¹ O Diedo den maadi yeni Moyiisi, ki yedi, ² "Cedi ban tagi naatuna lie yeni ŋanjilfa. ŋan cedi ban pua ki tadi ŋanjilfa o, ki tagi li naatuna. I baa piebi li naatuna i, ki yii, ki taandi li nitaanli, i go baa piebi ŋani i, ki kpaadi ti jondi, ki co i sancenli. ³ Salga yidkaaba n baa piebi li naatuna, ki taagi li nitaanli a kani, u kadkaanu gbandieli bulñɔbu kani. ⁴ Salga yidkaaba ya piebi naatunyenli baba, li buali ke Israyeli buoli yudanba yeni a cuga nikpelba n ba taani a nintuali. ⁵ Bi ya piebi a naatuna boncianla, yaaba ya jondi n ye hali puoli po, ba fii, ki cuo li cenli. ⁶ Bi ya piebi mi liema boncianla, yaaba ya jondi n ye niganu po, n ba fii, ki cuo li sancenli. Bi ya piebi boncianla, li buali ke li sancenli ya po i. ⁷ Li ya tie li nitaanli taanma po i, li ki buali ke lan piebi a naauna boncianla. ⁸ Haarɔn bijaba, Salga yidkaaba n baa piebi a naatuna. Lan tua ipo ya fuuna ke yinba yeni i puolŋuani baa cɔlni hali yeni ya yogu kuli. ⁹ I ya caa tɔbu, ki ba tuogi i yibalinba, yaaba yaaba n pia ipo ki mabinga, yin piebi a naatuna boncianla. Mini, O Diedo, i Tienu ba tiedi ipo, ki faabi yi i yibalinba nui nni. ¹⁰ I pamanli dana nni, i jaanma yeni i ŋmaalo pani dana nni, li buali ke yin piebi a naatuna, ki padi i padjuukaana yeni i taanyenma salga yeni ti kpiagidi. Lani n ba waani mi tiadma Mini i Tienu po. Mini n tie O Diedo, i Tienu." ¹¹ Li binlieli, o ŋmaalielo danpiiliedi daali, ku tawalgu den fii a ñɔmaatana kpagu gbandieli po. ¹² Israyeli nitaanli den fii Sinaayi fanpienma nni, ki cuo bi cenli. Ku tawalgu den ban sedi Parani fanpienma nni i. ¹³ Bi den cindi ki cɔlni O Diedo ń den bili Moyiisi ya ñɔbonli n yeni, ki paani bi sancenli. ¹⁴ Ya jondi n kua ki lindi Juda puolŋuani tuudcabli n den cindi ki ŋabi bi jondi, ki fii, ki cuo li cenli, bani yeni bi tɔcaga. Aminadabi bijua, Nahicɔn n den gobdi Juda buolu yaaba tɔcagli. ¹⁵ Suwari bijua, Nataneli n den gobdi Isakari buolu puolŋuani tɔcagli. ¹⁶ Heloni bijua, Eliyabi n den gobdi Sebuloni puolŋuani tɔcagli. ¹⁷ Gericoni yeni Merari cuga puolŋuani yaaba n den nua li gbandieli tuona nni den ŋabi li gbandieli, ki fii ki paani li cenli. ¹⁸ Yaaba n den tuani, den tie yaaba n den kua ki lindi Rubeni buolu tuudcabli. Bimo den fii ki cuo li cenli. Cedewuri bijua, Elisuri n gobdi Rubeni puolŋuani tɔcagli. ¹⁹ Suricadayi bijua Celumiyeli n den gobdi Simeyɔn puolŋuani tɔcagli. ²⁰ Dewuyeli bijua, Eliyasafi n den gobdi Gaadi buolu puolŋuani tɔcagli. ²¹ Kohati cugli nni yaaba mo den bobni li sancenli, ki tugi u kaangagdiŋamu tuonsɔntiadi. buoltoe yaaba ba ga liiga ki ban tii u kaangagdiŋamu gbandieli, ki sua ke Kohati buolu yaaba pundi ban ba yuandi ki kpaa naani ti jondi, ki kali. ²² Ya tɔcaga n den ŋua Efrayima puolŋuani tuudcabli n den tuani ki bobni li sancenli. Amihudi bijua Elicama n de gobdi Efrayima puolŋuani tɔcagli. ²³ Pedasuri bijua, Gamalieli n den gobdi Manase buolu puolŋuani tɔcagli. ²⁴ Jideyɔn bijua, Abidanin den gobdi Benjamina buolu puolŋuani tɔcagli. ²⁵ Ya tɔcaga n den ŋua Daani buolu yaaba tuudcabli n den juodi ki fii li cenli po. Amicadayi bijua Ahiyeseri n den gobdi Daani puolŋuani tɔcagli. ²⁶ Okrani bijua, Pagiyeli mo n den gobdi Asiheri puolŋuani tɔcagli. ²⁷ Enani bijua, Ahira n den gobdi Nafitali buolu puolŋuani tɔcagli. ²⁸ Israyeli yaaba buoli tɔcaga ń den bobni maama, ki fii ki paani bi sancenli n yeni. ²⁹ Moyiisi den maadi yeni Rewuyeli bijua, Hobabi, Madiani buolu yua. Rewuyeli den tie Moyiisi denpua báa i. Moyiisi den maadi yeni Hobabi, ki yedi o, "Ti cuoni ki caa O Diedo ń den niani ti ya diema, ki yedi, 'N ba puni yi li diema.' Yegi yeni ti, tin gedi, ti ba ŋanbi apo a yema. O Diedo den niani ke O ba ŋanbi Israyeli yaaba po." ³⁰ Ama Hobabi den jiini Moyiisi, ki yedi, "N kan gedi yeni yi. N ba gedi n ya diema nni i, n buolu niba ń ye naankani." ³¹ Lanwani ii, Moyiisi den guani ki yedi o, "N mia ŋa, ke ŋan da yaadi ki ŋa ti. A pia mi fanpienma nni jondi tiima banma. Fini n baa ŋmagdi ti, ki guu ti. ³² A ya ŋɔdi ti, ki gedi, O Diedo ń ba tieni ti ya ŋanma yeni, ti mo ba tieni apo lanya ŋanma i." ³³ Bi den ñani O Diedo juali kani, ki couni dana taa i. O Diedo ñɔmaatana kpagu den ga bi liiga ki tieni dana taa, ki ba lingi ban ba kpaa ki tii bi jondi naakani, ki kali ki fuodi. ³⁴ Bi sancenli nni, O Diedo tawalgu den yiini bi yula po daali kuli bi sancenli nni. ³⁵ Yaaba n tugi a ñɔmaatana kpag ya gedi ya yognu, Moyiisi yi yedi, O Diedo, fii ki sedi, piani yibalinba kuli. Cedi yaaba n nani a ń sani ki fagdi yeni a." ³⁶ Ku ŋantaadikpagu ya sedi ya yognu, Moyiisi yi yedi, "O Diedo, lebdi ki guani nekanba, Israyeli yaaba a tuda tuda ya jondi nni."