¹ Lãdã sa tã-la vue Herodes *Agripa kumase malthete un de mun dji legliz-la. ² Li voie txue ke espad Txiag, fue dji Jã. ³ Kã li ue ki sa fe judeu-iela hete kõtã, li voie osi phui Pie. Sa fet dehãtxi *lafet dji djipẽ sã fehmẽto. ⁴ Aphue ki li phui Pie, Herodes mete'l lãdã phuiziõ i lese kat patxizã dji soda, ke kat soda lãdã xak patxizã pu veie'l. Pase Herodes te le phuezãte'l pu pov-la aphue dji ju dji *Pak. ⁵ I Kõsa Pie te phui i soda-iela te ka veie'l; mẽ legliz-la te ka kõtxinẽ phuie ke boku fos pu li. ⁶ Lãdã nuit ãvã ju ki Herodes te ke phuezãte'l pu pov-la, Pie te ka dhõmï, i li te phui ke de xen, ãt de soda; i te gãiẽ soda ka veie lãdã lapot dji phuiziõ-la. ⁷ Djinku, pahet un zãj dji Sẽie, i un klehite klehe ãdjidã phuiziõ-la. Zãj-la tuxe la zepol dji Pie, li leve'l i li dji: leve vit! Ẽbe xen-iela tõbe dji so lãmẽ-iela. ⁸ Zãj-la dji:_ sehe u sẽtxie i mahe u savat-iela! I Pie fe sa ki zãj-la te dji. Zãj-la bai un zod: fuhe u kap i vinï ke mo! ⁹ Pie sotxi dji phuiziõ-la i li suiv zãj-la. Li pa te save si zãj-la te ka libiate'l. Li te ka majinẽ ki sa a te un viziõ. ¹⁰ Ie pase pu phõmiẽ-la i pu dezem plas kote soda-iela te ka veie i ie hive lãdã lapot dji fe-la ki te bo dji lahi-la. Lapot-la luvui linso, i ie sotxi. Ie maxe lãdã un lahi, i, djinku, zãj-la ale. ¹¹ Ẽbe Pie kõphan akisa te ka fet i li dji: __ato mo save ki, vuemã, Sẽie voie so zãj i libiate mo dji povua dji Herodes i dji tut sa ki judeu-iela te gãiẽ itẽsiõ dji fe mo. ¹² Kã Pie kõphan sa ki te ka fet, li ale pu kaz dji Mahi, mãmã dji Jã Mahkus. Boku mun te hasãble laba ka phuie. ¹³ Li bat lãdã lapot dji djivã-la, i siavito fam, ki ie te k'aple Rode, ale gade a te kimun. ¹⁴ Kã li hukonet vue dji Pie, li hete kõtã boku, ki kã pu li te luvui lapot-la, li tonẽ ka kuhi pu hakõte ki Pie te laba deho. ¹⁵ Ẽbe ie dji: u fu! Mẽ li kõtxinẽ dji ki a lavehite. Djila ie dji: djivet a so zãj! ¹⁶ Ẽkãt sa, Pie te ka kõtxinẽ bat lãdã lapot-la. Kã ie luvui lapot-la i ie ue ki a Pie mem, ie hete boku pe. ¹⁷ Li fe un sin ke so lãme pu ie hete this i li hakõte kumã Sẽie te libiate'l dji phuiziõ-la. _Li dji: zot hakõte sa pu Txiag i pu uot fue-iela! I aphue li sotxi dji laba i ale pu uot kote ¹⁸ Kã ju bõmãtẽ, fet un ghã kõfusiõ ãt soda-iela, pase ie pa te save akisa ki te fet ke Pie. ¹⁹ Herodes voie ie sase'l, mẽ ie pa thuve'l. Ẽbe, aphue ki li dumãde dji soda-iela, li voie txue ie! Aphue djisa, Herodes sotxi dji hejiõ dji Judeia, li hete un de tã la Cezareia. ²⁰ Vue Herodes te boku ãhaj ke mun-iela ki ka hete la vil dji Tiro i dji Sidom. Ẽbe ie fõmẽ un patxizã i ie ale pale ke Herodes. Phõmiẽ ie hesi kose ke Blasto, ki a te un füsiõne dji vue-la pu ide ie. Djila ie dumãde pu vue-la hete kõtã ke ie, pase mãje ki ie hejiõ-iela te ka husuve te ka vinï dji pei dji vue-la. ²¹ Herodes make un ju ke ie i lãdã sa ju-la li fuhe so lẽj dji vue, li asi lasu so obiho i li kumase koze. ²² I pov-la te ka hele: a un bõdje a pa un om ki ka koze! ²³ Lãdã mem lokasiõ un zãj dji Sẽie blese Herodes, ke un maladji, pase li asekte *Gloria ki selmã Bõdje te mehite. ve mãje'l i li muhi. ²⁴ I pahol dji Bõdje te ka ãnüsie pu tut kote-iela, i te gãiẽ boku mun ki te ka asekte pahol-la. ²⁵ Kã Barnabe i Saulo finï ie misiõ la Jehuzalem, ie tonẽ i pote ke ie Jã Mahkus.