¹ Veinti tresnö duo päinomenä ruhuonä huea'a Joas Ocazias i̧tti̧ Juda rȩjȩ ru̧hua̧, Joacaz Jehú i̧tti̧ ruhuonä huea pä'ö rötädinö Israel rȩjȩnä̧ Samariattö, ja̧hua̧nö̧ ja̧'a̧ diecisietesnö duo jo̧mȩnä̧tä̧ ruhuonä hue'inö. ² Jaa̧u̧mä̧ suronätä̧ jȩpi̧nö̧ Dios ä'ca jo̧mȩttö̧, Jeroboam Natal i̧tti̧ suronä jȩi̧nö̧nä̧tä̧ chi̧nö̧, Israel ttö̧ja̧ suronä jȩttö̧nä̧ jȩpi̧nö̧ ja̧u̧mä̧; ja̧hua̧nö̧ ja̧'a̧ jahuätömä pporächi'ocö pinö. ³ Ja̧hua̧ta̧'a̧nö̧ Dios Israel ttö̧ja̧rö̧ Siria ru̧hua̧ Hazael u̧mö̧nä̧tä̧ iyö icuinäu̧, Hazae i̧tti̧ Ben-adad u̧mö̧nä̧'i̧nä̧ iyö icuinä̧u̧ jahuätötä huetta'anä recuo ttö̧ja̧ pä'ö. ⁴ Ja̧hua̧nö̧ ja̧'a̧nä̧ Joacazmä Dios ppädiyarö pä'ötä jä̧'ȩpä̧ri̧nö̧. Diosmä ä̧ju̧cui̧nä̧cu̧, Israel ttö̧ja̧ usurä ttȩmä̧hua̧'a̧ toa'attö. Siria rȩjȩ ru̧hua̧'i̧nä̧ a̧cua̧tta̧nö̧ ji̧nä̧cu̧. ⁵ Ja̧hua̧nö̧ ja̧'a̧ Diosmä Israel ttö̧ja̧rö̧ ppädäcuähuä i̧sa̧rö̧ iyinö, ja̧hua̧nö̧ ja̧'a̧ Sirios ttö̧ja̧ 'quiyönä chö̧ttä̧ro̧mȩttö̧ rä'opächinätö̧, ja̧hua̧nö̧ ja̧'a̧ttö̧ Israel i̧tti̧mö̧mä̧ pä'äji ttö̧ji̧'ä̧nö̧ta̧'a̧nö̧tä̧ ki̧nä̧tö̧, ttoju odehuiyänätä̧. ⁶ Pi̧yȩ o'ca juiyönä 'cuäopa'anä'inä surojöttömä Jeroboam ojusode ttömä pporächi'ocotö pinätö̧, suronä jȩttö̧nä̧ jȩi̧na̧'a̧nä̧'i̧nä̧, jahuätucutä cue'ächinätö̧; juhua'a jö̧ ta̧'a̧nö̧ ttö̧ä̧nä̧hua̧ju Asera ka̧u̧ca̧juȩtä̧ ki̧na̧'a̧ Samarianämä. ⁷ Joacazcumä ttö̧ja̧ recuätömä ki̧'i̧po̧co̧tö̧ pi̧nä̧tö̧, ja̧hua̧nö̧ jo̧ca̧'a̧ caballönä cue'ächätö ttömä cicuentanö huotötä ka̧cui̧pi̧nä̧tö̧, cäruquiyättömä tomörenö jahuä ocätä ki̧'i̧pi̧na̧'a̧, juhua'a jö̧ta̧'a̧nö̧ u̧mä̧tö̧ttö̧mä̧ diezmil jo̧mȩnä̧tä̧ ki̧'i̧pi̧nä̧tö̧; Siria rȩjȩ ru̧hua̧ jȩpö̧ icua ja̧'a̧ttö̧, rȩba̧'cuȩcu̧tti̧cua̧ba̧ jä̧i̧nö̧'a̧nö̧tä̧ ku̧ni̧pi̧nö̧. ⁸ Joacaz aditinö ki̧'i̧pi̧nö̧ttö̧, o'ca juiyönä jȩi̧nö̧'i̧nä̧, ujuruhuinö'inä ¿huȩyu̧tu̧ ku̧nä̧hua̧'a̧ ko̧ca̧'a̧ tä̧ji̧ Israel ttö̧ja̧ tturuhuotö jȩtti̧nö̧ ta̧'a̧nö̧ huȩyu̧tu̧ ku̧nä̧huä̧ cuyäru'tänämä? ⁹ Ja̧hua̧nö̧ ja̧'a̧ Joacaz jä̧'o̧tö̧mi̧nä̧ 