¹ Isalele yaaba den sua ke Jeliko dogu buliñoana luoni ki ñagini ñagini oba kuli kan kua oba mo kuli kan ña. ² Li Miali Diedo den yedi Josue: Diidi ki le, n teni a Jeliko dogu leni u bado leni u jakoandiciama. ³ Yin gaani ki lindi mani u dogu, yinba yaaba n tie a jakoanda kuli, yin gaani ki lindi u dogu daali kuli yenma. Yi baa tiendi yene hali dana luoba. ⁴ kopadicianba lele baa ye yaaba n tugi ku hantaadikpagu liiga, ki ya kubi kakacinba lele ki cuoni ki piebi. Li dan leleeli daali yi baa gaani ki lindi u dogu hali taalima lele. Lani bi kopadicianba baa piebi kakacinba. ⁵ Bi ya piebi ya naatuntunli n kpaani, yi ya gbadi kakacinba moe! Bi niba n tiani boncianla. Lanwani u dogu bilinciamu baa baa ki mumudi. Lanwani bi niba kuli baa kandi ki kua u dogu nni. ⁶ Nuni bijua Josue den yini bi kopadicianba ki yedi: Yin tugi mani ku haqntaadikpagu, kopadicianba lele mo n ya kubi kakacinba lele ki kua ku hantaadikpagu liiga. ⁷ O den yedi bi niba kuli: Gaani mani ki lindi u dogu, ya jaba n pia ti toatiadi mo n kua Li Miali Diedo hantaadikpagu liiga. ⁸ Josue n den maadi leni bi niba ki gbeni, ya kopadicianleleediba n den kubi kakacinba lele den kua ku hantaadikpagu liiga ki cuoni ki piebi. Li Miali Diedo hantaadikpagu den ye bi puoli po. ⁹ A jakoanda den cuoni ya kopadicianba n kubi kakacinba ki piebi liiga. Bi naa toatieba den ye ku hantaadikpagu puoli po. Yaaba n den piebi kakacinba den cuoni ki piebi. ¹⁰ Josue den teni bi niba li naa ñoabonli: Yi kan tiani, yin da go teni ban gbadi yi niali hali ya daali ke n baa yedi yi: Kpani mani! Lanwani yin kpaani. ¹¹ Josue den teni ke bi taa Li Miali Diedo hantaadikpagu ki gaani ki lindi u dogu. Bi den lindi u dogu yenma ki guani ki kua li nagili nni ki duani likani. ¹² Josue den fii ku tasoanpanpangu, bi kopadicianba mo den tugi Li Miali Diedo hantaadikpagu. ¹³ Ya kopadicianleleediba n den kubi kakacinba ki ye Li Miali Diedo hantaadikpagu liiga den piebi. A jakoanda den cuoni bi liiga ke bi toatieba hoa ku hantaadikpagu puoli. Bi den piebi kakacinba. ¹⁴ Bi den gaani ki lindi u dogu yenma li danlieli ki guani ki kua bi nagili nni. Bi den tiendi yeni daali kuli hali dana luoba. ¹⁵ Li danleleeli daali bi den faa ki fii ku tasoanpanpangu ki gaani ki lindi u dogu nani ban den maani ki tiendi maama. Bi den lindi taalima lele. ¹⁶ Mi taaleleedima, bi kopadicianba n den piebi kakacinba Josue den yedi bi niba: kpaani mani, kelima Li Miali Diedo taa u dogu ki teni yi! ¹⁷ Yin bolini u mani wuni leni yaala n ye u nii nni kuli kelima u tie Li Miali Diedo n die yaala. Ama yin cedi Lahaba leni yaaba n ye o diegu nni kuli. Kelima o den wuoni tin den soani ya dodiidiba. ¹⁸ Yin kubi mani yi yula bebe ki da taa yaala n baa bodi siiga liba kuli. Kelima yi ya taa yaala n baa bodi yeni, yi baa kuani Isalele yaaba nagili nni mi bodima ki cuani ti yanyagidi. ¹⁹ Yaala n tie halinjufa leni yaala n tie wula leni ya tiadi n tie kumoandi leni kuboandi kuli, baa tie Li Miali Diedo n die yaala. ²⁰ Bi niba den kpaani ke bi kopadicianba mo den piebi kakacinba. Bi niba n den gbadi kakacinba moe, bi den tiani boncianla, u dogu bilinciamu den baa ki mumudi. Bi niba den kandi ki kua u dogu nni. Bi den paadi u dogu ki diedi u. ²¹ Ki bolini yaala n ye u dogu nni leni ki jusiega, ki cili bi niba hali ki ban pundi ti yandi kuli. ²² Josue den yedi ya jaba n den gedi ki ban diidi u dogu: Kua mani li poconconli Lahaba diegu nni, ki ñani o leni o bonpiakaala kuli nani yin den niani o maama. ²³ Bi dodiidiba yeni den kua ki ñani Lahaba leni o baa leni o naa leni o naataani leni o bonpiakaala kuli, ki gedini Isalele yaaba nagili kunu. ²⁴ bi den sia u dogu leni yaala n ye lienni kuli, bi den taa halinjufa, wula leni ya tiadi n tie kumoandi leni kuboandi ki kuani U Tienu kaangagidiko halimano nni. ²⁵ Joasue den cedi ke Lahaba leni o diegu nni yaaba kuli fo. O buolu baa ye Isalele yaaba siiga hali dinla. Kelima o den wuoni Josue n den soani ya dodiidiba ke bi diidi Jeliko dogu. ²⁶ Li tie yene ke Josue den soli u dogu ki yedi: Yua n baa fii ki gua maa u naa dogu blinu kuli, ti solindi n ya ye leni o. O ya fii ki pu li tanpuuli ya yogunu, o bijakpelo baa kpe. O ya sieni u bilinu buliñoaa mo o bijuoga baa kpe. ²⁷ Li Miali Diedo den ye leni Josue ke o yeli kpedi ki ñani mi diema nni kuli.