¹ Isalele yaaba Kuli den fii Sini ya fanpienma ki cuoni nani Li Miali Diedo n den bili bipo li ñoabonli maama. ² Bi den jiidi Lefidima naankani mi ñinñokaama naa den ye bi niba po. Lanwani bi niba den cua ki cidi Musa li koanli. Bi den yedi:"Pa ti mi ñima tin ño." Musa den yedi ba:"Be yaa po ke yi cidi nni li koanli? Be yaa po ke yi biigidi Li Miali Diedo yeni?" ³ Bi niba den coagi ke u ñunñuulu den gbadi ba ke bi yenbidi Musa po. Bi den yedi:"Be yaa po ke a den teni ke ti ñani Ejipiti nni ki teni ke tinba leni ti bila leni ti yangola baa kpe u ñunñuulu?" ⁴ Musa den kpaani ki yedi:"Li Miali Diedo, n baa tieni lede leni bi naa niba? Li poadi waamu bebe ban madi nni a tana?" ⁵ Li Miali Diedo den yedi Musa:"Ga bi niba liiga, gandi Isalele nikpela ban yaa yegi leni a. Taa a jianu han den pua yu u kpenciamu . ⁶ Yeni ki ya cuoni. Diidi n baa sedi anintuali Holebi ya tanciangu kani. A baa pua ku tanciangu ke mi ñima ba ña ku niinni bi niba ño." Musa den tieni yeni Isalele nikpeliba nintuali. ⁷ O den yini laa kaanu Masa leni Meliba kelima Isalele yaaba den koani li koanli lankani. Be den biigi Li Miali Diedo ki yedi:< Miali Diedo ye ti siiga bi waa ye yo?" ⁸ Amaleki yaaba den cua ki baa Isalele yaaba bu toabu Lefidima kani. ⁹ Musa den Josue: "Gandi bi niba ki gedi ki tuogi leni Amaleki yaaba. Saala n baa se li juali yuli po ki kubi U Tienu gbianu n nuu nni ." ¹⁰ Josue den tieni Musa n den yedi o yaala kuli ki gedi ki ban tuogi bu tobu leni Amaleki yaaba. Musa leni Alono leni Huli den doni li juali yuli po. ¹¹ Ya yogunu ke Musa yuugi o nuu kuli, Isalele yaaba ya paalu n yen cie. Ama o ya den jiini o nuu Amaleki yaaba mo den pia u paalu ki cie. ¹² Musa nii den kpiagi ke o coagi ke bi den taa li tanli ki bili ke o kali lipo Alono leni Huli den muubi o nuu, niyendo den muubi nuyendu ke o liedo mo muubi u lielu. Lani n den teni ke o nii baa yuuga hali ke ki yenga ban kua. ¹³ Josue den pua Amaleki yaaba leni ki jugisiega ki paadi ba. ¹⁴ Li Miali Diedo den yedi Musa:"Diani lankuli li tili nni ke yin ya kubi laa bonla ya tiadima. Go waani Josue ke n baa ñani Amaleki yaaba ya tiadima ki tinga nni kuli." ¹⁵ Musa den maa li padibinbinli. O den puni li li naa yeli:"Li Miadi Diedo n tie n tuudicabili." ¹⁶ O den yedi: "Amaleki yaaba n tuo ki yugidi bi nii ki yie Li Miali Diedo ya bali kalikaanu po maama, yeni moko Li Miali Diedo baa pia leni ba bu toabu nifiima n tu nifiima."