¹ Madiana ya kopadiciamo Musa cuadiba Jetilo n den gbadi U Tieni n tieni yaa hanbili Musa leni o Isalele ni buolu po, O den gbadi ke Li miali Diedo teni ke Isalele yaaba ña Ejipiti nni. ² Musa cuadiba Jetilo n den taa Musa pua Sefola ki cuani o kelima Musa da den gedini o, o denpo yo. ³ O den taa Sefola yaa bijaliediba, yendo den yi Gelisoma kelima Musa den yedi: N tie caana ki kaa mi diema ma nni. ⁴ O lielo den yi Eliesela kelima Musa den yedi: N baa ya U Tienu den todi nni ki faabi nni leni Falono jugisiega. ⁵ Musa cuadiba Jetilo leni Musa pua leni o bijaba, den cua mi fanpienma nni Musa n jiidi naani ki kuu leni U T ienu ya juali kani. ⁶ O den teni ke bi yedi Musa: Mini à cuado Jetilo n cua akani ki kubi a pua leni a bijaliediba. ⁷ Musa den ñani ki cua o cuadiba nintuali ki labini ki gobini o. Bi den puni bijaba bi laabaali ki yegi ki kua Musa gbandieli nni. ⁸ Musa den waani o cuadiba Li miali Diedo n den tieni Falono leni Ejipiti yaaba yaala kuli kelima Isalele yaaba yaapo. O den waani o ban den Laa yaa fala kuli usanu po leni Li miali Diedo leni Li Miali Diedo n den faabi ba maama yaapo. ⁹ Jetilo den mangi o pali kelima Li miali Diedo n den tieni Isalele yaaba po ya hanbili kuli, leni wan den faabi ba Ejipiti yaaba nuuni nni maama. ¹⁰ Jetilo den yedi: Li miali Diedo n ba Ti pagidi wani yua n den faabi yi Ejipiti yaaba leni Falono ya nuuni ki go faabi bi niba kuli Ejipiti yaaba nuuni nni. ¹¹ N bani moala ke Li miali Diedo pia u paalu ki cie i buli kuli, kelima o teni ke Ejipiti yaaba biadima goa ki baa bi yula po. ¹² Musa cuadiba Jetilo den padi U T ienu po Li padijuukaali leni à padifana. Falono leni Isalele yaaba nikpeliba kuli den cua ki taani leni Musa cuadiba ki dini U Tienu nintuali. ¹³ Lan den fii ki faa Musa den kali ki baa bu leni bi niba. Bi niba den se o nintuali ki cili ku tiŋaagu ki ban pundi hali ku yenjuogu. ¹⁴ Musa cuadiba den laa wan den tiendi bi niba po yaala kuli. O den yedi: A tiendi be mo nne bi naa niba po ? Be yaapo yo ke a kaa fini bebe ki tuuni li naa tuonli ke bi naa niba kuli se a nintuali ki cili ku tiŋaagu ki ban tuoni ku yenjuogu. ¹⁵ Musa den goa ki yedi o cuadiba : Bi niba na kpendi n kani ki bua ki buali U Tienu bonliba yo. ¹⁶ Bi ya pia maamaba bi siiga bi yen cua n kani min jia bipo ti buudi. N go yen teni ban bandi U Tienu ñoabona leni o balimaama. ¹⁷ Musa cuadiba den yedi o : ŋan tiendi yaala yeni naa hani. ¹⁸ A baa coagini a yuli ki go coagini ya niba n ye leni a kelima laa tuonli yaba ki cie a fidu. A kan fidi ki tieni li kuli fini a bebe. ¹⁹ Cengi min pia à po ya tundi U Tienu mo n ya ye leni a: A tuonli n baa ya tie han ga li nitaanli kaanu, han cua li nitaanli yeli nni, ki cuani ban pia ya maama U Tienu nintuali. ²⁰ ŋan ya bangi ba a ñoabona leni li balimaama ki go yen teni ban bandi lan pundi ke ban hoadi ya sanu leni lan ki pundi ban ya tiendi yaala. ²¹ ŋan gandi bi niba siiga bi bi yanfodanba yaaba n jie U Tienu, ki bua i moamoani, ki nani li suuli. han dini ba li bali ke ban tua niba tudilitudili yudanba leni niba kobigakobiga yudanba leni niba piimumuu yudanba leni ba niba piigapiiga yudanba. ²² Ban n baa ya ja Ti buudi bi niba po ya yogun kuli. Ya maama n tie macianmakuli ban cuani ma kani. Ama ma waamu kuli ban jiama bi biba, han wadi laa tugili yeni ke ban taani le ni a ki ya tugili. ²³ À ya tiendi yeni ke U Tienu mo wangi a han baa tieni yaala à baa fidi bonla kuli, bi naa niba mo baa pundi laafia yin caa naani . ²⁴ Musa den cengi o cuadiba yedima ki tieni wan waani yaala kuli. ²⁵ Musa den gandi bi yanfodanba ISalele yaaba siiga ki dini li bali ke bi tua bi yudanba leni niba po ki tie tudilitudili yudanba leni kobigakobiga yudanba leni niba piimumuu yudanba. ²⁶ Bi den ja bi niba po Ti buudi ya yogunu kuli. Bi den yen cuani Musa kani ya maama n pa, ama bi yen jia ti buudi bani bi ba ya maama n wa. ²⁷ Musa den faabi o cuadiba Jetilo ke o guani o diema nni.