¹ Fala n baa bi niyiekaaba dogu yu n joagini, ya dogu gbie leni yaaba n mabindi bi nuba ² Baa cengi maama baa kuli , baa go gba tundi, baa dugi Limiali Diedo po, baa nagidi U Tienu. ³ U yudamba tie nani ya yangbanli n gaandi ki duni; u bujiaba tie nani yaa fuasangbanli, bi yaa cuo ku ñiagu bi kan ŋmani ki sieni li baa kuli saala po. ⁴ U sawalipoaba tie japaadanba leni jajanbididanba; U kopadicianba joagindi yaala n gagidi ki ŋani, ki miidi li balimaama mo. ⁵ Limiali Diedo ye u dogu yeni niini ki tiegi , O ki tiendi kuli yaali n bia; fiifaama kuli O ja yaa buudi tiegi, kaa jidi; ama baa leni lan kuli o nibiado ki bani yaala n tie fee bonla. ⁶ N bolini i nilanbuoli boncianla, n bolini bi kaanjigi paalu kuli,N biidi bi sani kuli, o baa kuli ki go tagi bi sani! N bolini bi dogi nilo baa kuli ki go ye likani! ⁷ N bi tua, a yaa bi pia n fangili ki tuodi n tundi, a dogu kan bi bodi, min den bili yaa falaciamo cuonu yeni kuli kan bi jiidi ŋa po. ama li kani yaaba suagi liiga ki tiendi yaala joagini bebe. ⁸ Li tie lan yaapo, Mini Limiali Diedo N yedi: guudi mani nni min baa fii ki cua yi kani yaa daali ki wani yi ke yi nani, kelima n jagi ke n baa taani i nilanbuoli kuli leni mi diema kuli niba, ki jiini n paabienli kuli bi po ban bandi n pabienli n bia maama. kelima leni n pabienli fantama ki tingi kuli baa buodi. ⁹ Lan wani N baa teni i nilanbuoli maama n lebidi ki tua maŋanma, bi baa taani ki yaa kpiagidi O Diedo, ki go tuuni O po leni payenli. ¹⁰ Ba n niba yaaba n yaadi ki ban ye hali Etiopi kpenu kandima, ban moko baa yaa kpendini n po bu paabu. ¹¹ Laa daali po, yi kango jie i fe kelima yi tuonjuagima po. kelima n baa ñani yi siiga bi japaadanba, bani yaaba n gbengidi bi yula. yi japaadi kuli baa ba u bianu n juagagidi ŋanli po. ¹² yaa niba n baa sieni, kan yaa yaaba, ama bi baa yaa tie yumiindanba, ki go dugi Limiali Diedo po. ¹³ Isalelenba niba yaaba n baa sieni, kan go yaa tiendi ti tuonbiadi, bi kan yaa pua tuofaama, janbi maama mo kan go yaa ña bi ñoana nni. ama bi ba yaa di ki go goa, ke o baa kuli kan yagi bi yama mo. ¹⁴ Siyono bisalo , mangi a pali! ŋan yigini li pamanli yigini Isalele! mangi a pali hali boncianla Jerusalema bisalo! ¹⁵ Limiali Diedo ga yi leni fala ki teli ki fuagidi a yibali. Limiali Diedo , wani Isalelenba bado O ye yi siiga, ŋan da go jie ki falaba kuli baa cua. ¹⁶ Laa daali po , bi baa yedi Jelusalema ,ŋan da jie li baa kuli, ŋa nii n da tadigi Siyono! ¹⁷ Limiali Diedo a Tienu ye yi siiga ki tie jakoando yuan faabidi. O baa mangi O pali kelima a po; O buama yipo baa teni wan duani O yama, ki yiini leni li pamancianli kelima yipo. ¹⁸ N baa taani yaaba n ye li pabiili nni kuli, ki paadiba leni i badi ciami, yaaba ñani i siiga ke i fe ŋoaba. ¹⁹ Diidi laa yogunu, n baa wani fala yaaba n den mabidi yi, n baa faabi yaaba cuoni ki duugidi kuli, ki ga ban teli yaaba, n baa teni ban baa ti kpiagidi, bi yela mo n ña nani kani ke bi den la i fe. ²⁰ Laa yogunu po, n baa goa ki kpeni nni yi, li baa yaa tie min baa goa ki taani yi yaa yogunu. kelima n baa teni yin goa ki baa ti kpiagidi yi yela mo baa ña ŋanduna nibuolu kuli nni. Limiali Diedo n yedi yeni.