¹ O Diedo ń den maadi yeni Moyiisi, Sinaayi juali po ya yognu, Moyiisi yeni Haarɔn puolŋuani n den ne. ² Haarɔn bijaba yela den tie Nadabi, o bijakpeli, yeni Abihu, Eleyasari, yeni Itamari. ³ Ban den bogdi Haarɔn bijaba yaaba, ki gagdi, ki sɔgi ba mi kpaŋanma, ki ŋanbi ba ke bi tua salga yidkaaba n ne. ⁴ Yin ya bani ke Nadabi yeni Abihu den baa ki kpe O Diedo nintuali, ban den kua yeni mutɔma, ki ba yidi O Diedo po salga, Sinaayi fanpienma nni. Nadabi yeni Abihu den pia biga, lanwani ii, Eleyasari yeni Itamari n ji den tie salga yidkaaba, ki tuuni yeni bi báa Haarɔn. ⁵ O Diedo den maadi yeni Moyiisi, ki yedi, ⁶ "Yini Lefi buolu yaaba, ki waani ba Salga yidkaciamo, Haarɔn, ban ya todi o o tuona nni. ⁷ Bi baa tuuni a tuona Haarɔn po, yeni Israyeli nitaanli kuli po u kadkaanu gbandieli kani. ⁸ Bani n baa fiini li gbandieli kadkaanu kani, ki nua li tuonsɔntiadi kuli, ki todi Israyeli buoli yaaba, ki tuuni li gbandieli nni tuona kuli. ⁹ A ba taa Lefi yaaba, ki teni Haarɔn yeni o bijaba. ŋan taa ba, ki teni Haarɔn, ban ya todi o bi yema nni kuli, Israyeli nitaanli kuli po. ¹⁰ A ba gagdi ki ŋanbi Haarɔn yeni o bijaba, ban tua salga yidkaaba. Ama yua n ki tie Haarɔn diegu nni yua, ki nagni li gbandieli kani, se wan kpe." ¹¹ O Diedo den maadi yeni Moyiisi, ki yedi, ¹² "Diidi, N ñani Lefi buolu yaaba, Israyeli nitaanli nni. Bani n ga Israyeli nitaanli bonjakpiala kuli kaanu. Lefi yaaba tie Mini O Diedo yaaba i. ¹³ A bonjakpiala kuli tie n yaaba i. Min den pua ki kpaa Ejipti diema yaaba bonjakpiala ya daali, n den gandi Israyeli bonjakpiala kuli yeni ti yandi bontonkpiala kuli Mini O Diedo po i. Bikuli tie N ya yaaba i, Mini n tie O Diedo." ¹⁴ O Diedo den maadi yeni Moyiisi Sinaayi fanpienma nni, ki yedi, ¹⁵ ŋan cɔdi Lefi buolu puolŋuani, dansanu nni kuli yeni yaaja diegu nni kuli. Cɔdi ya bonjala n pia ŋmaayendi bii ki cie." ¹⁶ Moyiisi den cɔlni O Diedo ñɔmaaba ki cɔdi ba lanbuali maama, nani wan waani o maama yeni. ¹⁷ Lefi bijaba yeli den tie, Gericɔni, Kohati yeni Merari. ¹⁸ Gericɔni puolŋuani tie, Libini yeni Cimeyi. ¹⁹ Kohati puolŋuani tie, Amirami, Isihari, Hebrɔn yeni Usiyeli. ²⁰ Merari puolŋuani tie, Mahili yeni Musihi. Bani n tie Lefi buolu nni yaaba, ke bi cɔdi ba cugli cugli. ²¹ Libini diegu yaaba yeni Cimeyi diegu yaaba yaaja n tie Gericɔni. Gericɔni cugli yaaba n yeni. ²² Bi den cɔdi yaaba n tie bonjala, ki pia ŋmaayendo , bii ki cie, bikuli cɔli den tie tuda lele n kobimu (7.500). ²³ Gericɔni cugli nniyaaba ba kpa bi jondi li gbandieli nintuali i. ²⁴ Layeli bijua, Eliasafi n baa tie Gericɔni cugli yaaba yudaano. ²⁵ Gericɔni cugli nni yaaba n baa kubi u kadkaanu gbandieli yeni u kaangagdiŋamu.Bani n baa nua li gbandieli yeni li caba kuli, yeni ya kpaldɔginkaabu n ye li gbandieli kadkaanu bulñɔbu kani. ²⁶ Bani n baa nua li gbandieli luolu cabjɔnkaana, yeni ya kpaldɔginkaabu n ye u luolu bulñɔbu kani, yeni u kaangagdiŋamu yeni li padbinbindli kaalindma. Bani n go baa fiini li gbandieli kadkaanu baabi kuli nni. ²⁷ Kohati mo ń tie ya cuga yaaja n ne: Amirami diegu yaaba, Isihari diegu yaaba, Hebrɔn diegu yaaba yeni Usiyeli diegu yaaba. Bani n tie Kohati cugli nni yaaba. ²⁸ Bi cɔdi bonjala tuda niin n kobiluoba, ke bi pia ŋmaayendo, bii ki cie, bani n baa nua O Diedo ń die