̧nä̧ jä'o David ä'cajomettö̧mä̧ ja̧hua̧nö̧ topocöpinö. ³ Ja̧u̧mȩ jȩpi̧nä̧ jä'o Joás jȩi̧nö̧ ta'anötä̧. ⁴ Ja̧'hua̧nö̧ ja̧'a̧nä̧ ju'toju jo̧mȩmä̧ jȩpä̧ icuocö pinö. Ttö̧ja̧mä̧ ji̧nä̧ juorö ju'tojuttötä i̧sa̧rö̧ 'cu'icu a̧mȩu̧nä̧ iyähua iyä'chö ko̧cui̧nä̧tö̧. ⁵ 'Cuäopina'a ji̧yȩnö̧ ruhuo adiunä kä̧mä̧dö̧ hue'omenä, ja̧u̧mä̧ u̧mu̧huäyotörö cuä'ö icuinö jä'orö cuä'ö icuinätö̧rö̧mä̧, Ja̧u̧ ru̧hua̧. ⁶ Ja̧'hua̧nö̧ ja̧'a̧nä̧ cuä'ö icuinätö̧ tti̧tti̧mu̧ru̧ cuä'ö tticua pä'ömä hue'o'cö pinö; ja̧'hua̧nö̧ jo̧ca̧'a̧, ja̧u̧mä̧ huȩyu̧cuä̧ huȩnȩ päinö ta'anötä̧ jȩpi̧nö̧, Moisés i̧huȩyu̧ti̧nä̧ttö päota'anö, TTÖ̧Ä̧NÄ̧HUA̧ hueinö ji̧nö̧ ta'anö, pa̧'a̧nö̧ pä'ö: "Ttä̧'o̧tö̧mä̧ tti̧ti̧mö̧ jähuänä cuä'ö icuähuocotö ttäcuotö, ha̧'hua̧ta̧'a̧nö̧ tti̧tti̧mö̧mä̧ ttä̧'o̧tö̧ jähuänä cuä'ö icuähuocotö ttäcuotö, ja̧'hua̧nö̧ jo̧ca̧'a̧, ya̧cu̧pu̧nä̧ suronä jȩttä̧ji̧ttö̧ topö cuä'ö icuähua'a." ⁷ Ja̧u̧mä̧ 10milnö Edom su̧ro̧do̧u̧rö̧ cuä'ö icuinö Sal pämäroppä päi'omettö̧; Ja̧u̧mä̧ ujurucu rohuäu 'cho'ipinö Sela ötahuiya'inä ja̧'hua̧nö̧ jȩpö̧ i̧mi̧'i̧nä̧ pärötö icuinö Joctel pä'ö, ja̧'hua̧nö̧tä̧ micua'a jitä mo̧ro̧ jubu. ⁸ Ja̧u̧nu̧ o'a'a, Amasías hue'inö jittähuajá pä'ö Joasrö Joacaz i̧tti̧rö̧ Juhú ö̧do̧rö̧ Israel ru̧hua̧rö̧, pa̧'a̧nö̧ pä'ö: "Ichi, rohuäutä ti'äpiyä totäcuähuätucua." ⁹ Ja̧'hua̧nö̧ ja̧'a̧nä̧, Israel ru̧hua̧ Joasmä, pärocua'attö ittöhuajá pä'ö hue'inö Amasíarö, Judá ru̧hua̧rö̧, pa̧'a̧nö̧ pä'ö: "Cardo dau isade so̧a̧de Libanonä kade hue'inö Cedro Dau Libanonä̧ kä'ira̧'a̧, pa̧'a̧nö̧ pä'ö: Iyi ucu cuittijuru ttö chi̧tti̧ irecua päi'önä, Ja̧'hua̧nö̧ ja̧'a̧nä̧ de'ä i̧sa̧ Libanottö̧ ichö 'cuȩcu̧ icuäji cardo dau. ¹⁰ Ucumä isopäi'önä rohuähuäjijä Edon ttö̧ja̧cu̧, cuamis'qui o'cajuiyönätä esu kö̧jä̧. Iso juocuepä'attö eseujä, ja̧'hua̧nö̧ ja̧'a̧nä̧ ttu̧huȩcuä̧nä̧ cuojuisodenätä̧ kä̧hui̧, tta̧'a̧nö̧ pä'ö ¿Tta̧'a̧nö̧ pä'ö huȩnȩ jö̧nä̧ jȩcha̧cu̧ ucurumä ja̧'hua̧ta̧'nö̧ judarö'inä ucucumä?" ¹¹ Ja̧'hua̧nö̧ ja̧'a̧nä̧ Amasíamä ä̧ju̧cuo̧cö̧ pi̧nö̧. Ja̧'hua̧nö̧ ja̧'a̧ttö̧ Joás Israel ru̧hua̧mä̧, rohuäu 'chi̧nö̧ Judá ru̧hua̧ Amasíarö, pä̧tȩcuä̧nö̧ topäcuähuinätö Bet Semes ötahuiyättö, jua'amä ki̧na̧'a̧ Judá i̧rȩjä̧nä̧. ¹² Judámä Israel ttö̧ja̧ rohuäu tticuinäcu̧, ja̧'hua̧nö̧ päi'omenä ya̧cu̧pu̧nä̧ tujusodecu tö'ipachinätö̧. ¹³ Joás, Israel ru̧hua̧, Amasíarö 'chu'ädinö, Judá ru̧hua̧rö̧ Ocozías i̧tti̧rö̧, Bet Semes otahuiyättö. Rä̧bȩhui̧nö̧ Jerusalenra'a̧ ja̧'hua̧nö̧ rä̧bȩu̧ ki'opö icuinätö̧ Jerusalen ötahuiyä tto̧ȩpärä'ca Efraín apatettö kä̧mä̧dö̧ ttöecuyäbä u̧yu̧'ca̧ri̧ apate jubu cä'ädö, cuatrocientonö ttu̧yu̧'ca̧ri̧ ttu̧mu̧ jubu jo̧mȩ ji̧na̧'a̧ ö'otomä. ¹⁴ Ja̧u̧mä̧ ȩmi̧nö̧ o'cajuiyönä ttiäre oro ja̧'hua̧ta̧'a̧nö̧ pärätä'inä, o'cajuiyönä jahuätö tti'äre TÖ̧Ä̧NÄ̧HUA̧ ö̧jo̧denä ko̧cu̧mä̧, Ja̧'hua̧ta̧'a̧nö̧ mi̧cuäujuei ru̧hua̧ ojusodenä ko̧cu̧'i̧nä̧, ttö̧ja̧ juȩnȩ ko̧cuä̧tö̧rö̧'i̧nä̧ ppa̧'a̧di̧nä̧tö̧ Samariara̧'a̧cu̧. ¹⁵ Ja̧'hua̧nö̧ ja̧'a̧nä koro Joásrö huȩnȩ jo̧nä̧ ji̧nö̧mä̧, ja̧u̧ o'cajuiyönä jȩi̧nö̧ ja̧'a̧, ujuru ji̧nö̧ ja̧'hua̧ta̧'a̧nö̧ Judá ru̧hua̧ Amasíacu örohuähuinö, ¿cuyäruttänä'inä huȩyu̧tu̧ rötähuoca'a Israel ruhuotö jȩtti̧nö̧mä̧? ¹⁶ Ja̧u̧nu̧ o'ca'a Joásmä jä̧do̧tö̧mi̧nä̧ ji̧nö̧ta̧'a̧nä̧ ä'inä ja̧'hua̧nö̧tä̧ rȩä̧dö̧ tticuinäcu̧ Samaria rȩjȩnä̧ Israel ruhuotö ttö̧'ö̧jo̧mȩ, ja̧'hua̧nö̧ ja̧'a̧ttö̧, i̧tti̧ Jeroboamtä̧, ö̧'ä̧'i̧jo̧mȩ ru̧hua̧ päi'önä pä̧mä̧di̧nö̧. ¹⁷ Amasías, Joás i̧tti̧, Judá ru̧hua̧mä̧, ki̧nö̧ to̧mu̧rȩ ji̧mu̧tȩ a̧'a̧ jo̧mȩ Joás korujuoächinö o'ca'amä, Joaacaz i̧tti̧, Israel ru̧hua̧. ¹⁸ Ja̧'hua̧nö̧ ja̧'a̧nä koro Amasías huȩnȩ jo̧nä̧ ji̧nö̧mä̧,¿Huȩyu̧tu̧'i̧nä̧ rötähuoca'a cuyäruttänämä Judá ruhuo jue'ätö jettinömä? ¹⁹ Ja'huätömä Jerusalenttö Amasíarö kö'cö jui'ö yä̧huä̧'i̧nä̧ suronä ucuocuä'chinätö̧, Ja̧'hua̧nö̧ jä̧cu̧ tö'ipächinö Laquis ra̧'a̧cu̧, Ja̧'hua̧nö̧ ja̧'a̧nä̧ ja'huätömä u̧mä̧tö̧rö̧ hue'inätö ja̧u̧ o'ca'anä Laquisra̧'a̧ i̧'cho̧mȩttö̧ jua'attötä cuä'ö tticuinäcu̧. ²⁰ Ja'huätötä pa'ajita'anä cabayunä tti'chächinäcu̧ ja̧u̧mä̧ rȩ'ä̧dö̧ tticuinäcu̧ jä̧do̧tö̧ mi̧nä̧cu̧ David idepiyunä. ²¹ O'catoi'önä Judá ätahuiyä ttö̧ja̧mä̧ Azaríarö ttu̧ru̧hua̧ päi'önä 'cha'adö huä̧ni̧nä̧tö̧, ku̧nä̧ri̧nö̧ to̧mu̧rȩ ji̧mu̧tȩ ya'atenö a̧'ȩ, ruhuo hue'önä jȩpi̧nä̧tö̧ jä'ó Amasías huä'ijome. ²² Azarías ji̧na̧'a̧ hue'inömä Elat ötahuiyä pä'äjita'anö aditö tticua pä'ö Judá rȩjȩnä̧, ru̧hua̧ Amasías jä̧do̧tö̧ mi̧nä̧cu̧ ä'äji o'ca'amä. ²³ Joás i̧tti̧ Amasíamä to̧mu̧rȩ ji̧mu̧tȩnö̧ a̧'ȩ hue'inö, Judá rȩjȩnä̧mä̧, Israel ru̧hua̧ Joás i̧tti̧ Jeroboam Samarianä ruhuo hue'ö kä̧mä̧di̧nö̧; Ja̧u̧mä̧ ruhuo hue'inö 41nö a̧'ȩ jo̧mȩ. ²⁴ Ja̧u̧mä̧ TÖ̧Ä̧NÄ̧HUA̧ ä'cattö̧ surojönä jȩpi̧nö̧. Jeroboam suronä jȩi̧nö̧ttö̧'i̧nä̧ i̧mi̧cu̧nä̧ jȩa̧ pä'ömä amucuädä'cö pinö, Nabat i̧tti̧mä ja̧u̧ ji̧na̧'a̧ Israel suronä jȩttö̧nä̧ jȩpi̧nö̧mä̧. ²⁵ Pä'äjita'anö Israel tti̧rȩjä̧ ji̧no̧mȩ ko̧cuä̧mi̧nä̧tö̧ Lebo Lamattö kä̧mä̧dö̧ Mar de Arabá jubu, Israel ttö̧ja̧ TÖ̧Ä̧NÄ̧HUA̧ hueinö ji̧nö̧ ta̧'a̧nö̧, ja̧'hua̧nö̧tä̧ ucuocuinö u̧mu̧huä̧yä̧ Jonas i̧huȩnȩ jiäcuähuä i̧sa̧ Amitai i̧tti̧rö̧mä̧, Gat Hefer ötahuiyä ttö̧ja̧sa̧rö̧mä̧. ²⁶ TÖ̧Ä̧NÄ̧HUA̧ topinö Israel ttö̧ja̧ usurä ttȩmä̧hua̧'a̧, o'catoi'önärö rö̧'ä̧nä̧ surojome päte'ö ji̧na̧'a̧, rö̧'ä̧nä̧ ttaditönä huȩttä̧rä̧u̧'i̧nä̧ juȩttä̧ro̧co̧u̧'i̧nä̧, ya̧tȩ'i̧nä̧ Israel ttö̧ja̧rö̧ ppä'ädömä toina'a̧. ²⁷ Ja̧'hua̧nö̧ ja̧'a̧ttö̧ TÖ̧Ä̧NÄ̧HUA̧ ja̧u̧ru̧ ji'ähuinö si'epö'inä icuo'cö chä̧cua̧sä̧ mo̧ro̧jä̧ dȩa̧'a̧ttö̧ Israel ttö̧ja̧rö̧mä̧; ttö̧jo̧mȩttö̧mä̧, Ja̧u̧mä̧ ttö̧ji̧pö̧nä̧ pa'adinö Jeroboam, Joas i̧tti̧nä̧. ²⁸ Ja̧'hua̧nö̧ ja̧'a̧nä koro Jeroboam huȩnȩ jo̧nä̧ ji̧nö̧mä̧, o'cajuiyönä jȩi̧nö̧, ujuru ji̧nö̧, curä ttörohuähua'anä hue'inö ja̧'hua̧ta̧'nö̧ pä'ajita'anö aditö icuinö Damasco ja̧'hua̧ta̧'nö̧ Hamat'inä, Judá rȩjȩnä̧ ko̧cu̧ Israel rȩjȩnä̧ päi'önä jȩpi̧nö̧, ¿Huȩyu̧tu̧'i̧nä̧ rötähuoca'a cuyäruttänämä Israel ruhuo jue'ätö jettinömä? ²⁹ Jeroboam jä̧do̧tö̧mi̧nä̧cu̧tä̧ ä'i'inö, Israel ruhuo hueinätu̧cu̧, ja̧'hua̧nö̧ ja̧'a̧ttö̧ i̧tti̧ Zacariamä jä'o jueä'ijome ruhuo huea pä'ötä pätecuächinö.