¹ Gàŋunamə Micaël, ə̀fiɔ gánŋ́gáán ává có, tɔɔ́ dukɔ́nməvíwó wó xɔnámətɔ́; í à nyin ə̀jì ɖəlaməxo yə́ hoenu, kə́ rɔkpa ŋ́ vámən kpɔ́ kə dùkɔ́nwó jɔ kə́kə́ vá nán əgba ò. Gàŋunaməán, tɔɔ́ dukɔ́məvíó kə wá kpɔ́ wó ŋ́kɔ́ lə wóéman məán wóá kpɔ́ xɔ̀ namən. ² Amən sùgbɔ kə kúɖɛ́wó wá fɔ́n, ɖòó nə́n àgbə̀ mavɔ, í kpɛtíáwó nə́ ŋunkpən gánŋ́gán, nə́n ŋunkpən mavɔ. ³ Amən kə wá jə núnyán wó wá dazò sigbə jìŋkorí yə́ nyɔ́nyɔ́n blibo, í amən kə á kprá àdòdó wɔwɔ wóá sùgbɔtɔ wá dazò sigbə wreetívíwó ənə́n, có mavɔ yi mavɔmən. ⁴ Əwo Daniel, cɔ́ ənyɔn iláwó də wàwrá mən, í ɖóòkpə́ wóémaan ji kə́kə́ vá nan vɔxó xɔntɔn amən sùgbɔ lá vá hrɛn, í ŋunúnyányán lá jəjí. ⁵ Í ənyən, Daniel, ŋ lə kpɔ́, í kpɔ́ɖá, ŋúncu ámə̀və̀ nɔ̀ntəɖɛ́, amən ɖə́ká lə ə̀tɔa tó, í amən ɖə̀á lə ə̀tɔató yə kpá ŋunuxó. ⁶ Amən ɖəká lə́ wómən lə nú nə́n amən kə dó awu fɛ́lɛ́fɛ́lɛ́, í nɔ̀ntə də́ ə̀tɔa yə́ ci jí; gbèé amlima nú iláó kàa vɔ? ⁷ Í ŋ sə amən kə dó awu fɛ́lɛ́fɛ́lɛ́, kə nɔ̀ntə də́ ə̀tɔa yə́ ci jí; ə́ dó yə́ lɔ ɖusí kídə́ əmiɔn ɖíɖá ə̀jiŋkorí, í ì ta amən kə lagbə̀ mavomavɔa bə́ à nyín gàbù wó gabú mən, kídə́ gàbumən yə́ mámán mən, í ənú inanwó séé lá vɔ nə́n dùkɔ́n kɔkɔ yə́ ŋúnsə́n lá vɔ kə́ŋúnkə́ŋún án. ⁸ Ŋ sə, vɔ̀ nyə ŋún sə gɔmə ò; í ŋ núbə́: Tiŋ́ xótɔ́, nə́n ənú inanwó wá tɔ́jí mɔ́n? ⁹ Ǝ́ɖonún bə́: yì, Daniel, ɖó ənyɔn iláwó á vámən lə wàwrá mən í wá ɖóòkpə́jí kə́kə́ nə́n yə́ vɔxó. ¹⁰ Wóá kɔ amən sùgbɔ̀ ŋùn, wóá yé í kɔ cékécéké; ŋunta sə́n tɔ́wó wóá wɔ nú baɖa í ŋunta sə́n tɔ́á wó ɖə́kɛ́n nán sə gɔmə ò, vɔ̀à ŋunúnyántɔ́wó wá sə gɔmən. ¹¹ Có gàkəmən vɔ̀sá də́ vɔ̀sá jí á nɔ̀ntəá, í ləfì ənúdáànhə̀ntɔ́ á yi yə́ nú dáka wó jí ləá, ŋkəkə kotokú ɖə́ká alɔfán və̀ kídə́ kavə̀ cíiwó. ¹² Ǝ̀lanyóɛ́n nə́ amə kə á nɔ̀ntəa, í lá vá kə́kə́ ŋkəkə kotoku ɖəka alɔfán ámə̀ntɔn kídə́ ə̀gbàn! ¹³ Í əwoà, zɔ̀n kə́kə́ yí tɔɔ́ vɔ xó, àa vá gbonfɛ̀ɛ̀, í àa vá nɔ̀ntə nə́n tɔɔ́ fəntú lə ŋkəkəwó vo xó.