¹ Yeesu-Kristo ʋkaɖʋfaŋa ɩ Gaja gashee nɩ afaŋa abatəŋleeja alesvra ɩ ɩnutɩ pɩ ma, na atəm na a malaɩka ashee Yohana. ² Yohana alee Gaja kaalei na Yeesu-Kristo kasəriya bʋkɔɩ aiŋə ma. ³ Nɖi nsono ashee nɖee ana tʋr galei naa basaaka ba na rəŋ annabi kabʋlei, naa atoŋo gɩshɛbɔbʋkɔɩ baŋɔn ma! Aɖʋwaa: kalʋwaatʋ asəla boŋo. ⁴ Yohana aŋɔn ashee ɩcɔɔcɩ kulumi mbaɖee baɖa Asii nɩ ma: gʋjɔɔ na fɛɛ ɩɖoo na nɖee aɖa, na cee ɖa, naa atʋnapɩ ma, a sul ashee anyɩn, n'aŋŋuro kulumi ɩ ɩda aŋyariboi kaŋyɩ ma. ⁵ Na Yeesu-Kristo ɖeiɖei kasəriya yar, alee ka nɖee basəba aŋʋm bakono nɩ ma, naa lee ɖulinya aŋunii kəbayari banɖiyar! Asɔlɔ atʋ, natɔɔ akɔnɔ ashɛr natɩmbɔnɔ, ⁶ Atɔɔ atʋ apra, Gaja kaayarɩtəna nɩ, kəbasanabaja ashee ayar ajɩye ʋkʋmʋ nɩkashɩ bʋjabʋja nace nace! ⁷ Ŋə ma nɩ! atʋ ka gəŋ, ɩnyine ɩŋunii ɩtɩɩŋə nɩ atʋ ma, atinyɔnna mbaɖee bakalnɩ ma; Ɖuliŋ agatəna gaŋunii kɩɖimi batɩ ba naa beleŋshi alaŋ. ⁸ Amʋ na Alfaa na omega, ɩkoyar Gaja, nɖee aɖa na cee ɖa, na atʋnapɩ ma; ɩkashɩ ɩŋuniiyar. ⁹ Amʋ na Yohana, anyɩmwor nɖee na nɩ man najɩ Gaja kaayaɩtəna kishɛɩ akara gayɛ na ruku Yeesu-Kristo nɩ ma, ncee aɖa patɩmɔɔsi kaatəna ɩbʋto bʋ sir jɩ akal ma nɩ, Gaja kaalei laŋ, na Yeesu asəriya laŋ. ¹⁰ Sabaatɩ kʋshile na ŋŋuno nsoŋsono nrŋə namʋ, na nrəŋə ʋwələ ʋbɔmbɔnɔ ɖən amʋ ŋkəmɖaa gʋlʋgʋ sənka gʋbʋmbɔnɔ kʋwələ ma. ¹¹ N'ʋwələ ɖe ʋlə waa: Bʋkɔɩ ʋnaŋə waa ma, ŋɔn bʋ gʋbɔ gʋɖən nɩ, naa atogo ashee ɩcɔɔcɩ kulumi, Efɛɛsɩ, sɩmiirni, pɛrgaamɩ, Tiyatiirɩ, sarɖɛɛsɩ, filaɖɛlfii, naa Laʋɖisee. ¹² Mbʋŋa na yɛɛ ma ŋə ayɔ ʋwələ nɖee ʋna lə n'amʋ ma, mbʋŋ akiɖe ma, na nŋə wurakɩfɩla kulumi. ¹³ Wura kɩfɩtila kulumi ɖe nɩ, kagɩcɩɩca nanŋə ʋɖən ɖaa arɛpur ma, aɖe kara jabakatoko alamaka naa mm wura kabɛlɛtɩ aŋrɛŋɛ laŋ. ¹⁴ Anɖilaŋ kaŋʋrʋ ɩɖe kər ɩfɔnɔ ɖaa gʋfufu ma akən ɖaa ʋcitalʋfuro ma; ɩnyine ɩɖe ti mɩlɛ mɩlɛɖ'ʋtonu ma, ¹⁵ Ɩkei ɩɖe kim pii ɖaa ba narɩ nrʋkɔ nton ma, aɖa ɖaa aɖoo na ʋtonu kaŋku nɩ ma; ʋwələ ʋɖe ɖa ɖaa gatubʋmbɔnɔ ga na ciɖe na tugo ma. ¹⁶ Agʋnyɛsononɩ, ɩŋɔrɩpi kulumi ɩɖe da ncən, gapɔɔ gasɔɖɔsɔdɔka bʋyɛbʋnyɩʋ kaaja gaɖe gatɩ ɖoo aganɔ nɩ; agayɛ gaɖe gatɩ ŋələ ŋələ ɖaa ʋshile ʋnakaŋkər paa ma. ¹⁷ Nŋə nɩ ma, na nfəɖa aŋyɩɩ ɩkei sul acii ŋŋurolaŋ, na atər agʋnyɛ amalaŋ naa lə waa asampəna ɩpaa kpa akɩ na! ¹⁸ Amʋ nlee ka asəbaka, na aboŋaka, na ŋŋuro yar mbʋŋa acii; Na nnyəmə nkɔɔ aɖaŋŋuro nɩ bʋja bʋja. Ntoŋ bʋce na bʋce kaafala ka saafɩ. ¹⁹ Ŋɔŋ ayɔkɔ ɖe ʋŋə ma, na nɖee ɩɖa ma, na nɖee ɩnutipi kəmkəm ma. ²⁰ Ɩŋɔrpi kulumi kantəma nɖee ʋŋə aŋgnyɛsoni nɩ ma, na wura kɩfɩtɩla kulumi. Ɩŋɔrpi kulumi ɖe ɩni nɩ gəŋ cɔɔcɩkulumi kɩmalaɩka mana wura kɩfɩla, ɩni nɩ gəŋ ɩcɔɔcɩ kulumi.