ya bona kuli. ²⁹ Kohati cugli nni yaaba ba kpaa bi jondi li gbandieli ganu po i. ³⁰ Usiyeli bijua Elisafani n baa tie Kohati cugli yaaba yudaano. ³¹ Bani n baa nua a ñɔmaatana kpagu, taabli, li padbinbindli, u fidsantuankaanu, yeni ya tuosɔtiadi n gagdi ki ŋani, li gbandieli tuona po, bu kpaldɔginkaabu yeni yeni ya tuona n nua li tiadi kuli. ³² Haarɔn bijua, Eleyasari, salga yidkaciamo n baa tie Lefi buolu yaaba yudanba gobdika. Wani n baa gɔndi ya jaba n kubi, ki fiini u kaangagdiŋamu tuona nni. ³³ Merari diegu mali Cuga lie i: Mahili cugli nni yaaba yeni Musihi cugli nni yaaba. Bani n taani ki tie Merari cugli nni yaaba. ³⁴ Ban cɔdi ya bonjala ke bi pia ŋmaalo, bii, ki cie, tie tuda luoba n kobilie i (6.200). ³⁵ Abihayili bijua, Suriyeli n tie Merari cugli nni yaaba yudaano. Bani n ba kpaa bi jondi li gbandieli jienu po. ³⁶ Merari puolŋuani n baa nua li gbandieli daacaada, li kudlaana, li daapanda, li bunbuna yeni li bonbaanbidi kuli. ³⁷ Bani n go baa nua u luolu daacaada, u daapanda, li bunbuna li kpaana li bonjɔnkaana yeni l baabi kuli. ³⁸ Moyiisi yeni Haarɔn yeni o bijaba ba kpaa bi jondi li gbandieli puoli po, li gbandieli kadkaanu liiga, u yienu ń pudi naanpo. Bani n tie u kaangagdiŋamu nni tuona kuli yudanba, Israyeli nitaanli kuli po. Yua n ki tie Moyiisi bii Haarɔn diegu nni yua, ki nagni u kaagagdiŋamu kani, se wan kpe. ³⁹ Moyiisi yeni Haarɔn den cɔdi Lefi buolu nni bonjala yaaba n pia ŋmaalo, bii ki cie, nani O Diedo ń den waani o ke wan tieni maama yeni. Bi den tie tuda piilie n tuda lie i (22.000). ⁴⁰ O Diedo den yedi Moyiisi, "Cɔdi Israyeli nitaanli nni bonjakpiala, yaaba n pia ŋmaalo, bii, ki cie. Diani bi yela. ⁴¹ ŋan taa Lefi buolu yaaba, ki teni nni, Mini n tie O Diedo. Bani n ba lebdi Israyeli nitaanli nni bonjakpiala kuli. Lefi buolu yandi bontonkpiala n ba lebdi Israyeli nitaanli yandi bontonkpiala." ⁴² Moyiisi den cɔdi Israyeli nitaanli bonjakpiala, nani O Diedo ń den waani o ke wan tieni maama yeni. ⁴³ O den cɔdi Israyeli nitaanli bonjakpiala, yaaba n pia ŋmaalo, bii, ki cie. O den la bonjala tuda piilie n tuda lie n kobilie n piilele n bonbitaa (22.273) ⁴⁴ O Diedo go den maadi yeni Moyiisi, ki yedi, ⁴⁵ ŋan taa Lefi buolu yaaba, ban lebdi Israyeli nitaanli bonjakpiala, ki go taa Lefi buolu yaaba yandi bontonkpiala, ban lebdi Israyeli nitaanli yandi bontonkpiala. Lefi buolu yaaba tie Mini ya yaaba i. Mini n tie O Diedo. ⁴⁶ Israyeli bonjakpiala yabi ki cie Lefi buolu bonjakpiala. Yaaba n maani tie niba kobi lie n piilele bonbi taa i (273). A ba ga bani yaaba n maa yeni danba kani, ligdibala mu, yuakuli po, bi daafaabma po. ⁴⁷ ŋan ba ga ya dibala kpiagu ń ya taa yeni u kaangagdiŋamu nni dibala. Lani n tie gera piilie. ⁴⁸ ŋan teni Haarɔn yeni o bijaba ban pani ya pani mi daafaabma po. ⁴⁹ Lanwani ii, Moyiisi den ga Israyeli nitaanli ń pani ya pani bi bojakpiala yaaba n maani Lefi buolu yaaba po, bi bila daafaabma po. ⁵⁰ Moyiisi den ga Israyeli yaaba bonjakpiala daafaabma pani. O ga li ligi tudli n kobitaa n piiluoba n dibala mu (1365), ke dibali kuli tie nani u kaangagdiŋamu dibali yeni. ⁵¹ Moyiisi den taa li daafaabma pani ligi, ki teni Haarɔn yeni o bijaba. Moyiisi den tieni O Diedo ń den bili o o ñɔbonli ke wan tieni maama yeni, kaa pɔdi bá bonyenli.