'corujuöttächinöta'anötä̧ korujuo'ächinö, ja̧hua̧nö̧, ja̧hua̧nö̧ ja̧'a̧ Samaria rȩjȩnä̧tä̧ 'turu tticuinäcu̧, ja̧hua̧nö̧ ja̧'a̧ttö̧ ja̧u̧ ruhuonä hueäi jomemä i̧tti̧ Joastä ruhuonä hueinö. ¹⁰ Treinta siestenö duo u̧ju̧nä̧rö̧mȩnä̧ Joas Juda ttö̧ja̧ ttu̧ru̧hua̧, ruhuonä huea pä'ö rötädinö Joas Joacaz i̧tti̧ Israel ttö̧ja̧rö̧ Samarianä, ja̧hua̧nö̧ ja̧'a̧ diez y seisnö duo jo̧mȩnä̧ hueinö. ¹¹ Ja̧hua̧nö̧ ja̧'a̧nä̧ Dios ä'ca jo̧mȩttö̧mä̧ suronätä̧ jȩpi̧nö̧. Nabat i̧tti̧ Jeroboam o'ca juiyönä suronä jȩi̧nö̧ttö̧mä̧ ji̧yȩtȩ'i̧nä̧ ku̧ni̧po̧cö̧ pinö, Israel ttö̧ja̧ suronä jȩttö̧nä̧ jȩpo̧nö̧ ja̧u̧mä̧, jahuätucutä cue'ächinö. ¹² Joas koro jȩi̧nö̧mä̧, o'ca juiyönä aditinö'inä, Juda ttö̧ja̧ ttu̧ru̧hua̧ Amazsiascu rohuähuö ujuruhuinö'inä, ¿Huȩyu̧tu̧ ku̧nä̧hua̧'a̧ ko̧ca̧'a̧ tä̧ji̧ Israelttö ruhuotö pinätö̧ jȩtti̧nö̧ ta̧'a̧nö̧ huȩyu̧tu̧ ku̧nä̧huä̧tö̧nö̧mä̧? ¹³ Ja̧hua̧nö̧ ja̧'a̧ Joas jä̧'o̧tö̧mi̧nä̧ 'corujuottächinö ta'anötä̧ 'coruhuo'ächinö, ja̧hua̧nö̧ ja̧'a̧ttö̧ ruhuonä hueä'ijomenä Jeroboamtä pä̧mä̧di̧nö̧: Joasmä Samarianätä̧ ttu'turinäcu̧ Israel ttö̧ja̧ tturuhuotö mi̧nä̧cu̧tä̧. ¹⁴ Eliseomä na̧'a̧chi̧nö̧ 'coripäiäcue märicheittötä. Ja̧hua̧nö̧ ja̧'a̧ Joas Israel ttö̧ja̧ ttu̧ru̧hua̧mä̧ ja̧u̧ ö̧ja̧'a̧cu̧ mȩyȩhui̧nö̧, ja̧hua̧nö̧ ja̧'a̧ ja̧u̧ ä'ca jo̧mȩttö̧ ajuähuö kä̧nö̧ pä'inö: "Ttö chä'o, ttö chä'o, Israel öcäruquiyä'inä caballönä cue'ächätö'inä ttȩmi̧pä̧cu̧jä̧. ¹⁵ Ja̧hua̧nö̧ ja̧'a̧ Eliseo pä'inäcu̧: 'po'obö'inä 'po̧ä̧hua̧ri̧'i̧nä̧ ȩmi̧. Ja̧hua̧nö̧ ja̧'a̧ ja̧u̧mä̧ bo'obö'inä 'po̧ä̧huri̧'i̧nä̧ ȩmö̧ po'inö. ¹⁶ Ja̧u̧nu̧ o'comenä Eliseo pä'inö: po'obö huä̧mȩ cumö huä̧ni̧, ja̧hua̧nö̧ ja̧'a̧ ja̧u̧mä̧ u̧mö̧ po'obö huä̧mȩ hu̧äni̧nö̧. Juhua'a jö̧ ta̧'a̧nö̧ Eliseo'inä u̧mö̧pi̧yä̧ huä̧ni̧nö̧ ru̧hua̧ u̧mö̧pi̧yä̧ huä̧mȩ. ¹⁷ Ja̧hua̧nä̧ ja̧'a̧ pä'inö: Päteönä toäcuähuate kä̧hua̧ räopa'acu kate baepi. Ja̧hua̧nö̧ ja̧'a̧ ja̧u̧ pahuepomenä, Eliseo pä'inö: Dios öäre 'poähuä i̧sa̧ri̧ ki̧'i̧cuä̧ i̧sa̧ri̧, Siria ttöjattö'inä