¹ Isalele yaaba n den duodi Judena kpenu ki gbeni, Li Miali Diedo den yedi Josue: ² Gandi mani Isalele buolu yaaba siiga piiga n jaba lie, buolu kuli siiga jayendo. ³ Ki teni ba ya ñoabonli n tie ne: Yin kua Judena kpenu siiga, bi kopadicianba n den sedi naankani ki taa piiga n tana lie, yin taa ha ki ban bili yin baa duani naankani ku ñiagu. ⁴ Josue den yini wan den gandi Isalele yaaba siiga ya piiga n jaliediba yeni. ⁵ O den yedi ba: Yin kua mani Judena kpenu nni, Li Miali Diedo hantaadikpagu nintuali, yi siiga yua kuli n taa tanyenli lan taani ki tua piiga n tana lie nani Isalele yaaba coali n da maama. ⁶ Ke laa bonla n tua maalima yi siiga. Ya daali ke yi bila ban ti buali yi: Ya tana n tie ne bua ki yedi yipo be? ⁷ Yi baa yedi ba: Judena kpenu ñima den boagidi Li Miali Diedo hantaadikpagu nintuali, kun den tagini Judena kpenu nni yaa yogunu, Judena kpenu ñima den jia ya tana n tie ne baa tie Isalele yaaba po maalima ya yogunu kuli po. ⁸ Bi piiga n jaliediba yeni den tieni Josue n den yedi ba yaala. Bi den ñani piiga n tana lie Judena kpenu nni, nani Li Miali Diedo n den n yedi Josue maama, nani Isalele buolu yaaba coali n den da maama, bi den taa laa tana ki ban bili ban den baa duani naankani ku ñiagu. ⁹ Josue go den sieni piiga n tana lie Judena kpenu siiga, bi kopadicianba n den se naankani ki bugi ku hantaadikpagu. A tana yeni baa ye likani ki pundi hali dinla. ¹⁰ Ya kopadicianba n den bugi ku hantaadikpagu den se Judena kpenu siiga, hali bi niba n baa tieni ki gbeni Li Miali Diedo n den waani Josue ke wan yedi ba yaala, nani Musa n den waani Josue maama. Bi niba den jaligi ki doni mi ñima. ¹¹ Bi niba kuli n den duodi ki gbeni, bi kopadicianba den duodi leni ku hantaadikpagu ki kua bi niba liiga. ¹² Lubena buolu yaaba, Gada buolu yaaba leni Manase buolu yu n tie buolu boagidima den taa bi toatiadi ki gaa Isalele yaaba yaabas n sieni liiga ki duodi nani Musa n den yedi ba maama. ¹³ Yaa jaba n den taa ti toatiadi ki bogini bu toabu po den bua ki pundi niba tuda piina. Bi den duodi Judena kpenu Li Miali Diedo nintuali ki pundi Jeliko tialu nni. ¹⁴ Laa daali Li Miali Diedo den puni Josue ti kpiagidi Isalele yaaba nintuali. Bi den fangi o nani ban den fangi Musa maama o miali dana kuli nni. ¹⁵ Li Miali Diedo den yedi Josue: ¹⁶ Han waani ya kopadicianba n bugi ku hantaadikpagu ke ban ña Judena kpenu nni. ¹⁷ Josue den yedi ba: ña mani Judena kpenu nni. ¹⁸ Ya kopadicianba n den bugi Li Miali Diedo hantaadikpagu n den ñani Judena kpenu siiga ke bi taana hmaa li boanjaali, Judena ñima den guani mi kaanu ki gbieni ki yayadi i kaani kuli nani man den kpa yadi maama. ¹⁹ Isalele yaaba den duodi Judena kpenu o hmakpialo danpiiga daali ki kpa bi nagili Giligali dogunni Jeliko puoli. ²⁰ Josue den sieni Giligali dogu nni ya piiga n tanlieda ke bi den taa ha Judena kpenu nni. ²¹ O den yedi Isalele yaaba: Yi bila ya ti buali yi ya tana n tie ne bua ki yedi yaala, ²² Yi baa bangi yi bila ki yedi: Isalele yaaba den duodi Judena kpenu taakuoma. ²³ Kelima Li Miali Diedo den teni ke Judena ñima boagidi kaani lie ke yikuli baa ki duodi, nani Li Miali Diedo n den boagidi mi ñinciamoanma kpenu maama ti nintuali ke tikuli den baa ki duodi. ²⁴ O den tieni yeni ke handuna nibuoli kuli n bandi ke Li Miali Diedo nuu pia u paalu, ke yin ya pia Li Miali Diedo yi Tienu po li fangili yogunu kuli.