¹ O Diedo den maadi yeni Moyiisi, Sinaayi fanpienma nni, ban den ñani Ejipti diema nni, li binlieli, o ŋmaacincinli. O den yedi, ² "Israyeli yaaba ń cuo mi pendima jaanma, ki ya jaani binli kuli lan buali ya yognu. ³ Li ŋmaalo nni, o piiga n daanaali daali, ku yenjuogu, yin cɔlni mi pendima bogda kuli yeni a yogu. Yin ŋanbi ki kubi li bogda, ki ŋɔdi ki cɔlni mi pendima jaanma ñɔmaama yeni li ñɔbona kuli ń bili maama." ⁴ Lanwani ii, Moyiisi den yedi Israyeli nitaanli, ke ban ŋanbi ki kubi mi pendima jaanma bogda lan buali maama. ⁵ Lanwani ii, bi den cuo ki seni mi pendima jaanma, li binli ŋmaacincinli, o piiga n daanaali daali, ku yenjuogu, ke bi da ye mi Sinaayi fanpienma nni. I srayeli nitaanli den cɔlni O Diedo ń bili Moyiisi ya ñɔbonli, ki tieni lan buali maama. ⁶ Bi niba den ye, ki jɔgni bi yula kelima bi nagni bi kpienba. Bi den kan fidi ki jaani mi pendima jaanma li daali. Bi den gedi ki la Moyiisi yeni Haarɔn li daali mɔno. ⁷ Li niba den yedi Moyiisi, "Ti jɔgni ti yuli kelima ti nagni kpiemo. Be n cedi ke i bua tin ya ye Israyeli nitaanli siiga, yin bua padi O Diedo po, yin seni ya yognu, mi pendima jaanma po, li binli nni ii?" ⁸ Moyiisi den yedi ba, "Guudi mani, min cengi O Diedo ń bili ya ñɔbonli ke li nua yinba." ⁹ O Diedo den maadi yeni Moyiisi, ki yedi, ¹⁰ Maadi yeni Israyeli nitaanli, yedi ba, 'Li ya tie ke ya nilo, bii o puolŋuanu jɔgni bi yula kelima kpiemo po, bii, bi ya pia ya sancenli n fagi, bi ba fidi ki cɔlni mi pendima jaanma O Diedo po. ¹¹ Bi ba fidi ki bogdi mi pendima jaanma bogda, o ŋmaalielo, o piiga n daanaali daali, ku yenjuogu. Bi ba jaani ma yeni ya kpanu n ki tieni dabinli, ki go ki tieni ya muadi n to. ¹² Bi kan sieni li jiema lan faa, bi go kan mudi kpabli. Bi ba cɔlni mi pendima jaanma ń buali ke lan ŋɔdi maama. ¹³ Ama, ya nilo n jɔgni, kaa pia sancenli, ama, kaa cɔlni mi pendima jaanma ń buali maama, li buali ke ban ñani li nilo Israyeli nitaanli siiga, kelima, o ki puni O Diedo lan buali ya paabu, lan buali ya daali, li binli nni. Lanya nilo ba tugi o tuonbiadi tagli. ¹⁴ Li ya tie, ke caano kua i siiga, ki cɔlni mi pendima jaanma ń buali maama, yeni li bogda kuli, li buali ke wan cɔlni mi pendima jaanma fuuna, ki ŋɔdi li ñɔmaama kuli ki da pɔdi libakuli. Mi ñɔmaama tie yenma i, bi dotieba po, yeni bi canba mo ya kuli." ¹⁵ ISRAYELI YAABA YEMA MI FANPIENMA NNI, HALI PIIGA N BINA NIIN. Ku taawalgu ladi ki pibni u kaangagdiŋamu. Ban den caani ki tii li gbandieli ya daali, ku tawalgu den jiidi ki pibni li gbandieli, a ñɔmaatana kpagu gbandieli. ku yenjuogu, ku tawalgu den libni li gbandieli polu. Ku den tie nani mu yeni i, hali yeni mi fiifaama siŋaagu. ¹⁶ Li den li tie yeni i li daali kuli. Ku tawalgu den pibni li gbandieli, ki tie nani u mupienu ku ñiagu. ¹⁷ Ku tawalgu ya fii ya yognu, ki doni li gbandieli polu, Israyeli yaa mo yi ŋabi bi jondi, ki fii, ki cuo bi cenli. Ku tawalgu ya ban sedi naani, li nitaanli mo yi kpaa bi jondi lankani i, ki kali. ¹⁸ O Diedo n den yi teni li ñɔbonli, Israyeli yaaba ń fii, ki cuo li cenli, o go ya teni o ñɔbonli ya yognu, ban sedi, ki kpaa bi jondi, ki kali ku tawalgu ń sedi naankani. ¹⁹ Ku tawalgu ya liibi li gbandieli po ya dana kuli, Israyeli nitaanli yi cɔlni O Diedo ñɔbonli, ki ya kaa likani, ki kan liedi. ²⁰ U yogtianu, ku tawalgu yi tieni a dana waamu li gbandieli po. Lanwani ii, bi den yi cɔlni O Diedo ñɔbonli, ki kpaa bi jondi, kali, ki go ya guu o ñɔbonli, ki fii ki cuo li cenli. ²¹ U yogtianu, ku tawalgu yi ye ti jondi nni, ki cili ku yenjuogu, ki ban tuoni ku siŋaagu. Ku tawalgu ya fii ku siŋaagu, bi yi tugni bi cenli. Ku tawalgu yaa fii, bimo kan fii ki cuo cenli. ²² Ku tawalgu ya liibi li gbandieli, ki tieni dana lie, ŋmaalo bii binli, lanyaaka ki waagi ki da liibi li gbandieli, Israyeli nitaanli yi ye bi jondi nni, bi kan lie ki gedi kaanu. Ama ku tawalgu ya fii, bimo yi kpaadi bi jondi, ki fii ki cuo li cenli. ²³ Bi yi cɔlni O Diedo ñɔbonli i, ki kpaa bi jondi ki kali, bi go yi cɔlni o ñɔbonli i, ki fii ki cuo li cenli. Bi den cɔlni O Diedo ń den bili Moyiisi ya ñɔbonli i, o nɔmaama nni yeni i.