¹ Ãt phofet-iela i met-iela dji legliz dji Antioquia, dji Siria te laba Barnabe i Simeão, ki ie te k'aple *Neg, Lucio dji Cirene, Manaem, ki te leve ke guvelmã Herodes Antipas, i Saulo. ² Un ju, kã ie te ka adohe Sẽie i ie te ka fe jẽnẽ, Sẽtesphui dji: _Barnabe i Saulo pu fe thavai ki mo aple ie pu ie fe. ³ Ẽbe ie fe jẽnẽ, i ie phuie, i ie poze ie lãmẽ-iela lasu Barnabe i Saulo. I ie voie de-iela pu fe misiõ. ⁴ Barnabe i Saulo, ki Sẽtesphui voie, ale juk la vil dji Seleucia i dji laba ie navidje pu zile dji Chipre. ⁵ Kã ie hive la vil dji Salamina, ie kumase ãnüsie pahol dji Bõdje lãdã sinagog-iela. I ie te ke Jã Mahkus pu ide ie lãdã thavai misiõne-la. ⁶ Ie voiaje pu tut zile-la, ie hive juk la vil dji Pafos. Laba ie ue un judeu ki te ka fe maji, un phofet ki ka fe mãto, ie te k'aple Barjesus. ⁷ Li te sa kamahad dji Sergio Paulo, guvelmã dji zile-la, ki a te un om boku ïtelijã. Guvelmã-la voie aple Barnabe i Saulo, pase li te le tãde pahol dji Bõdje. ⁸ Mẽ mun ki te ka fe maji-la Elimas (sa a te so nõ ã grego) li te kõt *apostolo-iela. Li pa te le ki guvelmã-la asekte ie espua. ⁹ Ẽbe Saulo, osi ki ie te konet kumã Pol (Paulo ), plẽ ke Sẽtesphui, gade kote Elimas ¹⁰ li dji: Pitxit dji djab! elmï dji tut akisa ki bõ! om mixã i met mãto! pukisa u pa ka lese dji fe mãto lasu vuemã pahol dji Sẽie? ¹¹ Ato kute! Sẽie ke fe u pase pu un pinitãs. U ke hete pa ka ue i pa ke ue klehite dji solei-la pu un tã. Lãdã mem lokasiõ Elimas sãtxi un nuaj suku khuvui so uei-iela i li kumase vihe pu tut bo-iela, ka sase un kek mun pu suiv pu so lãmẽ. ¹² Kã guvelmã-la ue sa, li khe i hete boku susphan ke sa ki ie te ka mõthe a hespek dji Sẽie Jezi. ¹³ Pol i so kõpãiẽ-iela sotxi dji Pafos lãdã un bato i ie ale pu Panfilia, kote ie hive la Perge. Laba Jã Mahkus lese ie i li tonẽ pu Jehuzalem. ¹⁴ Ie kõtxinẽ voiaje, ie ale dji Perge juk la Antioquia, lãdã un vilaj dji Pisidia. Samdji ie ãthe lãdã sinagog-la ie asi. ¹⁵ Aphue ki xef-iela dji sinagog-iela li pahol dji Lalua dji Moises i dji liv dji phofet-iela, xef-iela voie dji pu ie : Fue-iela, si zot gãiẽ un kek pahol pu bai fos pu pov-la zot puve pale ato. ¹⁶ Ẽbe Pol leve, li fe sin ke so lãmẽ, pu ie hete this, li kumase kose: __ om-iela dji Izhael i zot tut nõ-judeu-iela ki ka khe lasu Bõdje, zot kute! ¹⁷ Bõdje dji pov dji Izhael xuezi no ãtepase-iela kã ie te ka hete lãdã late dji Egito i li fe dji ie un ghã pov. Li Libiate ie dji laba ke ghã povua. ¹⁸ I lãdã kote ki pa gãiẽ ãiẽ (deserto), li sipote sa mun-iela dehãtxi kahãt ãnẽ. ¹⁹ Li dethi set pov lãdã late dji Canaã, i pov dji tonẽ met dji ie late-iela. ²⁰ Tut sa, duhe un katsã sẽkãt ãnẽ. Aphue djisa Bõdje bai pu ie *mun pu kumãde ie* (juiz), juk tã dji Samuel . ²¹ Kã pov-la dumãde un vue, i Bõdje bai pu ie Saul, pitxit dji Quis, dji thib dji Benjamim, pu tonẽ ie vue dehãtxi kahãt ãnẽ. ²² Aphue ki li tihe Saul, Davi mete Davi kumã vue-la i li dji sa a hespek dji Davi: "mo ue lasu Davi, pitxi dji Jesse, un kalite mun ki mo le i li ke fe tut sa ki mo le." ²³ Un dji pitxit-iela dji Davi a Jezi, mun ki Bõdje mete kom un mun pu sove pov dji Izhael, kumã li te phomet. ²⁴ Ãvã Jezi te vinï, Jã Batxist ãnüsie so mẽsaj pu tut pov dji Izhael, li te ka dji ki ie te djivet hepãtxi pu ie batxize. ²⁵ Mẽ kã Jã te ka finï so misiõ, li dji pu pov-la: _"akimun zot ka majinẽ ki mo sa? mo pa sa, mun ki zot ka ãtan-la. Mẽ zot kute! Li ka vinï aphue dji mo, i mo pa mehite dji txihe so savat-iela dji so pie-iela." ²⁶ Pol kõtxinẽ: Mo fue-iela, pitxit-iela dji Abhaão, i osi zot nõ-judeu-iela ki ka khe lasu Bõdje, zot kute! sa mẽsaj dji salvasiõ-la a pu no tut. ²⁷ Vuemã, mun-iela dji Jehuzalem i so lidehãs-iela pa kõphan ki Jezi a "mun ka sove". I osi ie pa kõphan pahol-iela dji liv dji phofet-iela, ki ie te ka li tut samdji-iela. Mem kõsa, kã ie kõdãnẽ Jezi, ie te ka kõphui sa *pahol dji phofet-iela. ²⁸ Mem ie pa kõthe pies khim pu kõdãnẽ'l pu lamo, ie dumãde dji Pilatos pu voie txue'l. ²⁹ Aphue dji ie te fe tut sa ki Pahol Sẽ-la pale a hespek dji Li, ie txihe'l dji lakhue-la i ie mete'l lãdã un tom. ³⁰ Mẽ Bõdje hesusite'l, ³¹ I dehãtxi boku ju li pahet pu mun-iela ki te ka akõpãiẽ'l dji Galileia juk Jehuzalem. Ato sa mun-iela sa tẽmuẽ ki ka pale a hespek dji Jezi pu pov dji Izhael. ³² I no esi pu pote Bõ Nuvel-la pu zot. ³³ Bõdje fe ato pu no sa ki li te phomet pu no ãtepase-iela: _Li hesusite Jezi, kumã li ekhi lãdã Salmo lemeho 2: "u sa mo pitxit; jodla mo tonẽ u Papa". ³⁴ I a sa ki Bõdje pale a hespek dji hesuheisiõ dji Jezi, Li afihmẽ ki lamo-la pa te ke jẽ dethi'l: _"Mo ke bai pu zot sa phomes Sẽ, ki mo te phomet pu Davi" ³⁵ Lãdã uot pedas dji pahol-la no li osi: "u pa ke lese ki u siavito Sẽ puhi lãdã tom-la" ³⁶ I Pol dji tuju: lãdã lavehite, Davi, lãdã so tã, kõphui volõte dji Bõdje. Aphue li muhi, ie ãtehe'l obo so ãtepase-iela i li puhi lãdã tom-la. ³⁷ Mẽ sa pa hive ke sa ki Bõdje hesusite. ³⁸ Mo fue-iela, zot tut bẽzuẽ save ke asihãs ki a pu Jezi, gãiẽ padõ pu pexe-iela. ³⁹ Zot bẽzuẽ save osi, mun ki khe li ka hete lib dji tut pexe-iela ki lalua dji Moises pa puve libiate. ⁴⁰ Pu sa zot, ãtãsiõ pu ki, pa hive zot sa ki phofet-iela dji: ⁴¹ "Gade ke ãtẽsiõ, zot ki ka futan dji Bõdje! zot hete pe i muhi. Pase sa ki mo ke fe ato a un bagaj ki zot pa ke khe, mem si un kek mun te esplike. ⁴² Kã Pol i Barnabe te ka sotxi dji heuniõ-la, mun-iela dumãde pu ie hutonẽ samdji pu ie pale dji mem pahol-la. ⁴³ Aphue dji heuniõ-la, boku judeu i uot mun ki ka suiv helijiõ dji judeu-iela, akõpãiẽ Pol i Barnabe, ki te ka pale ke ie i bai fos pu tut pu ie kõtxinẽ fiam lãdã *kõtãtmã dji Bõdje. ⁴⁴ Samdji phoxe, phox tut mun-iela dji vil-la ale kute pahol dji Sẽie. ⁴⁵ Kã judeu-iela ue sa ban mun-iela, ie hete boku jalu. Ẽbe ie kumase pale kõt dji sa ki Pol te ka dji i ie solãte'l. ⁴⁶ Ẽbe Pol i Barnabe pale ke plis boku kohaj. Ie dji: __te bẽzuẽ ki pahol dji Bõdje ale ãnüsie phõmiẽ pu zot ki sa judeu. Mẽ, kumã zot pa le asekte'l i zot ka thuve ki pa mehite husuve lavi ẽtehnel-la, ẽbe ato no ke ãnüsie pahol-la pu nõ-judeu-iela. ⁴⁷ Pase sa a zod ki Sẽie Bõdje bai pu no, kã li dji: "Mo mete zot kumã klehite pu uot pov-iela, pu pote salvasiõ-la pu tã-la ãtxe." ⁴⁸ Kã nõ-judeu-iela tãde sa, ie hete boku kõtã i ie khemesi Sẽie pu sa mẽsaj-la, i tut sa ki li te xuezi pu gãiẽ lavi ẽtehnel ie khe. ⁴⁹ Pahol dji Sẽie kate pu tut sa hejiõ-la. ⁵⁰ Mẽ judeu-iela bai fos pu fam nõ-judeu-iela ki te pi ïpohtã dji vil-la ki te ka suiv helijiõ dji judeu-iela, i osi om-iela ki te pi ïpohtã dji pei-la. I ie kumase un pehseguisiõ kõt Pol i Barnabe, ie fe ie sotxi dji da hejiõ-la. ⁵¹ Ẽbe apostolo-iela sukuie lapusie dji ie savat-iela, kõt mun-iela, i ie ale pu vil Iconio. ⁵² I khẽtxiẽ-iela dji Antioquia kõtxinẽ boku kõtã i plẽ ke Lesphui Sẽ.