¹ Lãdã vil dji Cesareia te gãiẽ un om ki ie k'aple Kohnelio (Cornelio), ki a te un komãda dji un patxizã dji soda dji Italia. ² Li te sa un om ki ka suiv helijiõ; Li i tut mun-iela dji so kaz te ka adohe Bõdje. Kohnelio (Cornelio) te ide boku judeu ki pov, i li te ka phuie pu Bõdje tut ju-iela. ³ Un ju, laba pu thoaze dji asue, Kohnelio (Cornelio) te gãiẽ un viziõ. Li ue un zãj dji Bõdje, ki hive dji Kohnelio (Cornelio) i li dji: Kohnelio (Cornelio)! ⁴ Li hete ka gade pu zãj-la, i ke boku pe, li dumãde: _akisa, Sẽie? zãj hepon: _Bõdje asekte u phuie-iela i tut sa ki u bai pu mun ki pov-iela i Li pa blie dji u. ⁵ Ato voie un de om juk la vil dji Jope pu sase un om ki ie k'aple Simõ Pie. ⁶ Li ka hete la kaz dji un not Simõ, un om ki Ka thavai ke lapo i ka hete obo un ghã lahivie. ⁷ Kã zãj-la ale, Kohnelio (Cornelio) aple vit de siavito i un soda ki te ka suiv helijiõ i ki te ka thavai pu li. ⁸ Kornelio (Cornelio) hakõte pu ie tut sa ki fet i li voie ie pu ale pu Jope. ⁹ Uot ju-la, midji, Pie mõte ãle fetaj kaz-la pu phuie. Ẽkãt sa, om-iela te ka vinï lãdã ximẽ-la, phox dji Jope deha. ¹⁰ Pie hete fẽ i li te le mãje un kek bagaj. Ẽkãt mãje-la te ka phuepahe, li te gãiẽ un viziõ. ¹¹ Li ue siel-la luvui i un bagaj sãble un gho dha mahe lãdã so Kat put-iela, ki te ka desan juk lasu late-la. ¹² Ãdjidã dha-la te gãiẽ tut kalite animal dji kat pat, animal ki ka hale ate i dji jibie-iela. ¹³ Ẽbe Pie tãde vue-la ,ki te ka dji kõsa : __Pie leve! txue i mãje ie! ¹⁴ Pie hepon: nõ, dji pies mãiẽ, Sẽie! mo pa jẽ mãje pies bagaj ki lalua-la ka kõsidehe sal, i pa bõ! ¹⁵ Vue-la pale ãko ke Pie: __ pa aple dji sal sa ki Bõdje sãtxifike. ¹⁶ Sa fet thoa fue. I aphue bagaj ki te sãble un gho dha-la ale ãko pu lahosiel. ¹⁷ Pie kumase dji li mem akisa sa viziõ-la te le dji. I lãdã sa mumã-la om-iela ki Cornelio te voie, ie te deha save kote ka hete kaz dji Simõ i ie te deha hive lãdã lapot-la. ¹⁸ Ie aple un mun dji kaz-la i ie dumãde: un om ki ie k'aple Simõ Pie ka hete esi ? ¹⁹ Pie te ka majinẽ tuju lasu viziõ-la, kã Sẽtesphui dji : __kute! esi la thoa on ka sase u. ²⁰ Ato leve, desan i ale ke ie. Ale thãkil, pase ki a mo ki voie vinï esi la. ²¹ Ẽbe Pie desan i li dji pu om-iela: __mo sa mun ki zot ka sase. Pukisa zot vinï esi? ²² Ie hepon: komãda Cornelio voie no esi. Li sa un bõ om, li ka khe lasu Bõdje, i tut judeu-iela ka hespete'l. Un zãj dji Bõdje voie ki li dumãde dji u pu ale juk la so kaz, pu li kote akisa ki u ke dji. ²³ Ẽbe Pie ẽvite om-iela pu ãthe lãdã kaz-la, pu hete pase nuit-la laba. Bomãtẽ Pie leve i li ale ke ie, i un de fue ki te ka hete la Jope ale osi. ²⁴ Lãdã uot ju-la ie hive la Cesareia. Cornelio i so lafami-iela i so kamahad-iela ki li te ẽvite