¹ Apostolo-iela i uot mun ki te ka suiv Jezi lãdã tut hejiõ dji Judeia save ki nõ-judeu-iela te husuve pahol dji Bõdje. ² Kã Pie tonẽ pu Jehuzalem, djisip judeu-iela koze mal dji li, ³ ie dji: "u ãthe lãdã kaz dji nõ-judeu-iela i u juk mãje ãsam ke ie"! ⁴ Ẽbe Pie hakõte tut sa ki te fet djipi kumasmã. Li dji: ⁵ Mo te la vil dji Jope i laba, ẽkãt mo te ka phuie, mo te gãiẽ un viziõ. Mo ue un bagaj sãble un gho dha, ki desan dji siel-la, mahe lãdã so kat put-iela, li hete phox dji mo. ⁶ Mo gade pu ãdjidã dji sa bagaj-la ke ãtẽsiõ i mo ue animal ki fã, i ki sovaj, animal ki ka hale ate i jibie. ⁷ Aphue mo tãde un vue, ki dji pu mo: "Pie leve! txue i maxe ie"! ⁸ Mo hepon: "Sa nõ Sẽie! mo pa jẽ mãje bagaj ki lalua-la ka kõsidehe sal i pa bõ!" ⁹ Ẽbe vue-la koze ãko dji siel-la: "pa aple dji pa bõ sa ki Bõdje sãtxifike"! ¹⁰ Sa fet thoa fue, aphue tut sa bagaj-la hutonẽ pu siel-la. ¹¹ Jistemã lãdã sa lokasiõ-la thoa om ki ie te voie dji Cesareia pu sase mo hive lãdã kaz kote mo te ka hete. ¹² I Lesphui dji pu mo ale ke ie, sã heklãmẽ. Sa sis fue-iela dji Jope osi ale ke mo, i no tut ãthe la kaz dji Cornelio. ¹³ Ẽbe li hakõte pu no kumã li ue la so kaz un zãj, djibut, i dji pu li: "voie un de mun pu Jope pu sase Simõ, ki osi ie k'aple Pie. ¹⁴ Li ke dji kumã u i tut u lafãmi puve sove". ¹⁵ I Pie kõtxinẽ: Kã mo kumase pale, Sẽtesphui desan lasu ie, kumã li te vinï lasu no ãvã. ¹⁶ Dji mo xõje ki Sẽie Jezi te dji: "a lavehite ki Jã batxize ke djilo, mẽ zot ke batxize ke Lesphui Sẽ". ¹⁷ Vuemã, nõ-judeu-iela husuve dji Bõdje mem povua ki no husuve kã no khe lasu Sẽie Jezi Khi. I akimun ki a mo pu ale kõt Bõdje? ¹⁸ Kã ie tãde sa, ie hete sã save akisa pu dji i ie adohe i lue Bõdje, ie dji: Ẽbe Bõdje bai osi pu nõ-judeu-iela opohtunite pu hepãtxi i pu gãiẽ lavi etehnel. ¹⁹ Djisip-iela dji Jezi ki te ale Kate palakos dji pehseguisiõ ki te kumase ke lamo dji Estevão. Un de ale juk la hejiõ dji Fenicia, zile dji Chipre i vil dji Antiquia i ie te ka ãnüsie pahol dji Bõdje selmã pu Judeu-iela. ²⁰ Mẽ uot-iela, ki a te dji Chipre i dji vil dji Cirene, ale juk la Antioquia ie pale osi pu nõ-judeu-iela i ie ãnüsie bõ nuvel a hespek dji Sẽie Jezi pu sa mun-iela. ²¹ Povua dji Sẽie te ke ie, i boku mun khe i ie asekte Sẽie Jezi. ²² Sa nuvel-iela hive la legliz dji Jehuzalem, ki deside voie Barnabe pu Antioquia. ²³ Kã li hive laba li ue kumã Bõdje te bẽnï sa mun-iela, Barnabe hete boku kõtã. Li bai fos pu tut kõtxinẽ fiam lasu Sẽie, dji tut ie txo. ²⁴ Barnabe, a te un om bõ, plẽ ke Lesphui Bõdje i dji boku espua. I boku asekte Sẽie. ²⁵ Aphue Barnabe ale juk la Tarso, sase Saulo ²⁶ Kã li kõthe'l, li ale ke'l pu Antioquia. Ie hasãble dehãtxi un ãnẽ ke mun dji sa legliz-la i ie mõthe boku mun. A laba la Antioquia ki, phõmiẽ fue, ki ie aple djisip-iela dji * khẽtxiẽ. ²⁷ Lãdã sa tã-la un de *phofet ale dji Jehuzalem pu Antioquia. ²⁸ Un dji ie, ki ie k'aple Agabo, leve i, pu povua dji Sẽtesphui, li ãnüsie: ke hive ghã fẽ lãdã tã-la ãtxe. Sa fet kã Claudio te ka kumãde Roma. ²⁹ Ẽbe khẽtxiẽ-iela deside ide fue-iela ki te ka hete la hejiõ dji Judeia, i xak un bai sosulõ sa ki ie te gãiẽ. ³⁰ I ie voie lajã-la ke Barnabe i Saulo, pu ie bai pu *presbitero-iela dji legliz-la.