¹ Israyeli nitaanli den waani ke bi pali ki mani O Diedo po, ke o gbadi. O Diedo den gbadi lanya mama, ke o pali biidi. U mu den ñani O Diedo kani ki juu ti jondi yaadi n ye i kuni po. ² Li nitaanli den buudi Moyiisi kani, ke o jaandi ki mia O Diedo, ke o mu yeni sedi. ³ Bi den yini li kaanu Tebera, kelima O Diedi mu den juu bi siiga nni nitianba. ⁴ Bi canba den ye, ki kua yeni Israyeli puolŋuani. Bi den lingi ti jieŋandi, ke ban di. Israyeli nitaanli den cili ki buudi, ki tua, "ŋma ji ba teni ti ti nandi tin ŋmani? ⁵ Ti tiadi tin den yi ŋmani ya jami faala, Ejipti diema nni, kɔnkɔnbre den ye, ke melɔn ye, ke i nɔli ye, ke a fela, ku gabgu, ki gabjaga, i kanbi. ⁶ Ti ji miadi ti jiedi nekanba, kelima, Manni baba n ye, ki tie jiema." ⁷ Manni den mani boncianla, ki tie nani ya tisinma n pia u nuulmanu yeni. ⁸ Li nitaanli den yi tɔgni, ki gandi gandi. Bi den yi nandi li naali po, bii ban tuoni li tuoli nni, ki ŋaani, ki pua ti lalaadi. Li mani nani ban pua ya maasa yeni ti siadi yeni mi kpama yeni i. ⁹ Ku mangu ya baa ti jondi nni, ku ñiagu, Manni mo yi jiidi ki baa i. ¹⁰ Moyiisi den gbadi ke bi niba buudi bi jondi nni, ke yuakuli kaa o jongu bulñɔbu kani. O Diedo pali den biidi boncianla, ke Moyiisi mo la ke ban biidi bi pala yaali ya po ki tiegi. ¹¹ Moyiisi den yedi O Diedo, "Be n cedi ke a cagni a naaciemo fanma? Be n cedi ke a pali ki mani npo? A cedi ke n tugi ya nitaanli ne kuli tugkpiagli. ¹² Mini n mali li nitaanli kuli ii? Mini n mali ba, ke a ba maadi nni, 'Bugi ba suoo, nani bibaa ń yi bugi o biga maama yeni?' Mini n ba tugi ba, ki gedi yeni ba ŋan den niani bi yaajanba ke a ba puni ba ya diema nni yeni ii? ¹³ N ba la ti nandi le i, ki teni ya niwulgu ne kuli ban ŋmani ki guo oo? Bi buudi n ninuali ki tua, 'Teni ti ti nandi tin ŋmani.' ¹⁴ N kan fidi ya niwulgu ne mini n baba. Bi yabdi ki kandi mini baba ya po o. ¹⁵ Nani ŋan cagni nni maama ne, a ji kan kpa nni yenma aa. A pali ya mani npo, ŋan kpa nni, ki wadi n falaciamo." ¹⁶ O Diedo den yedi Moyiisi, "Yini Israyeli nikpelba bonba piilele, ki cua yeni ba n kani. ŋan kpaagi ki diidi bikuli ya tie bi buoli gobdikaaba. ŋan cua yeni ba, ban sedi yeni a u kadkaanu gbandieli kani. ¹⁷ N ba jiidi, ki cua likani, ki maadi yeni yi lankani i. N ba bɔgdi a yantiali waamu ki kuani bi yula nni. Bani n ba todi a, ŋan tugi li nitaanli tugkpiagli. A kan ya tugi li tugkpiagli a baba. ¹⁸ ŋan yedi li nitaanli, 'Gagdi ki ŋanbi mani i yula, kelima, saala, i ba ŋmani ti nandi, kelima, i buudi, ke O Diedo gbadi. I den yedi, "ŋma ba teni ti ti nandi, tin ŋmani i? Tin den ye Ejipti diema nni, li den mani tipo." Lanwani ii, O