¹ Mem bagaj fet la vil dji Iconio. Pol i Barnabe ãthe lãdã sinagog-la ie pale dji un tel mãiẽ, ki boku judeu i nõ-judeu khe. ² Mẽ judeu-iela ki pa khe mete nõ-judeu-iela kõt Pol i Barnabe. ³ Apostolo-iela hete boku tã la Iconio, ie te ka pale ke kohaj a hespek dji Sẽie Jezi. I Sẽie te mõthe ki ie mẽsaj-iela lasu so kõtãtmã a te lavehite, li te ka bai pu ie povua pu fe mihak i boku bagaj ki joli. ⁴ Mun-iela dji vil-la te pataje: un de hete bo dji judeu-iela, i uot-iela te hete bo dji apostolo-iela. ⁵ Ẽbe nõ-judeu-iela i judeu-iela, ãsam ke ie xef-iela, deside malthete apostolo-iela i txue ie ke hox. ⁶ Kã Pol i Barnabe save djisa, ie mahõ pu hejiõ dji Licaonia, pu vil dji Listra i Derbe, i uot hejiõ ki phox dji ie. ⁷ I laba ie ãnüsie bõ nuvel-la. ⁸ Lãdã vil dji Listra te gãiẽ un om ki te asi tut tã, pase li te alejad dji so pie-iela. Li te fet kõsa i li pa te jẽ maxe. ⁹ Sa om-la tãde pahol-iela dji Pol, i Pol ue ki li te ka khe ki li te puve djiehi. Ẽbe li gade pu li, ¹⁰ i Pol dji ke gho vue: _leve i hete djibut! om-la hete djibut i li kumase maxe. ¹¹ Kã pov-la ue akisa Pol te fe, ie kumase hele lãdã ie phop lãng: _bõdje-iela phã fom dji om-iela i ie desan juk kote no! ¹² Ie bai nõ dji Jupiter pu Barnabe, i dji Mercurio pu Pol, pase ki a te Pol i te ka pale. ¹³ Kaz dji Jupiter te ka hete lãdã kumasmã kote ie ka ãthe lãdã vil-la, i sasedotxi djisa bõdje-la pote bef i kuhun dji butxie pu gho lapot dji vil-la. Li i pov-la te le txue animal-iela lãdã un lafet dji ie helijiõ i ofui kumã sakhifis pu Barnabe i Pol. ¹⁴ Kã de apostolo-iela save djisa, ie fãde ie lẽj-iela, ie kuhi pu lamitã dji pov-la i ie hele: ¹⁵ _Kamahad-iela, pukisa zot ka fe sa? no sa mun sãble zot. No esi ka ãnüsie bõ nuvel pu zot pu zot lese sa bagaj-iela ki pa ka siavi pu ãiẽ. Zot asekte Bõdje ki vivã ki fe siel, i late ghã lãme i tut sa ki gãiẽ lãdã ie. ¹⁶ Lõtã Bõdje lese tut pov-iela maxe lãdã ie phop ximẽ-iela. ¹⁷ Mẽ Bõdje tuju ka mõthe akimun li sa, pu bagaj bõ ki li ka fe: A Li ka voie lapli dji siel i boku fui lãdã sezõ jis; Li ka bai mãje pu zot i Li ka plẽ zot ke kõtãtmã. ¹⁸ Mem Aphue ki ie dji sa, apostolo-iela te gãiẽ boku djifikute pu pa lese ki pov-la te txue animal kumã sakhifis pu ie. ¹⁹ Un de judeu ki te vinï dji vil dji Antioquia i dji Iconio hesi bai fos pu ban mun-iela, voie hox lasu Pol i ie hale'l pu deho dji vil-la, pase ki ie te ka majinẽ ki li te muhi. ²⁰ Mẽ, kã khẽtxiẽ-iela hasãble obo li, li leve i li ãthe lãdã vil-la ãko. I lãdã uot ju-la Pol i Barnabe ale pu vil dji Derbe. ²¹ Pol i Barnabe ãnüsie bõ nuvel la Derbe, i boku mun djisa vil-la tonẽ djisip dji Jezi. Aphue ie hutonẽ pu vil dji Listra, Iconio i Antioquia dji Pisidia. ²² Ie te ka bai fos pu khẽtxiẽ-iela i te ka bai kohaj pu ie hete fiam lãdã espua. I osi te ka mõthe ka mõthe ki ie te bẽzuẽ pase pu boku sufãs pu ie puve ãthe lãdã Lasosiete dji Bõdje. ²³ Lãdã xak legliz apostolo-iela te ka xuezi, *presbitero. Ie te ka phuie, i fe jẽnẽ i ie te ka hãde *presbitero-iela lãdã photesiõ dji Sẽie, lasu mun ki ie te ka khe. ²⁴ Ẽbe Pol i Barnabe jãbe dji Pisidia i ie hive juk la Panfilia. ²⁵ Ie ãnüsie pahol-la la Perge i aphue ie ale pu degha dji Atalia. ²⁶ Dji laba ie ale lãdã bato pu Antioquia dji Siria, kote ie te hãde ie ko pu Bõdje ẽtxupe dji ie, pu thavai ki ato te ka finï. ²⁷ Kã ie hive laba, ie hasãble mun dji legliz-iela ie hakõte tut sa ki Bõdje fe pu ie. I ie hakõte kumã li luvui ximẽ pu nõ-judeu-iela osi khe. ²⁸ Ie hete laba boku tã ke djisip-iela dji Jezi.