¹ Han tieni li padibinbinli yaali yaapo ke bi baa juugi tulale. Han tieni li leni Akasia ya daadi. ² Han teni li piamu leni li foagimu n ya de. Li foagimu baa ya tie nukpandunyenli, li kpedima mo baa ya tie nukpanduna lie. Lani leni li padibinli ñoakunnaadi yi n yugidi kuli baa taani ki ya tie yenma. ³ Han boali li padibinbinli tanpoli, li kali, leni li kunnaadi yi n yugidi yeni kuli leni wulamoano, han kugini likuli leni wula ki ban cebini. ⁴ Han duadi wula ñoagidibila ya niinne ke i dopandi baa tuuni li padibinli tugima po. ⁵ Han kpie i dopandi yeni kuli leni akasia ya daadi ki yuandi ki boali i leni wula. ⁶ Han bili li padibinbinli ki tegini bu kpalidoaginkaabu yaabu n ye ku hantaadikpaku po min baa kadi leni a naani. ⁷ Tihaagu kuli Alono baa juu tutale padili o ya kua ki baa hanbi mu fidisanmu kuli. ⁸ Yenjuogu kuli mo wan yen juu tutale o ya baa cuoni mu fidisanmu ya yogunu.Han ya juugi tutale n yeli kpiagidi po ki cedi nifiima n tu nifiima. ⁹ Yin da padi li padibinbinli po tutale fano,bi padijuukaali,bi bu paabu padili yin da cabi li padibinbinli po liba kuli mo. ¹⁰ Li binli nni yenma,Alono baa padi ti tuonbiadi sugili padili ki wuli ki padiyanga soama li padibinbinli yina po.Binli kuli laa padili baa tieni nifiima n tu nifiima.Li padibinbinli baa ya tie Li Miali Diedo nintuali ya bonla n gagidi ki hani hali bonhanla.'' ¹¹ Li Miali Diedo go den maadi leni Musa ki yedi: ¹² A ya fiini Isalele yaaba coali nilo kuli baa pa yi o miali daafaabima po i panpaani lan tie falaba kuli n da baa yi li coali yogunu. ¹³ Bi ya coadi yua kuli o baa pa kujapienli boagidima nani ban bili maama U Tienu diegu po.Yi baa ga laa ligi Ligi Miali Diedo po. ¹⁴ Isalele niba yaada n pundi bi ki cie bina piilie danba kuli baa taani li nicoali nni,bi go baa teni ban gaani ya paabu Li Miali Diedo po mo. ¹⁵ O piado kan pa ki cie, o luodo mo kan pa laala n ki pundi kujapienli boagidima, yua kuli baa pa mini Li Miali Diedo o daafaabima po. ¹⁶ Han ga Isalele yaaba kani bi miana daafaabima ligi. Han taa laa ligi ki ya ŋanbidi u Kadikaanu gbandieli. Li baa ya tie Isalele yaaba po mi tiadima bonla Li Miali Diedo nintuali bi miana Daafaabima po." ¹⁷ Li Miali Diedo den maadi leni Musa ki yedi o: ¹⁸ Han duadi ti kumoandi tadigu ku tunkaanu moko n ya tie kumoandi han sieni gu u kadikaanu gbandieli leni li padibinbinli ya siiga ki gbieni gu leni mi ñima lan tua mi nigidihanbima po. ¹⁹ Alono leni o bijada baa nigidi ki hanbi bi taana leni taana leni bi nii leni laa ñima. ²⁰ Bi ya baa kua u kadikaanu gbandieli nni,li baa ya tie Isalele yaaba po mi tiadima bonla Li Miali Diedo nintuali bi miana daafaabima po. ²¹ Bi baa nigidi bi nii leni bi taana,lan tie ban da kpe. Li baa ya tie Alono leni o puolihuani po ya mabilikaama n baa ya ye ya yogu n tu ya yogu." ²² Li Miali Diedo den maadi leni Musa ki yedi: ²³ ŋan lingi tulalemoano yua n yi tulale militi,yua n tie bonñima ke o kpiagu tie kilo bonba kobimu 250,sinamomi leni o nuulimanu kilo bonba lie leni bonba lie leni boagidima, kaneli leni o nuulimanu kilo bonba lie leni boagidima. ²⁴ Kase kilo bonba kobimu 250 ki ŋoadi nani u kaangagidiŋamu nni ban biigidi maama. ²⁵ Han go baa olifie tiidi ya kpama moko litidi bonba luoba.Yua n tuuni tulale tuonli baa kaali likuli ki ñani mi kpagagidikaama ban yen soani leni yaama mi gagidihanbima bogida. ²⁶ A baa taa mane ki wuli ki gagidi ki hanbi u kadikaanu gbandieli leni ku hantaadikpaku. ²⁷ Tabili leni li tiabibidi,u fidisantuankaanu leni u tiabibidi,tulale padibinbinli. ²⁸ A padijuukaana padibinbinli leni li tiabibidi,ku kumoantadigu leni ku tuankaanu. ²⁹ A ya gagidi ki hanbi laa bonla kuli,li baa gagidi ki ya hani cain,yaala n sii laa bonla kuli ba gagidi. ³⁰ Han wuli Alono leni o bijaba yula po mi kpagagidikaama lan gagidi ki hanbi ba baa tuuni npo. ³¹ Li yaa puoli han yedi Isalele yaaba: ya kpama n tie mi gagidihanbima ya kpame ya yogu n tu ya yogu po laa kpama baa ye Li Miali Diedo tuonli po bebe yo. ³² Oba kuli n da sogi laa kpama,oba kuli mo n da tieni laa kpama buolu.Laa kpama gagidi ki hani,moko tilade yin fangi yi yula leni ma. ³³ Yua n ŋoali laa kpama buolu,bi yua n taa ma ki sogi nilamo bi baa ñani o o buolu siiga.'' ³⁴ Li Miali Diedo go den yedi Musa:"Lingi ya tiidi ya nuulu n mani,lan tie sitakite,onigisi,leni galibanumi. ³⁵ Han go pugini han baa ya tiidi yeni po a dugibila mo lan ya de yeni.Yua tuuni tulale tuonli baa kaali likuli leni mi yaama lan tua ya bonla n ki pia joagindi ki go gagidi ki hani. ³⁶ Han nugi ki baa li bonyoma ki sieni ma ku hantaadikpaku kani u Kadikaanu gbandieli nni min baa bili tin kadi naankani.Li baa ya tie yipo ya bonla n gagidi ki hani cain. ³⁷ Oba kuli n da tagi laa tulale buolu hantaaditoa po.Yin bili yi yama nni ke o li ye mini ya hantaado po bebe yo. ³⁸ Nilo ya tagi laa tulale buolu ki baa ya gba u nuulu manu,yi baa ñani o li nitaanli nni."