1
Ẽbe un dji set zãj-iela ki te gãiẽ set goble-iela vinï dji pu mo:
_ Vinï mo ke mõthe u kumã ke kõdãnẽ sa ghã *fam ki ka fe phostxituisiõ (prostituta), sa pei ki ka kumãde lasu boku djilo.
2
Vue-iela dji tã-la ãtxe fe phostxituisiõ ke li, i pov-iela dji tã-la hete su ke djivẽ dji so phostxituisiõ.
3
Ẽbe Lesphui dji Bõdje ãthe lasu mo, i zãj-la pote mo pu un *kote ki pa gãiẽ ãiẽ (deserto), kote mo ue un mõte lasu un bet huj. Te gãiẽ boku *pahol mal (blasfêmia) ekhi lasu'l, i li te gãiẽ set tet i djis kon.
4
Fam-la te ka ize un hob kulo dji *purpura i huj te kõhõnẽ dji abimã dji lo, dji hox dji vale i *perolas. Lãdã so lãmẽ li te ka txẽbe un goble dji lo plẽ ke djivẽ, ki te ka hephuezãte so thavai ki pa bõ-iela i so phostxituisiõ-iela.
5
Lãdã so tet te ekhi un nõ ki gãiẽ signifike ãseghe: Ghã Babilônia, mãmã dji tut *fam ki ka fe phostxituisiõ i dji tut mun maleve dji tã-la.
6
Mo ue ki fam-la te su ke djisã dji pov dji Bõdje i dji mun-iela ki te muhi pase ki ie te fiam lasu Jezi.
Kã mo ue'l, mo hete pe boku.
7
I zãj-la dumãde dji mo:
_ Pukisa ki u kõsa, tho pe?
Mo ke hakõte sa signifikasiõ ki a seghe dji fam-la i dji bet ki ka pote'l i ki set tet i set kon.
8
Sa bet ki u ue te vivã, mẽ ato li pa ka viv ãko. Li phox pu mõte dji lãfe-la I li ke ale pu djisthuisiõ. Mun-iela ki ka hete lasu late-la, sa ki ie nõ pa ekhi lãdã Liv dji Lavi-la djipi kumasmã dji tã-la ke hete pe kã ie ke gade pu bet-la. Li te vivã; ato li pa ka viv ãko, mẽ li ke hutonẽ pahet vivã.
9
Sa buẽzẽ majinẽ ke konetmã. set tet-iela a set mõtãi kote fam-la asi. Ie osi a set vue-iela:
10
Sẽk deha muhi, un ka kumãde, i uot-la pãko pahet. I, kã li ke pahet, li buẽzẽ kumãde dehãtxi tximoso tã.
11
Bet ki deha te vivã, mẽ ato li pa ka viv ãko, a uitzem vue-la. A un dji set-iela, li ka maxe pu djisthuisiõ.
12
Djis kon-iela ki u ue a djis vue-iela ki pãko kumase kumãde, mẽ ie ke husuve povua pu kumãde ke bet-la dehãtxi un mumã.
13
Sa djis-iela tut dako ãt ie, i ie ke bai pu bet-la povua i otohite ki ie gãiẽ.
14
Ie ke bataie kõt *Pitxit mutõ-la (cordeiro), i li ke hesi dethi ie pase li sa Sẽie dji sẽie-iela i Vue dji vue-iela. I ke laba asam ke li so siavito-iela, sa ki fiam-iela i ki li xuezi-iela.
15
Ẽbe zãj-la osi dji pu mo:
_ Djilo-iela ki u ue, kote *fam ki ka fe phostxituisiõ-la te asi, a nasiõ-iela, pov-iela, has-iela i lãg-iela.
16
Djis kon-iela ki u ue I bet-la ke hete ãhaj ke fam ki ka fe phostxituisiõ-la. Ie ke txihe tut sa ki li gãiẽ ie ke lesel tunï. Ie mãje so laxe i ie ke bule lahextã lãdã djife.
17
Djis-iela ke fe sa pase Bõdje mete lãdã ie txo-iela plezi dji fe sa ki ie le. Kõsa ie ke dako ãt ie pu bai pu bet-la povua ki ie gãiẽ pu kumãde. Sa ke fet juk kã kõphui pahol dji Bõdje.
18
Fam ki u ue-la a ghã pei ki ka dominẽ vue-iela dji tã-la ãtxe.