Diedo ba teni yi ti nandi, yin ŋmani. ¹⁹ I kan ŋmani li nandi daayenli, dana lie, dana mu, dana piiga, bii dana piilie ka. ²⁰ Ama, i ba ŋmani ti nandi ŋmaamunli, hali tin duu yi, yin siini. Ti nandi ba miadi yi, kelima, i buli i nunga O Diedo yua n ye yeni yi. I buudi o nintuali, ki yedi, "Be n cedi ke o ñani ti Ejipti diema nni ii?"" ²¹ Lanwani ii, Moyiisi den yedi, "N ye yeni niba 600.000 i, ke a nan yedi, 'N ba teni ba ti nandi ban ŋmani hali ŋmaamunli.' ²² Ti ji ba kpa i nee yeni ti yanbidi i, ban ŋmani ki guo oo? Ti ba cuo mi ñincianma nni jami kuli i, ki teni ba ban ŋmani ki guo oo? ²³ O Diedo den yedi Moyiisi, "A tama ke n nuu kɔbgi yeni n ñɔbonli ii? To, mɔla, a ba bandi n maama ya tie mɔni bii faama i." ²⁴ Moyiisi den ñani ki waani li nitaanli O Diedo ñɔbonli. O den taani Israyeli nikpelba bonba piilele, ke bi sedi ki lindi li gbandieli. ²⁵ O Diedo den den jiidi ku tawalgu nni, ki maadi yeni Moyiisi. O Diedo den wadi Moyiisi yantiali waamu, ki kuani nikpelba piilele yeni yula nni. Li yantiali ń den kua bi yula nni, bi den pua sawali, ama baa den suagi liiga ke li waagi. ²⁶ Jaba lie den ye ti jondi nni, ke bi yi ba Elidadi yeniMedadi. U tienu yantiali den kua bimo ya yla nni. Bi den diani bi yela bi nikpelba siiga, ama, bani den ki gedi li gbandieli po. Ama, yeni lankuli, bi den pua sawali ti jondi nni. ²⁷ Jawaalo den sani ki ban waani Moyiisi, "Elidadi yeni Medadi pua sawali ti jondi nni." ²⁸ Nuni bijua Josuwe, Moyiisi naaciemo, wan den gandi yua bi jaba siiga, den yedi Moyiisi, "N canbaa, Moyiisi, beli ba ban da pua sawali." ²⁹ Moyiisi den guani ki jiini o, "A wangi mini i, a nunponbiadili ii? N bi sugni ke O Diedo ń kuani o yatiali li nitaanli kuli yula nni, bikuli ń ya pua sawali!" ³⁰ Lanwani ii, Moyiisi yeni bi nikpelba den guani ki lebdi ti jondi nni. ³¹ O Diedo den cedi ke ku faagu den ñani mi ñincianma po, ki figi, ke a kpenkpiga baa baa ki kuli ti jondi. a den ladi i kaani kuli ki bili ya banli n ba pundi daayenli cenli, ki duogi, ke u kpedu ba pundi nuukpaduna lie. ³² Bi niba ji den ki pia tuonliba kuli, se ban ya gaani a kpenkpiga yeni, yentunmunli yeni ñiamungu, li daalieli daali mo, lani n yeni. Niloba kuli den ki gandi ke li ki pundi kilo a tuda. Bi den ladi li kpenkpiga, i kaankuli, ti jondi nni. ³³ Ban den li ñidi li nandi, ke ti dá ye bi ñɔna nni, ke bi ŋmani ya yognu, O Diedo pali den biidi bipo, ke o den pua ba yeni u yiabiadpuodkou. ³⁴ Bi den yini likani, Kibroti Hatafa, kelima bi den piini lankani i yaaba n den buadi u falgu yeni u nialu, ki kpe. ³⁵ Bi den ñani Kibroti Hatafa, ki gedi ki ban kpaa bi jondi Haseroti, ki kali likani.