¹ Un de om ale dji hejiõ dji Judeia pu vil dji Antioquia i kumase mõthe fue-iela ki ie pa ke puve sove si ie pa xathe kumã ka dji Lalua dji Moises. ² Pol i Barnabe pa hete dako i ie djiskite ke mo-iela a hespek djisa. Djila legliz-la deside voie Pol i Barnabe pu Jehuzalem akõpãiẽ ie un de fue dji Antioquia, pu lekol sa situasiõ-la ke apostolo-iela i Presbitero-iela dji legliz-la. ³ Ẽbe legliz dji Antioquia voie ie ale. Ie pase pu hejiõ dji Fenicia i dji Samaria, ka hakõte kumã nõ-judeu-iela osi te ka asekte Bõdje. I tut fue-iela hete boku kõtã ke sa nuvel-la. ⁴ Kã ie hive la Jehuzalem, legliz-la i apostolo-iela, i presbitero-iela husuve ie, i ie hakõte tut sa ki Bõdje te fe pu ie. ⁵ Mẽ un de mun dji patxizã dji fahizeu-iela ki osi te khe ie leve i ie dji: _ nõ-judeu-iela gãiẽ dji hete i ie gãiẽ dji obei lalua dji Moises. ⁶ Ẽbe apostolo-iela i presbitero-iela hasãble pu lekol sa situasiõ-la. ⁷ Aphue dji boku djiskusiõ,Pie leve i li dji: _ Mo fue-iela, zot save ki boku tã deie Bõdje xuezi mo ãt zot pu ãnüsie bõ nuvel pu nõ-judeu-iela pu ie puve tãde i khe ⁸ I Bõdje, ki konet txo dji tut mun, mõthe ki Li ka asekte nõ-judeu-iela, li bai Sẽtesphui osi pu ie, kõsa kumã li bai pu no. ⁹ Bõdje pa ka fe pies djifehãs ãt no i ie, Li padõnẽ ie pexe-iela pase ki ie khe. ¹⁰ Ẽbe pukisa ki ato zot le mete Bõdje lãdã situasiõ djifisil, kã zot ka mete un xaj lãdã do djisa ki ka khe ato-iela? sa xaj-la nẽ no, i no ãtepase-iela hesi xaie. ¹¹ Pu kõtãtmã dji Sẽie Jezi no, judeu-iela, khe i no sove dji mem fom ki nõ-judeu-iela. ¹² Ẽbe tut sa ki te laba hete this i ie kute Pol i Barnabe hakõte tut mihak-iela i bagaj ki joli ki Bõdje te fe pu ie ãt nõ-judeu-iela. ¹³ Kã ie finï koze, Txiag dji: _ Mo fue-iela, zot kute! ¹⁴ Simõ finï dji esplike kumã Bõdje phõmiẽ mõthe so pokosiõ ki li gãiẽ ke nõ-judeu-iela, li xuezi dji lamitã dji ie un pov ki apu li. ¹⁵ Pahol dji phofet-iela biẽ dako ke sa, pase Pathõ Sẽ-la dji: ¹⁶ Bõdje dji: "Aphue djisa mo ke tonẽ i mo ke edjifike ãko Lasosiete dji Davi, ki a kumã un kaz ki tõbe. Mo ke hasãble so pedas-iela ãko i mo ke hutonẽ level ãko. ¹⁷ Kõsa tut uot mun-iela, tut uot pov-iela ki mo aple, pu sa mopa, ie ke sase konet Bõdje. Kõsa Bõdje dji, ¹⁸ ki ãnüsie sa bagaj-iela djipi lõtã." ¹⁹ I Txiag kõtxinẽ: mo lide a sa: mo thuve ki no pa djivet jẽnẽ nõ-judeu-iela ki ka asekte Bõdje. ²⁰ Mo ka majinẽ ki no djivet ekhi un let pu ie, ki ka pale kõsa ki ie pa mãje laxe dji animal dji k'ale ofui kumã sakhifis pu bõdje-iela, ki