deha te ka ãtan Pie ²⁵ Kã Pie te ka ãthe, Cornelio vinï kõthe'l, li ãjunü i bese so tet djivã Pie. ²⁶ Mẽ Pie fe ki li hete djibut, Pie dji: _hete djibut! mo sa un om kumã u. ²⁷ Ẽkãt li te ka koze ke Cornelio, Pie ãthe lãdã kaz-la li ue boku mun hasãble laba. ²⁸ Ẽbe li dji pu ie tut: _ zot save biẽ ki helijiõ judeu-iela pa ka asekte ki ie fe kamahad ke nõ-judeu-iela o pu ãthe lãdã ie kaz-iela. Mẽ Bõdje mõthe pu mo ki mo pa djivet aple pies mun sal, o pa bõ. ²⁹ Pu sa, kã zot aple mo , mo vinï dji bõ volõte. Ato mo le save pukisa zot voie aple mo. ³⁰ Cornelio hepon: _Kat ju deie, thoaze dji asue, mo te ka phuie esi la mo kaz. Djinku, un om lãdã lẽj blã pahet djivã mo ³¹ i li dji: _ "Cornelio, Bõdje tãde u phuie-iela i xõje dji kisa u fe pu ide mun ki pov-iela. ³² Voie un kek mun Juk la Jope pu sase Simõ, ki osi ie k'aple Pie. Li ka hete la kaz dji Simõ, sa ki ka thavai ke lapo, ki ka hete obo un ghã lahivie". ³³ Ẽbe mo voie aple u vit, u fe boku biẽ vinï esi. Ato no tut hasãble esi la phuezãs dji Bõdje, pahe pu kute sa ki Sẽie voie u dji pu no. ³⁴ Ẽbe Pie kumase pale. Li dji: _ ato mo save, ki vuemã, Bõdje kõtã tut dji mem mãiẽ, ³⁵ Li ka asekte tut ki ka khe i ki ka fe sa ki jis, li pa ka gade pu has . ³⁶ Zot konet mẽsaj ki Bõdje voie pu pov dji Izhael, ãnüsie bõ nuvel dji kõtãtmã dji Jezi Khi , Kia Sẽie dji tut. ³⁷ Zot save akisa ki hive lãdã tut late dji Izhael, kumase la Galileia, aphue ki Jã ãnüsie so mẽsaj a hespek dji batem-la. ³⁸ Zot save osi kumã Bõdje devide Lesphui Sẽ-la lasu Jezi dji Nazahe i bai li povua. Jezi maxe tut kote ka fe biẽ i djiehi tut sa ki djab-la te ka domïnẽ, pase ki Bõdje te ke li. ³⁹ No sa tẽmuẽ dji tut sa ki li fe lasu late dji Judeia i la Jehuzalem. I aphue ie txue'l, klue lãdã un lakhue. ⁴⁰ Pie kõtxinẽ: __ Bõdje hesusite Jezi lãdã thoazem ju i osi li fe Jezi pahet pu no, ⁴¹ tut pov-la pa ue'l, mẽ selmã no, ki sa tẽmuẽ ki Bõdje te deha xuezi. No mãje I bue ãsam ke Li aphue ki Bõdje hesusite'l. ⁴² Jezi voie no ãnüsie so bõ nuvel pu pov-la i pu bai tẽmuẽ ki Bõdje mete'l kumã un Mun pu kõdãnẽ mun ki vivã-iela i ki muhi-iela. ⁴³ tut phofet-iela pale a hespek dji Jezi, ie dji ki tut ki khe lasu'l ie pexe-iela ke padõnẽ pu so nõ. ⁴⁴ Kã Pie te ka pale tuju, Sẽtesphui desan lasu tut ki te ka kute mẽsaj-la. ⁴⁵ Djisip judeu-iela dji Jezi ki te vinï dji Jope ke Pie hete susphan pu Bõdje te devide *povua dji Sẽtesphui lasu tut nõ-judeu-iela. ⁴⁶ Ie tãde nõ-judeu-iela te ka pale ã lãng ẽthaj i adohe i lue Bõdje. Ẽbe Pie dji: ⁴⁷ __ sa mun-iela husuve Sẽtesphui kumã no osi husuve. Li gãiẽ un kek mun ke ãpexe ie batxize ke djilo? ⁴⁸ Ẽbe li voie ki sa mun-iela ale batxize lasu nõ dji Jezi Khi. I ie dumãde pu Pie hete laba un de ju.