¹ Fini Betelema Yufilata dogu, awa Juda buoli dogi kuli siiga ama yua n baa die Isalele yaaba baa ña a ya niinne. Wani yua n den ye hali yogu. ² Lani yaa po U Tienu baa ha o niba bi yibalinba nuu nni hali ya pua n baa ma ki bonjaga yeni ya mali ga ya yogunu. Lanwani ki biga yeni kpiiba yaaba n sieni ki ye foagima baa goa ki kpeni Isalele yaaba diema nni. ³ O baa doagidi ki yaa die leni Li Miali Diedo paalu leni U Tienu yeli kpiagidi. ⁴ Wan baa cuani mi yanduanma. Asili yaaba yaa cua ki ba ti diema ki kua hali ti cuuna nni, ti baa teni bi yudanba boncianla n fii ki tuogi ba. ⁵ Bi baa diedi A sili leni Nemilomi diema leni bi jatiadi. Bi ya hmaa ti tinga nni, yeni bi baa faabi ti leni Asili yaaba nuu nni bi ya cua ti diema nni yaa yogunu ki hmaa ti tinga nni. ⁶ Lanyogunu Jakoabo puolihuani yaaba n sieni baa ye yaa nibuoli n yaba siiga nani ya mangu n ña Li Miali Diedo kani, nani ki taagi n mini ki ha yaa ñinboala ti muadi po. Ki taaga yeni naa gu bi nisaaliba kani liba. Bi nisaaliba mo ka cuani ga. ⁷ Jakoabo puolihuani yi n sieni baa ye mi diema nni ya nilanbuoli n yaba siiga nani ya yangbanlo n ye a yangola siiga yeni, nani ya yangbanbiga n ye a pegola siiga. O ya cuoni bi siiga o bibini ki padi ba ke oba kuli kan ga ba o kani. ⁸ Han pua a yibalinba, ki bolini bani i nanda yeni kuli. ⁹ Li Miali Diedo go yedi: Laa daali n baa bolini yin pia ya taami, ki go bolini leni yin pia ya toateliti. ¹⁰ N baa bolini ya dogi n ye yi diema nni kuli, ki go bolini yin den maa ya diepaala bu toabu po. ¹¹ N baa bolini yin kubi ya buligbandi yi nuunni, a lingida kan go ya ye yi siiga. ¹² N baa bolini yi buli leni yi buli nannana yi siiga, yi kan gbaani ki kpiagi yi nii n tagi yaala yeni. ¹³ N baa bolini yin den caani yi diema nni Akela budaadi yaadi yeni, ki go bolini yi dogi. ^{14 15} N baa tuu n panli leni li pabienli ki bu ki cuo ya nibuoli n ki cengi n maama.