ie pa phatxike mixã labitxuid seksual, ki ie pa mãje laxe dji pies animal ki ie ãgue i li muhi, i pu ie pa mãje djisã. ²¹ Pase, djipi lõtã, Lalua dji Moises ie ka li tut samdji-iela lãdã sinagog-iela i so pahol-iela ka ãnüsie lãdã tut vil-iela. ²² Ẽbe apostolo-iela i presbitero-iela, ke fos dji tut legliz-la ie deside xuezi ãt ie un de om i voie ie pu Antioquia ke Pol i Barnabe. Sa ki ie xuezi-iela, Judas, ki ie k'aple Barsabas, i Silas. Sa de om-iela mun-iela dji legliz-la te ka hespete boku. ²³ Mum dji legliz-la voie ke ie sa let-la: " No,apostolo-iela i presbitero-iela, no voie saudasiõ pu no fue nõ-judeu-iela ki ka viv la Antioquia, Siria i Cilicia. ²⁴ No save ki un de dji no patxizã ale juk laba i dji bagaj ki fe zot hete ke phoblem. A pa ke no otohizasiõ ki ie fe sa. ²⁵ Aphue ki no deside i tut dako, no deside xuezi un de om i voie ie pu zot ke no fue-iela Pol i Barnabe, ²⁶ om-iela ki pase situasiõ djifisil i ahiske ie lavi lãdã thavai dji no Sẽie jezi Khi. ²⁷ No ka voie, ẽbe Judas i Silas pu pale pu zot suje sa bagaj-iela ki no ka ekhi. ²⁸ Pase ki Sẽtesphui i no mem deside pa mete pies xaj lasu zot, selmã sa bagaj-iela vuemã te bẽzuẽ ẽteãdji: ²⁹ Pa mãje laxe dji pies animal ki ie ka ofui ã sakhifis pu bõdje-iela, pa mãje pies animal ki ie ãgue i aphue li muhi, pa phatxike mixã labitxuid seksual, Zot ke hete biẽ so zot pa fe sa bagaj-iela. Lasãte pu zot tut!" ³⁰ Ẽbe ie voie kat-iela ale, i ie pu Antioquia. Laba ie hasãble khẽtxiẽ-iela i bai let-la pu ie. ³¹ Kã ie li let-la, ie hete boku kõtã ke pahol dji kohaj ki li te gãiẽ lãdã'l. ³² Judas i Silas, ki a te phofet, pale boku ke fue-iela, ie bai fos i kohaj pu fue-iela. ³³ Ie pase un de ju laba, i aphue fue-iela voie ie ke kõtãtmã pu legliz dji Jehuzalem ãko ³⁴ (mẽ Silas deside hete laba). ³⁵ Mẽ Pol i Barnabe hete la Antioquia. Ie i boku uot khẽtxiẽ te ka mõthe i ãnüsie pahol dji Sẽie. ³⁶ Aphue dji un de ju deie, Pol dji pu Barnabe: _ _ ãnü tonẽ i vizite fue-iela lãdã tut vil-iela kote no deha ãnüsie pahol dji Bõdje. Ãnü gade si ie biẽ. ³⁷ Barnabe te le pote Jã Mahkus. ³⁸ Mẽ Pol pa te le, pase Mahkus pa te hete ke ie juk finisiõ dji phõmiẽ voiaj dji misiõ ki ie fe, mẽ li te lese ie la Panfilia. ³⁹ Pu sa ie te gãiẽ un djiskusiõ tho fo, ki ie sepahe dji ie kõpãiẽ. Barnabe ale ke Jã Mahkus i ie navidje pu Chipre, ⁴⁰ ẽkãt ki Pol xuezi Silas i ie voiaje, aphue ki fue-iela hãde ie pu Bõdje ẽtxupe dji ie. ⁴¹ I Pol voiaje pu Siria i hejiõ dji Cilicia, ka bai fos pu legliz-iela.