ttö̧ji̧pä̧cua̧ri̧; Sirio ttö̧ja̧rö̧ cuä'ö i̧cuä̧cua̧ri̧ Afecttö'inä bettipächome jubö päiönätä̧. ¹⁸ Ja̧hua̧nö̧ ja̧'a̧ pä'äjita'anö ppä'ädö pä'inö: 'po̧ä̧hua̧ri̧ ȩmu̧. Ja̧u̧nu̧ o'comenä Israel ttö̧ja̧ ttu̧ru̧hua̧ ȩmä̧ji̧ o'comenä, pä'inö: rȩjȩ cuä'i. Ja̧hua̧nö̧ ja̧'a̧ ja̧u̧ huäbodäcuä jo̧mȩnä̧ cuä'ö cä'ädinö. ¹⁹ Ja̧hua̧nö̧ ja̧'a̧ Dios umöhuäya̧mä̧, ja̧u̧ru̧ ru̧hua̧rö̧ pä'inö: ji̧mö̧tȩnö̧ttö̧'i̧nä̧ koromö̧ttö̧ yochetenö jö̧ttö̧'i̧nä̧ cuäcuhuäjittömä, Siria ttö̧ja̧ttö̧mä̧ ya̧tȩ'i̧nä̧ ö̧ji̧pö̧ juiyönätä̧ jȩpö̧ cuicu'anö ja̧'a̧; ja̧hua̧nö̧ ja̧'a̧nä̧ jitämä huäbodäcuä jo̧mȩnä̧tä̧ cujuruhuacua̧jä̧ Siria ttö̧ja̧rö̧mä̧. ²⁰ Ja̧hua̧nö̧ ja̧'a̧ Eliseo 'corupäi'inö jahuätötä 'turu tticuinäcu̧: Järeö duo päiomenä ju̧huä̧jä̧ rȩjȩra̧'a̧ Moab ttö̧ja̧ cuorä ru̧hua̧ dodepinätö̧. ²¹ Ja̧hua̧nö̧ ja̧'a̧ ya̧tȩ hua'ö icuäjirö ttu'turomenä 'cuä'opina'a, jeruhua'ara'a tä topinätö̧ Moab ttö̧ja̧ curä ru̧hua̧rö̧ ja̧hua̧nö̧ ja̧'a̧ 'coruopä'i'äjirö icuinätö̧ Eliseo huahuorä jacuä, 'corupäi'äji päji Eliseo ihue'quiyucu mȩä̧huä̧cho̧mȩnä̧, tto'ächipö ö̧jä̧pi̧yä̧nä̧ ä̧rä̧mi̧'i̧nö̧. ²² Hazael, Siria ttö̧ja̧ ttu̧ru̧hua̧mä̧, a̧cua̧tta̧nö̧ ji̧nä̧cu̧ Israel ttö̧ja̧rö̧ Joacaz ru̧hua̧ ö̧ji̧nö̧ pä̧nä̧mä̧. ²³ Ju̧huȩttö̧'i̧nä̧ abonänö Diosmä re topinö jahuätörö. Juahua'a jö̧ ta̧'a̧nö̧ a̧'u̧ru̧ju̧nä̧nö̧ toinäu, Abrahamcu, Isacu Jacobcu adiunä pä'ö u̧ju̧ni̧na̧'a̧ttö̧, Ja̧hua̧nö̧ ja̧'a̧ttö̧ to'odejipö icua jo̧mȩttö̧mä̧ ya'opö icua päocou pi̧nä̧tö̧ jitä pi̧yȩ mo̧ro̧ jubö päiönätä̧. ²⁴ Ja̧hua̧nö̧ ja̧'a̧ Siria ttö̧ja̧ ttu̧ru̧hua̧ Hazael 'corupäi'inö, ja̧hua̧nö̧ ja̧'a̧tö̧ ruhuonä hueä'i jo̧mȩmä̧ i̧tti̧ Ben-adadtä ruhuonä hue'inö. ²⁵ Ja̧hua̧nö̧ ja̧'a̧nä̧ Joacaz i̧tti̧ Joas pä'äjita'anö ppa̧'a̧chö̧ Hazael i̧tti̧ Ben-adad u̧mö̧ttö̧ ötahuiyä 'cho'ipinö ja̧u̧tä̧ cuorä rohuäu icu jä'o Joacazrö choipinö ji̧nö̧mä̧. Joasmä̧ huabodäcuä jo̧mȩnä̧ cuorä rohuähuö juruhuinö, ja̧hua̧nö̧ jȩpö̧ pä'äjita'anö ötahuiyä ppa̧'a̧dö̧ iyinö Israel ttö̧ja̧rö̧.